Jeremiah 6:26 - Tedim Bible

²⁶ Topa in, “Ka mite’ tanu aw, puanhampi silh inla, vut lakah kikhuk in. Tapa khat neihsun a si bangin kap vangvang in. Bang hang hiam cih leh a hong susia ding pa thakhatin hong tung ding hi.

Tedim Bible Revision 2017

²⁶ Topa in, “Ka miteʼ tanu aw, puanhampi silh inla, vut lakah kikhuk in. Tapa khat neihsun a si bangin kap vangvang in. Bang hang hiam cih leh a hong susia ding pa thakhatin hong tung ding hi.

Jeremiah 6:26 Referans Kwoze

Zekhariah 12:10

“David’ suanlekhakte le Jerusalem khuamite’ tungah hehpihna lungsim le thungetna lungsim ka guan ding hi. Amaute in a sutlup uh mipa enin, ta khat neihsun a sihsuah mite bangin kap ding uh a, tacil a khuaisuahte bangin nakpitakin kapin thum ding uh hi.

Jeremiah 4:8

Tua ahih manin puanhampi silhin tau-in kap un. Bang hang hiam cih leh Topa’ hehna lauhuaipi eite’ kiang panin kiheikhia nai lo hi.

Jeim 5:1

A haute aw, tu-in ka thugen hong ngai dih un. Note tungah a hong tung ding lungkhamna hangin kapin thum un.

Jeim 4:9

Dahin, thumin, kap un. Na nuihnate uh kahna suaksak zaw unla, na lungdamnate uh maigumna suaksak zaw un.

Luka 7:12

Tua khua kulhkongpi a tun laitakun misi vui-a hong pai mihon tawh a kituak uh hi. A misi pen meigong khat’ tapa khat neihsun hi a, tua khuasung mihon tampite in tua si vuina-ah meigongnu hong zui uh hi.

Amos 8:10

Na lungdam pawite uh dahna ka suaksak ding a, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun pen a tawp dongin nasia semsem ding hi.

Kah la 4:10

Ka mite a cihmawh laitakun, itna a nei nupite nangawn in, a tanote uh go-in beel sungah a huan uh hi.

Kah la 4:6

Jerusalem’ mawhna Sodom khuapi’ mawhna sangin lianzaw ahih manin, thakhatin Pasian’ khutsung pan kisiatna a ngah uh hi.

Kah la 4:3

Keivom nangawn in zong a note itin a nawi pia thei buang napi, ka mite in vasa-kalaoh bangin a tanote a sugawp hi.

Kah la 3:48

Ka mite a kisiat manin ka khitui hawktui luang a bang hi.

Kah la 2:11

Ka kahkahna-in ka mit paatgawp ta a, ka lungsim gim lua mahmah hi. Ka mite a kisiatna hangin dahin husamin ka bahgawp hi. Naupangte le nungakte kongzing lakah sibup uh hi.

Kah la 1:16

Tua ahih manin ka mit pan khitui a dimletin a luang hi. Hong hehnem ding le a hong hanthawn ding kuamah om lo hi. Galte in hong zo khin a, ka mite a cimawh uh hi.

Kah la 1:2

Amah zan khuavakin kap a, a khitui a biang tungah a tak kauhkauh hi. Amah a it ngeite khempeuh a hehnem ding khat beek a om nawn kei hi. A kipawlpihte khempeuh in amah khemin, tu-in a langpan’ khinta uh hi.

Jeremiah 15:8

Tuipi a sehnel omzah sangin nupi meigong ka tamsakzaw ding hi. Na tangvalte uh a khan laitakin ka that ding a, a nute uh ka lunggimsak ding hi. Note’ tungah thakhat thu-in lungkhamna le launa ka hong tungsak ding hi.

Jeremiah 14:17

Tua ciangin Topa in kei tungah thu hong gen a, “Jeremiah aw, amaute kiangah, ‘Sun le zanin ka khitui luangluang hen la, kang ngei kei tahen. Bang hang hiam cih leh keima mite in nakpitakin liamna thuak uh a, nakpitakin a kisat uh hi.

Jeremiah 13:17

Ahih hangin ka thu nong ngaih kei uhleh na kisaktheihna uh hangin ka kapsim ding a, khitui luangin nakpitakin ka kidik ding hi. Bang hang hiam cih leh Topa’ tuuhonte sal dingin kikaikhia zo hi.

Jeremiah 12:12

Sehnel gam mualsang panin a susia dingte hong paizo uh hi. Gammong khat panin gammong khat dongah a lungmuang kuamah om lo hi. Bang hang hiam cih leh Topa’ namsau in mi khempeuh a vattuk hi.

Jeremiah 9:10

“Mualte a dingin kapin tau unla, gamlak lonona munte a dingin thumin tau un. Bang hang hiam cih leh tuate keu gawp a, kuamah pai nawn lo hi. Bawng ham zong kiza nawn lo a, vana leeng vasate le gamsate a taimangta uh hi.

Jeremiah 8:21

Ka mite’ thuakna hangin ka lungsim kisia a, lungkham lua-in ka kap hi.

Jeremiah 8:19

Ngai un, gam sung mun khempeuhah ka mite’ tanute kap uh a, “Zion khua-ah Topa om nawn lo ahi hiam? A kumpipa uh om nawn lo ahi hiam?” a ci uh hi. Topa in dawngkik a, “Bang hangin milim bawltawmte le a gamdang milimte uh tawh kei hong hehsak ahi uh hiam?” a ci hi.

Jeremiah 6:14

Amaute in ka mite’ thuaknate thupi simsak lo uh a, hoihna om keei lopi, ‘Hoih hi, hoih hi,’ ci mawkmawk uh hi.

Jeremiah 4:20

Siatna khat khit ciangin adang khat hong tung a, gam sung khempeuh kisia khinta hi. Thakhat thu-in ka bukte hong kisuksiatsak a, ka puankhaite kikekgawp hi.

Jeremiah 4:11

Tua hun ciangin hih mite le Jerusalem khua mite kiangah, “A sa mahmah huih, sehnel gam a sang mun panin ka mite tungah hong nung ding a, tua huih pen anvaite a zapsiang dingin a nung huih bang hi lo hi.

Isaiah 32:11

Nuamtakin a om hithiat numeite aw, ling un. Nomau tumtakin a lungkimte aw, linglawng un. Na puan uh hawkkhia-in na tangguakun om unla na kawng uhah puanhampi teng un.

Isaiah 30:13

hih mawhna pen note a dingin kulh sangpi khat khangkham a, lawtkhia-in a cim dektak, theihkholh lohin a cim vat tawh kibang ding hi.

Isaiah 22:12

Tua ni ciangin Vanglian Topa Pasian in kahna le thumna, sam mettolna le puanhampi silhna a zang dingin thu hong pia hi.

Isaiah 22:4

Tua ahih ciangin keimah in, “Kei hong en kei unla, khitui tampi luangin hong kapkap sak un. Ka mi tampi a sihna hangin keimah hehnep ding hong hanciam kei un,” ka ci hi.

Piancilna 21:16

Tua ciangin amah pai-in a hoihkhop khat a gamla, thallot khat tan bangah a ta nungngatin a tusuk hi. Bang hang hiam cih leh amah in, “Naupang’ sih hong musak kei in,” a ci hi. Amah nungngatin a tut laitakin naupang nakpi-in a kap hi.

JOB (Job) 2:8

Tua ciangin Job in beel kitam themkhat la-in tua tawh kikhuatin vut lakah a tu hi.

Jeremiah 9:1

Ka lutang tuikhuk hong hithei hen la, ka mitte khitui nak hong hithei leh ka mite’ kithahlupna hangin a sun a zanin ka kapkap ding hi.

Jeremiah 18:22

Amau a thatlum ding galkapte thakhat thu-in paisak inla, amau’ innte panin kahna aw kizasak in! Bang hang hiam cih leh ka kiat nadingin gum to uh a, ka khete a awk nadingin thang a hong siah uh hi.

Kah la 3:16

Amah in ka maitang lei-ah hong hiat a, suang tungah ka ha a hong tahtansak hi.

Jonah 3:6

Nineveh khua kumpipa in tua thu a zak ciangin a kumpi tokhom tung pan dingkhia-in a kumpi puan suahkhia a, puanhampi silhin vut lakah a tu hi.

JOB (Job) 15:21

Launa ding awging a bilah za ngitnget ding a, lungmuangin a om laitakin gutate in buluh ding hi.

Isaiah 3:24

Paknamtui tangin uihna, kawnggak tangin khauhualpi, limtak a kizem sam tangin lu kolhna, puan hoih tangin puanhampi, melhoihna tangin maizumna hun hong tung ding hi.

Jeremiah 30:5

“Topa in kong cihin-ah: Launa le patauhna aw ka za a, lungnopna aw ka za kei hi.