Jeremiah 5:17 - Tedim Bible

¹⁷ Amaute in lo-a na ante uh le na an huante uh hong gaihsak ding uh a, na tapate uh le na tanute uh hong thahsak ding uh hi. Na tuuhon, na bawnghonte uh hong gaihsak ding uh a, na leenggah, na theigahte uh hong nek mangsak ding uh hi. Na muan mahmah uh kulhpi tawh a ki-um na khuapite uh namsau tawh hong suksiatsak ding uh hi.

Tedim Bible Revision 2017

¹⁷ Amaute in lo-a na ante uh le na an huante uh hong gaihsak ding uh a, na tapate uh le na tanute uh hong thahsak ding uh hi. Na tuu hon, na bawnghonte uh hong gaihsak ding uh a, na leenggah, na theigahte uh hong nek mangsak ding uh hi. Na muan mahmah uh kulhpi tawh a ki-um na khuapite uh namsau tawh hong suksiatsak ding uh hi.

Jeremiah 5:17 Referans Kwoze

Thu-hilhkikna 28:33

Na theih nai loh uh minam khat in na leitang panun a piangte le na nasepsa khempeuh uh ne tum ding a, note hong kinengniamin hong kisugawp tawntung lel ding hi.

Siampi Laibu 26:16

keimah in note tungah hih bangin kong hih ding hi: Note’ tungah hong tung dingin keimah in thakhatthu a dipkuatna, zawngkhalna, le mite siasakin nuntakna a kiamsak ding cisa natna kong tungsak ding hi. Note’ lopawi zong a mawkna hi ding hi; bang hang hiam cih leh na galte un tuate ne ding hi.

Zefaniah 3:6

Topa in hih bangin thu gen a, “A kiphasak mite ka nilkhia a, a gal panmunte uh ka susia hi. A kongzing lampite uh ka kinusiacipsak a, tua lampi kuamah in tawn nawn lo hi. A khuapi uh kisia gawpin kinusia a, a sungah kuamah om nawn lo hi.

Hosea 8:14

Bang hang hiam cih leh Israel mite in amau a Piangsak pa mangngilh uh a, inn lianpipite a lam uh hi. Judah mite in zong kulhnei khuapi tampi a lamthuah uh hi. Keimah in tua khuapite mei tawh halin a inn lianpite uh ka kangtumsak ding hi, ci hi.

Ezekiel 36:4

Tua ahih manin no Israel mualtung gamte aw, Topa Pasian ahi keimah in mual lian le mual neute, lui le guamte, a kisia-in a kinusia munte, le a kiima minam dangte in luhgawpin a ciamnuihbawl khuapite tungah ka gen thute ngai un.

Kah la 2:2

Topa in Judah gam a om khuate khempeuh hehpih loin a susia hi. Amah in a galdalna kulhpite khempeuh balzan gawpin a gam le a gam ukte a maizumsak hi.

Jeremiah 50:17

“Israel mite, humpinelkai in a delhmang tuu tawh a kibang uh hi. A masa-in Assiria kumpipa in ne a, tu-in a tawpna-ah Babylon kumpipa Nebukhadnezzar in a guh dongin a teeptum hi.

Jeremiah 50:7

Amau a mute in na ne gawp uh hi. A galte un, ‘Ko bangmah khialhna ka nei kei uh hi. Bang hang hiam cih leh a pute a pate un a muan leh a lametna uh Topa’ tungah amaute a khial uh hi,’ a ci uh hi.

Jeremiah 8:16

Leilu lam Dan khua pek panin galte’ sakol nakging kiza hi. A sakol hatte’ hamna awging in gamlelei lingsak hi. Amaute in i gam le a sunga omteng, hong susia khin ding uh hi,’ a ci ding uh hi.

Jeremiah 4:26

Ka et leh, logam leihoih teng sehnel gam suakkhin a, Topa’ mai, a hehna lianpi mai-ah, khuapi khempeuh kisia khin uh hi.

Jeremiah 4:7

Humpinelkai khat a bukna sawlkawm panin hong kuankhiazo a, gamte a susia ding pa hong paikhiazo hi. Na gam uh a kisiasak ding le na khuapite uhah kuamah a ten loh nadingin a susia dingin ama omna panin hong kuankhia khinzo hi.

Jeremiah 1:15

Bang hang hiam cih leh leilu lamah a om gam khempeuh keimah in ka sam a, amaute hong pai-in Jerusalem khua kongpite-ah ahi zongin, khua kimkota kulh kiimte-ah ahi zongin, Judah gam khuapi khempeuh kiimte-ah ahi zongin a kumpi tokhomte uh hong phut ciat ding uh hi.

Isaiah 65:22

Amaute in inn lam ding uh a, tua inn-ah midang teng, cih om nawn lo ding hi. Amaute in leenggui suanin adang khat in ne, cih om lo ding hi. Bang hang hiam cih leh keima mite’ nuntak hun pen singkung khat nuntak tan bang sawt ding a, keima teel mite in amau’ khut tawh a sepsa nate lungdamin nesuak ding uh hi.

Isaiah 62:9

Ahih hangin an a kholte in ne-in Topa na phat ding uh a, a kaikhawmte in keima biakinn huang sungah a dawn ding uh hi,” ci hi.

Isaiah 62:8

Topa in limtakin thuciamna bawl khinzo a, a vangliatna tawh tungsak ding hi. “Na galte’ an dingin na ante ka piakik nawn kei ding a, nangma sepsa leenggahzu gamdang mite in dawn nawn lo ding hi.

Jeremiah 5:18

“Ahih hangin tua bang hun ciang nangawnin, Topa in kong cihin-ah, note kong sumaimang khin sam kei ding hi.

Jeremiah 8:13

“Topa in kong cihin-ah, amaute ka susia khin ding a, a lote uhah leenggah a om nawn kei ding hi. Thei in zong gah a nei nawn kei ding hi. A tehte nangawn keu ding a, amaute ka piaksa nate a bei ding uh hi.

Jeremiah 25:37

A lauhuai mahmah Topa’ hehna hangin a nop mahmah a gam uh kisia gawp hi.

Kah la 2:12

Gilkial dangtakin nu aw, ci-in kapkap uh a, a liam a bai bangin kongzing tengah a tuk pekpak uh hi. Tua bangin damdamin a nute uh ang-ah a si uh hi.

Hosea 2:12

Ka pasal it dangte in thamanin hong piak hi, ci-in a gen a leengguite le a theikungte ka susia ding a, gamsate in tuate suksiatsakin gamlakpi a suak ding hi.

Malakhi 1:4

Esau’ suanlekhak Edom mite in, “I khuapite a kisiat khit hangin i lamkik ding hi,” ci le-uh, Topa in, “A ut uhleh lam uh hen; ahi zongin ka susia kik veve ding hi. Midangte in, ‘Gam gilo, Topa’ heh tawntungna minamte,’ ci-in ko ding uh hi,” ci-in a dawng ding hi.

Joel 2:3

A madawkte, a haltum thei meikuang bang a, a nungdalte, mei-am alh tawh kibang hi. Amau hong tun ma-in gam sung teng khempeuh Eden huan a bang hi a, amau’ khit ciangin a kinusiacip keugaw gam tawh kibang hi. Amaute kiang pan a suakta bangmah om lo hi.