Johan 17:8 - Tedim Bible

⁸ Bang hang hiam cih leh gen dingin na hong sawl thu khempeuh amaute kiangah ka gen ciangin um uh a, nangma kiang panin a pai ka hihna thu hong thei uh a, nangma hong sawl ka hihna thu zong hong um uh hi.

Tedim Bible Revision 2017

⁸ Bang hang hiam cih leh gen dingin na hong sawl thu khempeuh amaute kiangah ka gen ciangin um uh a, nangma kiang panin a pai ka hihna thu hong thei uh a, nangma hong sawl ka hihna thu zong hong um uh hi.

Johan 17:8 Referans Kwoze

Johan 17:14

Amaute tungah na thu ka gen khin hi. Ahi zongin keimah bangin amaute zong hih leitung mite tawh kipawl lo uh ahih manin leitung mite in a mudah uh hi.

Johan 15:15

Nasemte in a tote’ nasepna bangmah thei lo ahih manin note pen nasemte ka hong ci nawn kei ding hi. Ka Pa’ tung panin ka zak thu khempeuh note kiangah hong genkhin ka hih manin note, lawm, ka hong ci zaw ding hi.

Johan 16:30

Tu-in na khempeuh na theihkhitna thu ka phawk uh a, ka theihnop uh thute kote in ka hong dot ding uh zong kisam nawn lo ahih manin Pa kiang panin a hong pai na hihna thu ka hong um uh hi,” a ci uh hi.

Johan 16:27

Bang hang hiam cih leh note in kei hong itin, Pa kiang panin a hong pai ka hihna thu um na hih manun Pa mahmah in note hong it ahihna hang ahi hi.

1 THESALONIKA MASA 2:13

Note kiangah Pasian’ thu ka hong gen uh ciangin no thu um mite sungah ama thu tawh kisai-in Pasian in na hong sem ahih manin kote’ thugente pen Pasian’ thu taktak ahih mah bangin kote’ thugenna na zak uh ciangin mihing’ thu bangin ngaihsun loin Pasian’ thu taktak mahin hong sang na hih manun, hih thu hangin zong Pasian’ tungah ka lungdamna uh ka ko uh hi.

1 JOHAN MASA 4:14

Pa Pasian in leitung mite a honkhia dingin a Tapa a hong paisakna thu kote in thei-in midang kiangah genbelin ka nei uh hi.

Johan 17:21

Pa aw, amaute khempeuh pumkhat a suahtheih nadingun ka hong ngetsak hi. Nangmah in kei na hong sawlna thu leitung mite in a uptheih nadingun ei tegel pawlkhat ihih mah bangin amaute zong eite tawh pawlkhat hong hi tahen.

Johan 8:42

Jesuh in, “Kei pen Pasian kiang panin hong pai-in hih lai-ah hong om ka hih manin, Pasian pen na pa taktak uh hileh kei na hong it ding uh hi. Keima thu-in a hong paitawm ka hi kei a, ama hong sawl ka hi hi.

Johan 14:10

Kei pen Pa tawh pumkhat ka hih lamtak um lo na hi hiam? Note tungah ka hong gen thute keima thu bek tawh a hong gen ka hi kei a, kei tawh a om Pa Pasian in na semin a hong gen ahi hi.

Johan 12:49

Bang hang hiam cih leh keima utthu tawh thu a mawkgen ka hi kei a, kei hong sawl Pa Pasian in ka gen ding thuteng a hong piak ahi hi.

Johan 6:68

Simon Peter in, “Topa aw, ciah le ung kua kiang zuan mawk ding ka hi uh hiam? Nangmah in nuntak tawntung nading thu na nei hi.

Paunak 1:3

A hoihin a pil gamtat theih nading, thuman, thutang, a kilawmin a gamtat theih nading.

1 THESALONIKA MASA 4:1

Tu-in sanggamte aw, Pasian’ deihna le ama lungkim nadingin bangci nuntak ding cih thu kote kiang panin na theihsa uh thute tawh kizui-in na nuntaksa uh ahih mah bangin a kicingzaw semsemin na nuntak nadingun i Topa Jesuh min tawh hong thumin ka hong hanthawn uh hi.

1 KORIN MASA 15:1

Sanggamte aw, note kiangah ka hong hilh, note in hong sangin kiptakin na let uh thu, na phawkkik ding uh ka deih hi.

Johan 17:23

Leitung mite in kei na hong sawlna thu a theih nading le kei na hong it mah bangin amaute na itna thu a theihna hangun amaute pumkhat a suah taktak theih nadingun amaute lakah kei ka om a, kei tawh nang na hong omkhawm hi.

Johan 17:18

Leitungah kei na hong sawl mah bangin kei zong leitung mahah amaute ka sawl hi.

Mattiu 13:11

Jesuh in, “Vantung ki-ukna tawh kisai thusim note tungah hong kihilh a, ahi zongin amaute tungah kihilh lo hi.

Paunak 8:10

Ngun sangin kong thuhilhnate deihzaw unla, kham hoihpen sangin thutheihna deihzaw un.

1 KORIN MASA 11:23

Bang hang hiam cih leh note kiangah ka hong gen thu pen Topa kiang panin ka ngah thu hi a, tua thu in: Topa Jesuh a kilehhek ding nitakin anlum la-in,

Johan 3:33

Ama thugen a umte pen, Pasian’ thugen man hi, ci-in a um ahi uh hi.

Johan 3:17

Pasian in leitungah a Tapa hong sawlna pen mawhsakna thukhen dingin a hong paisak hi loin, leitung mite a honkhia dingin a hong paisak hizaw hi.

Paunak 1:23

Kong thuhilhna hong ngai un; ka ngaihsutna kong gen ding a, ka theihna kong zasak ding hi.

Paunak 4:10

Ka ta aw, ka thugente limtakin zui in. Tua hileh na khansau ding hi.

Paunak 2:1

Ka ta aw, kong hilhte thei inla, kong gente mangngilh kei in.

Thu-hilhkikna 18:18

Amau sanggamte lak panin nang tawh a kibang kamsang khat amaute a dingin ka khangsak ding hi. Ama gen dingte ka hilh ding a, amah ka thupiak khempeuh amaute tungah a gen ding hi.

Johan 17:3

Nang bek a man Pasian na hihna thu le nangmah in na hong sawl Jesuh Khrih hong theihna pen amaute a dingin nuntak tawntung ngah nading lampi ahi hi.

Mangmuhna 1:1

Hih laibu pen a piang baih ding thute, Pasian’ nasemte tungah a lah dingin Pasian in Jesuh tungah a thu pia a, Jesuh in maang sungah a lah thute ahi hi. Khrih in ama vantungmi sawl a, a nasempa Johan kiangah hih thute a kilangsak hi.