Late 5:10 - Tedim Bible

¹⁰ Pasian aw, a mawhna uh amau mah thuaksak inla, amau’ thu mah tawh amaute puksak in. Amaute in nangmah hong lehdo uh ahih manin amau’ mawhna tampite hangin amaute paaikhia in.

Tedim Bible Revision 2017

¹⁰ Pasian aw, a mawhna uh amau mah thuaksak inla, amau thu mah tawh amaute puksak in. Amaute in nangmah hong lehdo uh ahih manin amau mawhna tampite hangin amaute paai khia in.

Late 5:10 Referans Kwoze

Isaiah 63:10

Ahih hangin amaute in lehdo uh a, ama kha siangtho a dahsak uh hi. Tua ahih ciangin amah pen amaute’ gal suak a, amahmah in amaute a do hi.

2 SAMUEL NIHNA 17:14

Tua ciangin Absalom le Israel mite khempeuh in, “Arkhi mi Hushai’ thugen pen Ahithofel’ thugen sangin hoihzaw hi,” a ci uh hi. Bang hang hiam cih leh Topa in Absalom’ tungah siatna a tunsak theih nadingin Ahithofel’ thugen hoih in a lelh ding Topa in a sehsa ahi hi.

1 KORIN MASA 3:19

Hih leitung mite in pilna hi, ci-in a ngaihsutte, Pasian a dingin a haihuai thu ahi hi. Bang hang hiam cih leh Lai Siangtho in, “Mipilte amau’ ngian mahah awksak hi,” a na ci hi.

Late 71:13

Kei hong mawhsakte zahhuai-in beimang uh hen la, keima siatna ding a zongte simmawhna le minsiatna in tuamcip tahen.

Late 31:18

Thumante’ langah pang a, kihihsak pau-in, kiphatsakna le simmawhna tawh pau-in zuauthu a gen mite a pau thei loin omsak in.

2 SAMUEL NIHNA 17:23

Ahithofel in ama thugen a kizuih loh a muh ciangin a la tutphah vawhin ama khuapi a inn-ah nuak ciah hi. Tua ciangin amah in a innkuan vai hawmsak a, a man ciangin amahmah gui-awk hi. Amah si a, a pa’ hanah kivui hi.

2 SAMUEL NIHNA 15:31

Tua laitakin David kiangah, “Ahithofel zong mi sawmsimte lakah Absalom tawh om hi,” ci-in kigen hi. Tua ahih ciangin David in, “Topa aw, kong thum hi; Ahithofel’ thugente haina-in na heisak in,” a ci hi.

Hosea 9:7

Gimthuakna hun hong tungta a, thukkikna hun hong tungta hi. Tua hun ciangin Israel mite in na thei ding uh hi. Note’ mawhna hang le note in kei nong muhdahluat manun, “Hih kamsangpa mihai hi; hih thumu pa lungsim kicing lo hi,” nong ci uh hi.

Kah la 1:5

A galte gualzo uh a, amaute a nuaisiah gawp uh hi. Mawhna tampi a neih manun, Topa in tua bangin gimna a thuaksak hi. A mite khempeuh sila dingin a kipuakhia hi.

Late 55:15

Amau’ tungah sihna tungsak in. Leinuai-ah a hingtangin amaute paisuk sak inla, amaute launa lianpi tawh a han uhah paisak in.

Late 35:26

Kei’ kamsiatna-ah a lungdamte maizumsak inla, zahhuaigawp sak in! Kei tungah a hong kiliansakte maizumna le mindaina thuaksak in!

Daniel 9:9

Nang pen hehpihna tawh kidimin mawhna na maisak a, ahih hangin kote in nang ka hong langpan’ uh hi.

Daniel 9:5

“Kote ka hih uhleh ka gilo uh a, mawh khinin ka khial khin uh hi. Na hong sawlna bang ka mang kei uh a, na thupiakna le na thukhamte ka taisan khin uh hi.

Isaiah 1:20

Ahih hangin note in kei hong nialin na hong lehdo uhleh namsau in note hong vatmai ding hi. Bang hang hiam cih leh Topa in hih thu gen khinzo hi,” a ci hi.

Isaiah 1:2

Vantungte aw, na za un; leitung aw, na ngai in; bang hang hiam cih leh Topa in thu hong gen khinzo a, “Ka pattahsa ka tate in kei hong lehdo uh hi.

Late 107:11

Bang hang hiam cih leh amaute in Pasian’ thu sel uh a, Sangpenpa’ thugente a nial uh hi.

Late 79:12

Amaute in nang hong zahkona mah tawh ka vengte uh’ ang sungah a zah sagihin thuk in, Topa!

Late 66:7

Ama thahatna tawh a uk ngitnget pa, ama mit tawh minamte a encik ngitnget pa, mi lehdote in langpan’ kei uh hen.

Late 17:13

Topa aw, tho in! Amaute maiphut inla, thalpaih in! Topa aw, a deih khempeuh uh hih leitungah a nei migilote kiang panin na khut le na namsau tawh kei hong honkhia in. Amau a dingin na koihcing gimnate thuaksak inla, a tate un zong a cingvalin thuak uh hen la, a naungekte uh a’ ding nangawn nusiat lai ta uh hen.

Late 10:15

Giloin siatna a bawlte’ khut kuaitan gawp inla, siatna a bawlzo nawn lo dingin gim pia in.

Esther 7:10

Tua ciangin kumpipa in, “Tua tungah amah khailum un,” a ci hi. Tua ahih ciangin Mordekai khailup nadingin a phuh khuam tungah Haman a khailum uh hi. Tua ciangin kumpipa’ hehna a dam hi.

2 KHANG TANGTHU NIHNATE 25:16

Ahih hangin amah in thu a gen laitakin kumpipa in ama kiangah, “Kumpipa tungah ngaihsutna a pia dingin nang hong koih ka hi uh hiam? Khawl in! Bang hangin nang hong kithat ding ahi hiam?” a ci hi. Tua ahih ciangin kamsangpa khawl a, ahih hangin ama kiangah, “Hih bang gamta-in ka thugenna ngai lo na hih manin Pasian in nang hong suksiat ding a lungsim a khentatna ka thei hi,” a ci hi.

1 SAMUEL MASA 25:39

Nabal a sihna thu David in a zak ciangin amah in, “Nabal khut tung panin ka ngah zahkohna hong thuksakin, siatna panin a nasempa a lenkik Topa in thupha ngah tahen. Topa in Nabal’ gamtat siatna ama lu tung mahah tungkiksak hi,” a ci hi. Tua ciangin David in mi sawlin ama zi dingin Abigail helsak hi.

1 SAMUEL MASA 25:29

Nangmah delhin hong that dingin mite hong kipat leh, nang pen Topa na Pasian’ kepna sung a hing mite lakah na om ding a, amah in suanglotna tawh lotkhiat bangin na galte lawnkhia ding hi.

Thu-hilhkikna 2:30

“Ahih hangin Heshbon kumpipa Sihon in eite hong paisak lo hi; bang hang hiam cih leh tuhuna mah bangin na khutsung uhah amah hong piak theih nadingin Topa na Pasian un a lungsim khauhsakin, amah paupeengsak hi.