Kolose 3:22 - Tedim Bible

²² Silate aw, thu khempeuhah na leitung topa uh thu na mang un. Amau’ hong pahtak ding deihna tawh a hong muh sung bekin a hoihtatte hi kei unla, Topa na zahtakna uh hangin lungsim tak tawh gamta un.

Tedim Bible Revision 2017

²² Silate aw, thu khempeuh ah na leitung topa uh thu na mang un. Amauʼ hong pahtak ding deihna tawh a hong muh sung bekin a hoih tatte hi kei unla, Topa na zahtakna uh hangin lungsim tak tawh gamta un.

Kolose 3:22 Referans Kwoze

Galati 1:10

Hih bangin thu ka gen ciangin mite’ hong pahtak theih nading a zong tawh kibang na hong sa uh hiam? Mite’ pahtak ding a ut ka hi kei a, Pasian’ hong pahtak ding a hanciam ka hi hi. Mihingte’ hong pahtak theih nadingin a gamta hi zenzen leng, Khrih’ nasem ka hi kei ding hi.

1 THESALONIKA MASA 2:4

Pasian in kote hong thei-in Lungdamna Thu a hilh dingin kilawm hong sa ahih mah bangin mite’ lungdam theih nadingin thu a hilh hi loin kote’ lungsim ngimna a hong thei Pasian’ lungkim nadingin thu a hilh ka hizaw uh hi.

Kolose 3:20

Tate aw, na nu na pate uh thu man’ tawntung ding pen na Khristian nasep uh ahi hi. Tua bang thumanna in Pasian lungdamsak hi.

Luka 6:46

“Bang hangin, ‘Topa aw, Topa aw,’ hong ci napi-in ka hong gente zui lo na hi uh hiam?

Thuhilh-sia 5:7

Mang tam man leeng a mawkna mah tam a, kam tam pau leeng zong a kituak mahin a mawkna thu mah kibehlap hi; bangbang ahi zongin Pasian zahtak lai veve in.

Filemon 1:16

Tu-in amah sal bek hi nawn loin sal sangin a thupizaw, Khrih hangin i sanggam hong hita hi. Kei a dingin amah a manphat mah bangin sal hihna le Topa thu sungah sanggam hihna tawh nang a dingin zong hong manphazaw kan ding hi.

2 KORIN NIHNA 7:1

Tua ahih manin ka hong it lawmte aw, pumpi le lungsim a ninsak theite khempeuh panin kisiansuahin, Pasian zahtakna tawh nungta-in siangtho sinsenin om ni.

Sawltak 2:46

Nisimin biakinn-ah kikhawm uh a, a innte uhah an nekhawmin, lungdamna le kiniamkhiatna tawh a ne ciat uh hi.

Luka 7:8

Kei zong uliante’ khutnuai-ah hong kikoih mi khat ka hi a, keima khutnuai-ah zong galkapte a om hi. Khat kiangah, ‘Pai in,’ ci leng a pai hi. Khat kiangah, ‘Hong pai in,’ ci leng a hong pai hi. Ka nasempa kiangah, ‘Hih na sem in,’ ci leng zong sem hi,” a ci hi.

Mattiu 8:9

Kei zong uliante khutnuai-ah nasem mi ka hi a, keima khutnuai-ah zong galkapte a om hi. Tua galkapte khat kiangah, ‘Pai in,’ ci-in sawl leng pai a, adang khat kiangah, ‘Hong pai in,’ ci-in sam leng hong pai a, ka nasempa kiangah, ‘Hih sem in,’ ci-in sawl leng a sem hi,” a ci hi.

Mattiu 6:22

“Mittang pen pumpi a dingin meivak tawh kibang hi. Na mit uh ciim leh na pumpi un hoihtakin khua mu thei hi.

Malakhi 1:6

Vanglian Topa in siampite tungah hih bangin hong ci hi: “Tapa in a pa zahtak a, nasempa in a topa kihta hi. Kei pen na pa uh hinapi, bang hangin hong zahtak lo a, na topa uh hinapi, bang hangin hong kihta lo na hi uh hiam? No siampite in kei hong simmawh napi-in, ‘Bang hong ci simmawh ka hi uh hiam?’ na cilai uh hi.

Thuhilh-sia 12:13

Hih thute khempeuh banah gen ding thu khat bek om hi. Mihing hong kipiansakna a thu bulpi pen in: Pasian zahtakna le a thupiakte manna ahi hi.

Late 123:2

Nasem pasalte in a topa uh muang a, nasem numeite in a tonu uh a muan mah bangin ko tungah hehpihna nong neih matengin Topa kote’ Pasian kong mitsuan uh hi.

Nehemiah 5:15

Keima hun ma-in a ukte in mite tungah van gikpi suan uh a, amaute’ tung panin nisimin an le leenggahzu ngun shekel sawmli man a la uh hi. Amau’ nasemte nangawn mite tungah kiliansak lai uh hi. Ahi zongin Pasian ka zahtakna hangin tua bangin kei ka gamta kei hi.

Piancilna 42:18

A ni thum ni-in Josef in amaute kiangah, “Keimah in Pasian zahtak ka hih manin hih bangin gamta un. Tua hileh na nungta ding uh hi.

Thuhilh-sia 8:12

Mawhnei khat in zavei dong siatna bawl napi-in a khansau veve hi. Ahi zongin “Pasian a zahtakte a dingin thu khempeuh nuam ding hi.

Nehemiah 5:9

Tua ciangin keimah in, “Note’ gamtatna hoih lo hi. I gal ahi minam dangte’ zahkona i ngah loh nadingin i Pasian zahtakna tawh na gamtat ding uh kilawm hi.