Joel 2:27 - Tedim Bible

²⁷ Tua ciangin no Israel mite lakah kei ka omna thu, keimah Topa pen note’ Pasian ka hihna thu, kei simloh kuamah dang a om lohna na thei ding uh hi. Ka mite hong kisimmawh nawn lo ding hi.

Tedim Bible Revision 2017

²⁷ Tua ciangin no Israel mite lakah kei ka omna thu, keimah Topa pen noteʼ Pasian ka hihna thu, kei sim loh kuamah dang a om lohna na thei ding uh hi. Ka mite hong kisimmawh nawn lo ding hi.

Joel 2:27 Referans Kwoze

Zefaniah 3:17

Topa na Pasian un note hong ompih a, ama vangliatna in hong gualzosak hi. Note tungah Topa lungkim ding a, ama hong itna tawh hong thakbawl ding hi. Note’ hangin Topa lungdamin la sa ding a,

Isaiah 45:5

“Kei pen Topa ka hi hi. Kuamah dang om lo a, keimah simloh Pasian dang om lo hi. Nisuahna lam pan hitaleh, nitumna lam pan hitaleh, kei simloh adang a om lohna thu mite in a theih nadingin, nong theih loh hangin a kisam thahatna nang ka hong guan hi. Kei pen Topa ka hi a, adang kuamah om lo hi.

Joel 3:17

Tua ciangin Topa in, “Israel-te aw, ka mual siangtho Zion tungah a teng keimah pen Topa note’ Pasian ka hihna na hong thei ding uh hi. Jerusalem pen a siangtho biakna khuapi hi ding a, gamdang mite in zokik nawn lo ding uh hi.

Ezekiel 39:28

Tua ciangin, minam dangte’ khut sungah salin amaute puakin, tua khit ciangin amaute khat zong siit loin kaikhawm kikin a gam sung uh ka tunpih kimna hangin amaute’ Topa Pasian ka hihna thu, keima mite in hong thei ding uh hi.

Joel 2:26

Tu-in nek ding tampi nei-in na gil uh vah ding a, note a dingin a lamdang nate a hong bawlsak Topa na Pasian uh na phat ding uh hi. Tua ciangin ka mite hong kisimmawh nawn lo ding hi.

Late 46:5

Ama laizangah Pasian om a, amah a kiling kei ding hi. Pasian in phalvak tungin amah huh ding hi.

Thu-hilhkikna 23:14

Bang hang hiam cih leh note hong hon ding le note’ mai-a na galte uh a hong pia dingin Topa na Pasian uh na giahphual laizang uhah hong pai hi. Tua ahih ciangin note lakah a kilawm lo nate a muh loh nading le note kiang panin amah a paikhiat loh nadingin na giahphual uh siangtho ding hi.

Isaiah 12:6

Zion-a teng mite aw, nomau’ lakah Israel-te’ Siangtho Pa lianin om ahih manin lungdamin awng unla, lungdamin la sa un,” a cih hun uh hong tung ding hi.

Mangmuhna 21:3

Tokhom panin nakpitakin awging khat ka za a, “Tu-in Pasian omna inn pen mite tawh omkhawm ta hi. Pasian in amaute ompih ding a, amaute pen ama mite hi ding uh hi. Pasian mahmah amaute tawh omkhawm ding a, amah pen amaute’ Pasian hi ding hi.

1 PETER MASA 2:6

Bang hang hiam cih leh Lai Siangtho sungah, “A manpha suang khat ka teelkhia a, innkiu suang dingin Zion-ah ka koih hi. Amah a umte, zahhuai ngei lo ding hi,” ci-in na kigen hi.

Late 68:18

Topa nangmah Pasian tua munah na om theih nadingin a sangna-ah kahto-in salte na paipih a, mihonte le mi lehdote’ tung nangawn panin piakkhong nate na ngah hi.

2 KORIN NIHNA 6:16

Pasian’ biakinn le lawkite’ milim bangci kilem theih ding ahi hiam? Bang hang hiam cih leh Pasian in, “Ka mite lakah tengin amaute tawh ka omkhawm ding hi. Kei pen amaute’ Pasian ka hi ding a, amaute, keima mi ahi ding uh hi.

Ezekiel 39:22

Tua khit a kipanin amaute’ Topa Pasian ka hihna thu, Israel mite in hong thei ding uh hi.

Isaiah 53:6

Eite khempeuh in tuu bangin lam i khial khin a, eite khempeuh eimau san ciatah i pai khin hi. Topa in eite khempeuh’ mawhnate ama tungah a suan hi.

Isaiah 45:18

Vantungte a piangsak pa (amah Pasian!) Leitung piangsakin a bawl pa (a kipsak pa; a awngthawl dingin bawl loin, ten nadingin leitung a piangsak pa!) Topa in hih bangin ci hi: “Kei pen Topa ka hi a, kuamah dang om lo hi.

Isaiah 44:8

Lau kei unla, kihta kei un. Tanglai pek panin note kiangah hong genin hong pulak khin hi lo ka hi hiam? Note khempeuh keima teci na hi uh hi. Kei simloh pasian dang om ahi hiam? Suangpi dang om lo hi. Khat beek ka thei kei hi,” a ci hi.

Isaiah 49:23

Kumpite pen nang hong kem na pate hong hi ding a, kumpinute pen nang hong khoi na nute hong hi ding hi. Amaute in a maitang uh leilak ngatin nang kiangah hong kun ding uh a, na khe-a leivui baangte a liak ding uh hi. Tua ciangin kei pen Topa ka hihna na hong thei ding hi. Kei hong muangte maizum lo ding hi,” a ci hi.

Ezekiel 37:6

Thagui le sazang kong guan ding a, vun tawh kong tuam ding hi. Tua ciangin na sung uhah hu hong guan in kong nungtasakkik ding hi. Tua ciangin Topa ka hihna nong thei ding uh hi, ci-in gen in,” hong ci hi.

Zefaniah 3:11

Tua hun ciangin ka mite in kei nong lehdona hangun maizumna ding bangmah om nawn lo ding hi. Note lak panin a kiphasak, a kihisak mite ka hawlkhia ding a, Jerusalem khua-a ka mual siangtho tungah kei nong lehdo nawn kei ding uh hi.

Gamlak-vakna 11:29

Ahih hangin Moses in ama kiangah, “Keima tangin hong hazatsak na hi hiam? Topa’ mi khempeuh kamsang hi hen la, Topa in amau’ sungah ama Kha guan leh ka cih laitak hi,” a ci hi.

Gamlak-vakna 23:21

Amah in Jakob mite tungah mawhna mu lo a, Israel mite tungah gamtatsiatna mu lo hi. Topa amau’ Pasian, amaute tawh om a, kumpipa phatna awging amaute’ lakah om hi.

Paunak 1:23

Kong thuhilhna hong ngai un; ka ngaihsutna kong gen ding a, ka theihna kong zasak ding hi.

Isaiah 44:3

“Bang hang hiam cih leh a dangtak leitang tungah tui ka sung ding a, lei keu tungah luitui ka luangsak ding hi. Na suanlekhakte tungah ka kha ka sung ding a, na tu na tate tungah ka thupha ka pia ding hi.

Isaiah 46:9

Hun lui thute phawk un; bang hang hiam cih leh kei pen Pasian ka hi a, adang om lo hi. Kei pen Pasian ka hi a, kei tawh a kibang adang om lo hi.

Ezekiel 39:29

Israel mite tungah ka kha ka sung ding a, amaute ka nungngat nawn kei ding hi. Topa Pasian in hih thu ka gen khin hi,” hong ci hi.

Zekhariah 2:9

Topa mahmah in note hong su ding a, nidanga note’ na hong sepsak mite in tu-in note’ nate hong lehsuh kik ding uh hi, hong cisak hi. Hih bangin thu hong pian’ ciangin Vanglian Topa in kei hong sawl ahih lamtak na thei ding uh hi.