Kolose 3:15 - Tedim Bible

¹⁵ Note pumkhat suakin a lungdam khawm dingin Pasian in a hong sap ahih mah bangin Khrih hong piak nopsakna in note’ lungsim hong uk ta hen la, lungdamin om ta un.

Tedim Bible Revision 2017

¹⁵ Note pum khat suakin a lungdam khawm dingin Pasian in a hong sap ahih mah bangin Khris hong piak nopsakna in noteʼ lungsim hong uk ta henla, lungdamin om ta un.

Kolose 3:15 Referans Kwoze

Johan 14:27

Note tungah keima neih bang lungnopna ka hong pia ding hi. Tua ka hong piak ding lungnopna pen leitung mite in a piaktheih a kip lo lungnopnate pawl hi lo hi. Tua ahih manin lau kei unla, zong lungkham kei un.

Isaiah 26:3

Topa aw, nang hong muang a, nangma tungah a lungsim khempeuh a koih mipa lungnopna kicing pia ta in.

ROM (Romans) 15:13

Kha Siangtho’ huhna tawh note’ lametna a khan semsem theih nadingin, lametna a hong piathei Pasian in, amah na upna uh hangin lungdamna le nopsakna tawh note hong kidimsak tahen.

1 THESALONIKA MASA 5:18

bangbang hong piang taleh na lungdamna uh Pasian tungah ko tawntung un. Khrih Jesuh tawh kipawlin na nuntakna sung uhah hih bangzia-in na om ding uh Pasian in a hong deih ahi hi.

Late 29:11

Topa in ama mite tungah thahatna pia tahen. Topa in ama mite tungah nopsakna thupha pia tahen.

ROM (Romans) 5:1

Tu-in upna hangin Pasian tawh kipawl khinta ihih manin i Topa Jesuh Khrih hangin Pasian tawh a kilemkik ta ihi hi.

Kolose 3:17

Na kampauna, na gamtatnate khempeuh uhah, Topa Jesuh hangin Pa Pasian tungah lungdam kohna-in Jesuh min paulamin na hih ding uh hi.

Johan 16:33

Keimah tawh na hong kipawlna uh hangin lungnopna na neihtheihna dingun hih thu a hong gen ka hi hi. Leitung gimna na thuak ding uh hi. Ahi zongin keimah in leitung nate zo khinta ka hih manin lungnuamin om un,” a ci hi.

Efesa 5:20

I Topa Jesuh Khrih hangin thu khempeuhah Pa Pasian tungah lungdamna ko ta un.

2 KORIN NIHNA 9:11

Kote tungtawnin note’ huhna sumte a ngahna uh hangin mi tampi in Pasian a phattheih nadingin note na cit gamtatzawh tawntung nadingun Pasian in hong hausak tawntung ding hi.

Efesa 4:4

A kibang lametna khat bek a ngahkhawm dingin Pasian in note hong sap mah bangin eite khempeuh pumkhat bek hi-in Kha Siangtho zong khat bek mah a neikhawm ihi hi.

ROM (Romans) 14:17

Bang hang hiam cih leh Pasian’ Ukna pen nekledawn tawh a kisai thu hi lo a, Kha Siangtho hangin i ngah Pasian’ deih bangin gamtatna, kilemna, lungdamna, cihte hizaw hi.

Late 116:17

Lungdam koh biakpiakna nang tungah kong pia ding a, Topa’ tungah thu kong ngen ding hi.

1 TIMOTI MASA 2:1

A masa penin kong gennop thu in: Mi khempeuh a dingin Pasian tungah ngetna, thungetna, thumna le lungdamkohna na neih ding uh ahi hi.

Kolose 2:7

Note tungah a hong kihilhsa bangin ama sungah zungthuk kha unla, ama deihna bangin nungta-in, na upna uhah khauh semsemin, lungdam takin om un.

Efesa 5:1

Note pen Pasian in a hong it a tate na hih manun amah tawh na kibat nadingun hanciam un.

2 KORIN NIHNA 4:15

Hih thute khempeuh note a’ ding a kikhualna hi a, Pasian’ hehpihna in mi tam ban semsem leh mi a tam semsem mah in Pasian’ minthan nadingin lungdam ko-in thu ngen ding uh hi.

Isaiah 57:15

Bang hang hiam cih leh a sang, a lian, a nungta tawntung Pa, ama min Siangtho ahipa in hih bangin ci hi: “Kei pen a sangna mun le a siangtho munah ka om a, a kiniamkhiat mite’ lungsim le a kisik mite’ lungsim a thakhauhsakkik dingin kisikna le kiniamkhiatna lungsim a neite tawh zong kei ka omkhawm hi.

Mangmuhna 7:12

“Amen! Eite’ Pasian in phatna, minthanna, pilna, lungdamkohna, pahtawina, vangliatna, le hatna a tawntungin nei ta hen! Amen,” a ci uh hi.

Efesa 4:16

Ama ukna mangin pumpi na a tuamtuamte a kituak takin kizom a, amaute limtakin a kizop dimdiamna hangin pumpi pen pumkhat a suak thei hi. Pumpi na a tuamtuamte in amau’ sep ding ciat hoihtakin a sep uh ciangin itna hangin pumpi khangin a cingtaak a suak thei hi.

Late 107:22

Lungdam koh piaknate pia-in ama nasepnate lungdam la tawh amaute gensak un.

Late 100:4

Lungdam kohna tawh ama kongpi-ah lut unla, amah phatna tawh ama huang sungah tum un. Ama tungah lungdam ko unla, ama min phat un.

Hebru 13:15

Tua ahih manin Jesuh tungtawnin amah i biakna-in i kam tawh ama min pulakin Pasian phat tawntung ni.

1 KORIN MASA 7:15

Ahi zongin thu um lo zi in ahi a, thu um lo pasal in ahi zongin kikhen ding a ut leh kikhen ta uh hen. Tua bang thute-ah thu um zi ahi a, thu um pasal ahi zongin a awk nading thu om lo hi. Pasian in nuamtakin a nungta dingin a hong sap ahi hi.

ROM (Romans) 1:21

Amaute in Pasian thei napi-in a zahtak dingun a kilawm bangin zahtak loin, a tungah a lungdam dingun a kilawm bangin lungdam lo uh hi. Amaute in thuhoih ngaihsun nuam lo uh a, a ngaihsutnate uh a mawknapi a suak hi.

Jonah 2:9

Ahih hangin ke’n ahihleh lungdamna aw tawh biakna kong pia ding a, ka ciamsa thu ka tangtungsak ding hi. Topa’ kiang pan hotkhiatna hong pai hi,” a ci hi.

Isaiah 27:5

Tua ahih kei leh keima hutna sungah amaute hong om hen la, amaute in kei tawh kilemna hong bawlin keimah tawh amaute hong kilem ta uh hen,” Topa in ci ding hi.

Isaiah 57:19

Nopsakna, nopsakna, a gamla le a nai mi khempeuh tungah om tahen. Keimah in amaute ka damsak ding hi, Topa in ci hi.

1 KORIN MASA 10:17

Anlum khat bek hi a, eite mi tampi hinapi-in tua lum khat bek mah nekhawm ihih manin eite pumkhat bek mah ihi hi.

1 TIMOTI MASA 6:12

Upna thu-ah hoihtakin nawksuak inla, mi tampi’ zakin na pulaksa, Pasian in nangmah a hong piak nuntak tawntungna lenkip in.