Jeremiah 5:5 - Tedim Bible

⁵ Miliante kiangah pai-in ka va kiho ding uh hi. Amaute in Topa’ lampi thei uh a, amau’ Pasian’ deihna thei uh hi,” ci-in ka ngaihsun hi. Ahih hangin a vekpi-un ka uk ding nial khin uh a, ka hakkol kuaitanin ka henna khaute sutat khinzo uh hi.

Tedim Bible Revision 2017

⁵ Mi liante kiangah pai-in ka va kiho ding uh hi. Amaute in Topaʼ lampi thei uh a, amauʼ Pasianʼ deihna thei uh hi,” ci-in ka ngaihsun hi. Ahih hangin a vekpi-un ka uk ding nial khin uh a, ka hakkol kuaitanin ka henna khaute su tat khinzo uh hi.

Jeremiah 5:5 Referans Kwoze

Jeremiah 2:20

“Sawtpek lai a kipanin ka hakkol kuaitanin ka ukna nong nial a, hong kihenna khau sutatin, ‘Na na ka sem kei ding hi,’ na hong ci hi. Numei paktatte na bang uh a, mual sang tung teng le sing liim nuai tengah milim na bia kawikawi uh hi.

Luka 19:14

Ahi zongin ama gammite in hih ulianpa mudah uh ahih manin ama nungah kamtai sawl uh a, ‘Ka kumpi dingun nang kong deih kei uh hi,’ cisak uh hi.

Luka 18:24

Jesuh in ama dahna a muh ciangin, “Pasian’ Ukna sungah mihaute a lut ding bangzah takin haksa ahi hiam?

Malakhi 2:7

Siampite’ nasep pen Pasian a manin theih nading a hilh ding uh ahi hi. Amaute pen, Vanglian Topa’ kamtaite ahih manun, mite in keima deihna a theih nadingun amaute’ tungah thu a dot ding uh ahi hi.

Micah 3:11

Khuapi ukte in sumgolh ngahtheihna ding ngaihsutna bek tawh thu khen a, siampite in sum ngahtheihna ding ngaihsutna bek tawh thu gen a, kamsangte in zong sum ngahtheihna ding ngaihsutna bek mah tawh mailam thu genkhol uh hi. Tua bang hinapi-in amaute in Topa, muanin nei uh a, “Topa in eite hong ompih a, eite tungah siatna hong tung lo ding hi,” a ci uh hi.

Amos 4:1

Bashan gam bawngpi bangin a thau mahmah, mizawngte nengniamin mi cimawhte a sugawp, na pasalte uh kiangah, “Ka dawn ding bang khatpeuh hong puak in,” ci-in a vaikhak no Samaria numeite aw, hih thu limtakin ngai un:

Jeremiah 6:13

Bang hang hiam cih leh a neupen pan a lianpen dongin, thuman lopi tawh sum zongin a huaiham uh hi. Kamsangte a kipan siampite dongin thuman lo khin uh hi.

Paikhiatna 32:25

Mite a tatkhialhna Moses in a muh ciangin (bang hang hiam cih leh Aaron in amau’ maizum nadingin amau’ galte’ lakah amaute takhialsak hi),

Jeremiah 9:3

A leii uh thalpeu bangin zang uh a, zuauthu bekbek a lawn khiakhia uh hi. Gam sungah thuman om loin zuauthu bekbek a dim hi. Siatna lam manawh tektek uh a, kei hong thei lo uh hi, Topa in a ci hi.

Ezekiel 11:2

Pasian in kei kiangah, “Mihing ahi Ezekiel aw, hih mite pen khuapi sungah thu hoih lo a gen migilote ahi uh hi.

2 KHANG TANGTHU NIHNATE 36:14

A makai siampite le mi khempeuh zong tua bangmahin citak lo mahmah uh a, minam dangte’ kihhuainate zui uh hi. Amah in Jerusalem-ah a siangtho-in a koih Topa’ biakinn amaute in ninsak uh hi.

Isaiah 1:23

Na uliante, mi lehdote hi a, gutate tawh a kikhawlte ahi hi. Mi khempeuh in sumgolh le letsong a deih uh hi. Amaute in pa nei lote panpih lo uh a, meigongnu’ thu amaute in sang lo uh hi.

Jeremiah 2:31

No Israel mite aw, Topa’ kammal limtakin ngai dih un. Israel-te a dingin gamlak tawh kibang ngei ka hi hiam? A mial mahmah gam tawh kibang ngei ka hi hiam? Tua ahihleh bang hangin ka mite in, ‘Ko ka suakta uh hi; nang kiangah kong pai nawn kei ding uh hi,’ ci uh ahi hiam?

Jeremiah 8:7

Gun vapite nangawn in a lal hun ding thei uh a, sumkuangte, phialphiahte, le gun vapite zong a hun ciangin hong tung zel uh hi. Ahih hangin ka mite in Topa’ ngeina kipte a thei kei uh hi.

Jeremiah 30:14

Na lawm ngaihte un hong mangngilh khin uh a, hong don nawn lo uh hi. Bang hang hiam cih leh na khialhnate uh lian lua-in, na mawhnate uh nasia lua ahih manin, galte bangin note kong bawl a, nasia takin gim kong thuaksak hi.

Amos 6:1

Israel minamte in muanin a hong neih, i minam lakah ulian ahi, Zion-ah nuamtakin a om hithiat, Samaria-ah lungmuang takin a om note a dingin zumhuai mahmah hi.