Johan 14:13 - Tedim Bible

¹³ Tapa’ hangin Pasian’ pianzia a kilat theih nadingin keima min paulamin na hong nget khempeuh uh ka hong pia ding hi.

Tedim Bible Revision 2017

¹³ Tapaʼ hangin Pasianʼ pianzia a kilat theih nadingin keima min paulamin na hong nget khempeuh uh kong pia ding hi.

Johan 14:13 Referans Kwoze

Johan 15:7

Kei tawh na hong kizop uh a, note sungah ka thu a om nakleh na deih peuhpeuh uh hong ngen le-uhcin hong kipia ding hi.

Marka 11:24

Tua ahih manin note kiangah kong genin-ah: Na khat peuhpeuh na nget uh ciangin ngah ding ci-in um un; tua hileh na nget peuhpeuh uh na ngah ding uh hi.

Mattiu 21:22

Upna na neih nak-uhleh na nget peuhpeuh uh na ngah ding uh hi,” a ci hi.

Mattiu 7:7

“Ngen un; na nget uhleh hong kipia ding hi. Zong un; na zon uh leh na mu ding uh hi. Kongkhak na kiu un; na kiuh uhleh hong kihon ding hi.

1 JOHAN MASA 5:14

Eite in ama deihna tawh kituakin i nget nakleh i nget khempeuh Pasian in hong pia ding hi, ci-in kimuanna lungsim i nei hi.

Johan 16:23

“Tua hun ciangin kei kiangah bangmah nong ngen nawn kei ding uh hi. A mantakin kong genin-ah, keima min suangin na nget peuhpeuh uh Pa in hong pia ding hi.

1 JOHAN MASA 3:22

Ama thupiaknate zui-in ama lungkim nadingin gamta ihih manin ama kiang panin i nget peuhpeuh i ngah hi.

Johan 15:16

Note in kei na hong teel kei uh a, ahi zongin keimah in note ka hong teel a, note va pai-in a kimang tawntung ding gah a gah dingin ka hong seh hi. Tua ahih manin keima min suangin Pa kiangah na nget peuhpeuh uh hong pia ding hi.

Johan 14:14

Keima min paulamin na hong nget nak-uhleh ka hong pia ding hi,” a ci hi.

Jeim 5:16

Tua ahih manin na ci uh a dam nadingin khatlekhat tungah na mawhna uh kipulakin thu na kingetsak ta un. Mihoihte’ thungetna in vang nei a, na lianpi semzo hi.

Filippi 4:13

Khrih in a hong piak vangliatna tawh hihte khempeuh nawkzawh nading thahatna a nei ka hi hi.

Jeim 1:5

Pilna kisam na om uhleh Pasian kiangah ngen un. Mi khempeuh tungah Pasian dikin cingh mahmah ahih manin hong pia ding hi.

Efesa 3:12

Amah tawh i kipawlna le amah i muanna hangin kimuang takin Pasian kiangah paitheih nading hun i nei hi.

Johan 16:26

Tua hun hong tun ciangin, Pa Pasian kiangah ka hong ngetsak ding hi, ka hong ci nawn kei ding a, nomau mahmah in ka min suangin Pa kiangah na ngenpah ding uh hi.

Johan 10:30

Kei le ka Pa pumkhat ka hi uh hi,” ci-in a dawng hi.

Efesa 2:18

Khrih hangin Jew mi le Gentail mi ahi eite khempeuh, Kha Siangtho huhna tawh Pa Pasian kiangah i paithei hi.

Kolose 3:17

Na kampauna, na gamtatnate khempeuh uhah, Topa Jesuh hangin Pa Pasian tungah lungdam kohna-in Jesuh min paulamin na hih ding uh hi.

Johan 7:37

Pawi bei ni ding pen a thupi pen ni hi a, tua ni-in mihon lakah Jesuh dingin nakpitakin kiko a, “A dangtak na om uhleh ka kiangah hong pai unla tui hong dawn un.

Hebru 7:25

Tua hi a, mite a dingin a thumsak thei dingin amah nungta tawntung ahih manin ama tungtawnin Pasian kiang a zuante khempeuh, tu a kipanin a tawntungin a honkhia thei ahi hi.

Johan 14:6

Jesuh in ama kiangah, “Keimah in Lampi ka hi a, Thuman, le Nuntakna zong ka hi hi. Kei hong suang loin Pa kiangah kuamah tung thei lo ding hi.

Johan 12:44

Tua ciangin Jesuh nakpitakin kiko a, “Kei hong um khempeuh in kei bek hong um hi loin kei hong sawl pa zong a um ahi hi.

Luka 11:9

Tua ahih manin note kiangah kong cihin-ah: Ngen un; na ngah ding uh hi. Zong un; na mu ding uh hi. Kiu un; kongkhak hong kihon ding hi.

1 PETER MASA 2:5

Note zong nuntakna a piathei suangpi mah bangin kha thu tawh kisai biakinn lam nadingin na kizang unla, Jesuh Khrih hangin Pasian’ santheih biaknate a pia dingin a siangtho siampi na suak un.

Johan 5:19

Tua ahih manin Jesuh in amaute kiangah, “A mantakin gen lehang: Tapa in ama thu bek tawh bangmah sem lo a, a Pa in a sep a muhteng bek a sem ahi hi. Tua hi a, a Pa in a septeng mah a Tapa in zong a sem ahi hi.

Hebru 13:15

Tua ahih manin Jesuh tungtawnin amah i biakna-in i kam tawh ama min pulakin Pasian phat tawntung ni.

Hebru 4:15

Eite’ neih Siampi Lianpen pa in i ginat lohna-ah eite a hong hehpih thei lo ding hi lo hi; eite mah bangin ze-etna khempeuh a thuak hi a, ahi zongin mawhna a bawl lo ahi hi.

Efesa 3:14

Hih ama geelna teng ka ngaihsut ciangin, vantung a tung khinsa mite le leitungah a omlai mite khempeuh’ pianna i Pa Pasian’ mai-ah ka khukdin a,

Johan 4:14

ahi zongin keima piak ding tui a dawn khempeuh dangtak kik nawn lo ding uh hi. Tua ka piak tui a dawnte sungah nuntakna tuinak piang ding a, a nungtasak paisuak ding hi,” a ci hi.

Johan 4:10

Jesuh in, “Pasian’ hong piaktheih dingte le tuidawn ding hong ngen pa theitel hi lecin, ama kiang pan tui a ngen ding na hizaw a, amah in nuntakna tui nang hong pia ding hi,” a ci hi.

Johan 16:7

A taktakin ci lehang, kei paikhia kei leng note hong Huh ding pa hong pai lo ding a, kei paikhia leng note hong Huh ding pa hong sawl ding ka hih manin kei va paikhia leng note a dingin hoihzaw tham hi.

Johan 13:31

Judas a paikhiat khit ciangin Jesuh in, “Tu-in Mihing Tapa in Pasian’ pianzia a neihna hong kilang ding hita hi; ama hangin Pasian in minthanna a ngah ding ahi hi.

1 KORIN MASA 14:13

Tua ahih manin pau lamdang a paute in, amau paute a khiatna a gen theih nading uh siamna a neih nadingun thu ngen ta uh hen.