Jeremiah 47:4 - Tedim Bible

⁴ Filistia mi khempeuh kisia-in, Taia le Sidon panin huhnate khaktanin, suksiat ding ni hong tungta hi. Bang hang hiam cih leh Topa keimah in Filistia mite le Kaftor tuipi gei-ah a omlaite ka susia ding hi.

Tedim Bible Revision 2017

⁴ Filistia mi khempeuh kisia-in, Taia le Sidon panin huhnate khaktanin, suksiat ding ni hong tung ta hi. Bang hang hiam cih leh Topa keimah in Filistia mite le Kaftor tuipi gei ah a omlaite ka susia ding hi.

Jeremiah 47:4 Referans Kwoze

Amos 9:7

Topa in hih bangin ci hi: Israel mite aw, Ethiopia mite tawh a kibangin note ka hong bawl a, Egypt gam panin note kong paikhiatpih bangin, Kaftor gam panin Filistia mite ka paikhiatpih a, Kir gam panin Syria mite ka paikhiatpih hi.

Isaiah 20:6

Tua ni ciangin hih tuipi gei-a teng mite in, ‘En un, eite’ lametna, Assiria kumpipa’ kiang panin eite hong honkhia dingin i belh mite’ tungah hih bang piang khinta hi. Eite bangci suahtak ding ihi hiam?’ ci ding uh hi,” a ci hi.

Thu-hilhkikna 2:23

Gaza ciang dong khuaneute-ah a teng Avvim mite ahihleh Kaftor pana hong pai Kaftor mite in susia-in amau’ munah teng uh hi.)

Hosea 9:7

Gimthuakna hun hong tungta a, thukkikna hun hong tungta hi. Tua hun ciangin Israel mite in na thei ding uh hi. Note’ mawhna hang le note in kei nong muhdahluat manun, “Hih kamsangpa mihai hi; hih thumu pa lungsim kicing lo hi,” nong ci uh hi.

Ezekiel 21:29

No Ammon mite aw, a siangtho lo, migilote, gim a tuahna ding uh a hun tungta ahih manin sumaigawp un, ci-in a hong hanthawn, na maangmuhnate uh zuaupi hi a, na ai phate uh a mawkna ahi hi.

Ezekiel 21:25

“A gilo, a siangtho lo, Israel gam uk migilo pa aw, nang’ hun zong hong tungta a, gim na tuah ding ni hita hi.

Ezekiel 7:12

A hun hong tungta a, a ni hong naita hi. Mi khempeuh tungah ka hehna hong tungta ding ahih manin sumlei sumzuak nasepnate a kimanna om nawn lo hi.

Jeremiah 46:10

“Bang hang hiam cih leh tuni pen Vanglian Topa Pasian’ ni hi a, phu a lakkik ni, a galte a thuk ni ahi hi. Namsau in amaute that ding a, a kham mateng a si uh a dawn ding hi. Bang hang hiam cih leh Vanglian Topa Pasian in Eufratis gun gei leilu lamah amaute biakna-in a nei hi.

Late 37:13

Ahih hangin Topa in migilo pa’ hun a tungta ahihlam mu ahih manin amah a nuihsan lel hi.

Luka 21:22

Bang hang hiam cih leh Lai Siangtho sungah a kigelh mah bangin, ‘Gim Piak Ni,’ ahi hi.

Ezekiel 30:8

Keimah in Egypt gam haltumin, a gam sung a hute khempeuh ka beisak khit ciangin, Topa ka hihna thu hong thei ding uh hi.

Ezekiel 25:16

Tua ahih ciangin Filistia mite simin ka beimangsakna ding thu a hong genkhia ta ka hi hi. Filistia Zanglei a a omlai mi khempeuh ka susiamang ding hi.

Isaiah 31:8

“Assiria pen mihing’ namsau ahi lo, namsau khat tawh puk ding a, mihing’ namsau ahi lo, namsau khat in susia ding hi. Namsau panin tai ding uh a, a tangvalte uh zawhthawh thu tawh nasem dingin kikoih ding hi.

Isaiah 10:3

Gimpiak ni hun, gamlapi panin huihpi hong nun’ ciangin note in bangcih ding na hi uh hiam? Huhna ngenin kua kiangah tai ding a, na neihsa uh koi lai-ah koih ding na hi uh hiam?

JOB (Job) 9:13

Pasian in ama hehna dokkik het lo mah ding hi. Rahab’ pawlte nangawn a khenuai-ah kun uh hi.

1 KHANG TANGTHU MASATE 1:12

Pathrus mite, Kasluh mite (Filistia mite’ hong pianna), le Kaftor mite’ pianna pupi ahi hi.

Joshua 22:30

Siampi Finehas le amah tawh a om mihon ukpi, Israel beh lutangte in Reuben mite, Gad mite, le Manasseh mite’ thugenna a zak uh ciangin tua thugennate in amaute lungkimsak mahmah hi.

Piancilna 10:15

Kanaan pen ama sung pan a suak masa Sidon, Heth,

Isaiah 14:31

“Filistia khuapi kongpite aw, nakpitakin kap un; khuapite aw, kiko un. Filistia mi khempeuh aw, lau-in ling un! Bang hang hiam cih leh leilu lam panin galkap honte’ hong paina leivui khu hong kitung a, tua galkapte a meidawi khat beek om lo hi,” hong ci hi.