Jeremiah 5:6 - Tedim Bible

⁶ Tua ahih manin tulak panin humpinelkai in amaute that ding a, sehnel gam panin keivom in amaute a petgawp ding hi. Kamkei in a khuapite uh limtakin vil gige a, a pusuakkhia peuhpeuh balzan gawp ding hi. Bang hang hiam cih leh amaute’ mawhna tamlua a, hong taisan mun lua uh hi.

Tedim Bible Revision 2017

⁶ Tua ahih manin tulak panin humpinelkai in amaute that dinga, sehnel gam panin keivom in amaute a pet gawp ding hi. Kamkei in a khuapite uh limtakin vil gige a, a pusuak khia peuhpeuh balzan gawp ding hi. Bang hang hiam cih leh amauteʼ mawhna tam lua a, hong taisan mun lua uh hi.

Jeremiah 5:6 Referans Kwoze

Zefaniah 3:3

A uliante, humpinelkai gilkial bang a, a thukhente, keivom gilkial bang uh hi. Zingsang khuavak mateng a saguh nek a nusia nuam lo, a huaiham gamsate tawh kibang uh hi.

Habakkuk 1:8

“A sakolte uh kamkei sangin tai hatzaw a, keivom gilkial sangin kihtakhuai zaw hi. Gamlapi pek panin a sakol tung tuangte hong kipan uh a, a sakolte un lei-ah a khe phut uh hi. Muvanlai in sa a bawh bangin a galte a leenlak uh hi.

Jeremiah 4:7

Humpinelkai khat a bukna sawlkawm panin hong kuankhiazo a, gamte a susia ding pa hong paikhiazo hi. Na gam uh a kisiasak ding le na khuapite uhah kuamah a ten loh nadingin a susia dingin ama omna panin hong kuankhia khinzo hi.

Ezekiel 22:27

A kumpi uliante uh, a sa matsa uh a bal gawpgawp ngiahon tawh kibang uh hi. Sum ngahtheih nadingin mi that uh hi.

Mangmuhna 13:2

Tua ka muh ganhing pen kamkei tawh kibang a, a khete vom khe tawh kibang a, a kam pen humpinelkai kam tawh a kibang hi. Gulpi in tua ganhing tungah ama vangliatna, ama tokhom, le aana lianpi a pia hi.

Hosea 5:14

Humpinelkai’ sukgawp bangin Israel le Judah ka sugawp ding hi. Keimah teekteek in amaute balgawpin ka paisan ding hi. Amaute ka talkaihgawp ding a, kuamah in hon zo lo ding hi, a ci hi.

Daniel 7:6

Ka et lai leh kamkei tawh a kibang sapi dang khat ka mu hi. A nungzangah vasa kha tawh a kibang kha li a nei hi. Tua sapi in lutang li nei a, ukna aana ama tungah a kipia hi.

Daniel 7:4

A masa pen humpinelkai tawh kibang a, ahi zongin muvanlai kha tawh a kibang kha a nei hi. Ka et laitakin a kha tegel a hong kibotkhia hi. Leitung panin tua ganhing kidomkaang to-in, mihing bangin a khe nihin kidingsak a, mihing lungsim ama tungah a kipia hi.

Ezekiel 23:19

A paktatna uang semsem a, a nungak lai-in Egypt gamah a paktat mah bangin gamta niloh hi.

Ezekiel 16:25

Na melhoihna beelmang na kizutnelh hi. Na kimuhpih peuhpeuh tungah na pumpi na kipia a, a ni ni-in na paktatna na khan semsem hi.

Kah la 1:5

A galte gualzo uh a, amaute a nuaisiah gawp uh hi. Mawhna tampi a neih manun, Topa in tua bangin gimna a thuaksak hi. A mite khempeuh sila dingin a kipuakhia hi.

Jeremiah 49:19

En un, lonona-ah nuamtakin a om tuute, Jordan gam tulak panin a hong paito humpinelkai in a delhmang bangin, a gam uh nusia-in thakhat thu-in ka taimangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Keima to ahi ding kua omlai ahi hiam?

Jeremiah 30:24

A lungsim sunga a tupna teng a tangtunsak matengin, Topa’ hehna a lauhuaipi kilehkik lo ding hi. Hong pai ding hunte-ah note in na telzaw semsem ding uh hi.

Jeremiah 30:14

Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl a, nasia takin gim kong thuaksak hi.

Jeremiah 25:38

Topa’ namsau hang ahi a, a lauhuai ama hehna hang ahi zongin, amau’ gam pen gam simtham suakkhin ahih manin humpinelkai in a kua a nusiat bangin Topa in a mite nusiazo hi,” a ci hi.

Jeremiah 14:7

Ka mite in kei tungah, ‘Topa aw, ka mawhna uh kote’ langkhatah hong pang ahi ta zongin nangma min hangin kote hong hehpih in. Kote in tam veipi nang kong nungngat uh a, nangma tungah ka hong khial khinzo uh hi.

Jeremiah 2:19

Na gitlohna mah in nangmah hong thuhilh ding a, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam hetloin kha velval hi, cih thu thei inla mu in, Vanglian Topa Pasian in ka hong ci hi.

Jeremiah 2:17

Israel aw, Topa na Pasian in lampi-ah hong makaih laitakin amah na nusiat manin nang tungah hih bang teng hong tung hi lo ahi hiam?

Jeremiah 2:15

Humpinelkai bangin a galte in amah hawksan uh a, nakpitakin a hawkgawp uh hi. A gam uh gam simtham a suah uh a, a khuapite uh cimin kuamah teng lo hi.

Isaiah 59:12

Bang hang hiam cih leh nangma tungah kote’ thupalsatna tampi tak pha a, ka mawhnate un kote’ langah teci hong pang hi. Kote’ thupalsatnate, ka mawhnate uh ka thei uh hi.

Late 104:20

Nangmah in khuamial na bawl a, gamlak ganhing khempeuh a vakkhiat hun pen zan hunsung ahi hi.

Ezra 10:10

Tua ciangin siampi Ezra dingto-in amaute kiangah, “Note in gamdang numeite zi-in la-in Israel mite’ mawhna na behlap uh hi.

Ezra 9:6

“Ka biak Pasian aw, ka mawhnate un ka lu dawn dong uh hong vuknelhin vantung dong banto ahih manin nangma lam kong et ding maizumin ka mai a san hi, ka Pasian aw.

Gamlak-vakna 32:14

En un, Israel mite tungah Topa’ hehluatna a khangsakto lai dingin, na pu na pate uh’ tangin hong khang na hi uh hiam!

Late 80:13

Gamlak a om ngal in susiagawp a, zangsung sa khempeuh in kivakna-in nei uh hi.

Jeremiah 8:5

Tua ahihleh bang hangin hih mite lam khialin hong kilehkik nawn lo ahi uh hiam? Zuau pasian milimte lenkip uh a, hong kilehkik nuam lo uh hi.

Jeremiah 30:15

Bang hangin na sa-in kapkap na hi uh hiam? Na natna uh a dam thei ding hi lo hi. Na khialhnate uh lian lua-in, na mawhnate uh nasia lua ahih manin hih bangin note ka hong thuaksak hi.

2 KHANG TANGTHU NIHNATE 36:14

A makai siampite le mi khempeuh zong tua bangmahin citak lo mahmah uh a, minam dangte’ kihhuainate zui uh hi. Amah in Jerusalem-ah a siangtho-in a koih Topa’ biakinn amaute in ninsak uh hi.

JOB (Job) 10:16

Mavanna khatpeuh neisun leng zong, humpinelkai bangin ka siatna ding na zong a, kei’ gimtheih nadingin nalamdang tuamtuam nangawn na bawl liang hi.

Isaiah 1:23

Na uliante, mi lehdote hi a, gutate tawh a kikhawlte ahi hi. Mi khempeuh in sumgolh le letsong a deih uh hi. Amaute in pa nei lote panpih lo uh a, meigongnu’ thu amaute in sang lo uh hi.

Jeremiah 2:31

No Israel mite aw, Topa’ kammal limtakin ngai dih un. Israel-te a dingin gamlak tawh kibang ngei ka hi hiam? A mial mahmah gam tawh kibang ngei ka hi hiam? Tua ahihleh bang hangin ka mite in, ‘Ko ka suakta uh hi; nang kiangah kong pai nawn kei ding uh hi,’ ci uh ahi hiam?

Jeremiah 8:7

Gun vapite nangawn in a lal hun ding thei uh a, sumkuangte, phialphiahte, le gun vapite zong a hun ciangin hong tung zel uh hi. Ahih hangin ka mite in Topa’ ngeina kipte a thei kei uh hi.