Jeremiah 44:12 - Tedim Bible

¹² Egypt gamah a teng dingin a lungsim a khensat khin Judah mi a omlaite, a vekpi-un ka sisak khin ding hi. Egypt gamah namsau tawh kithat sakin kial tawh ka puksisak ding hi. A neupen a kipan a golpen dongin namsau le kialpi tawh a si ding uh a, mite’ lipkhap, mite in kihamsiatna-in a zat leh mite’ simmawh ka suaksak ding hi.

Tedim Bible Revision 2017

¹² Egypt gamah a teeng dingin a lungsim a khensat khin Judah mi a omlaite, a vekpi-un ka sisak khin ding hi. Egypt gamah namsau tawh kithat sakin kial tawh ka puksisak ding hi. A neu pen a kipan a gol pen dongin namsau le kialpi tawh a si ding uh a, miteʼ lipkhap, mite in kihamsiatna-in a zat leh miteʼ simmawh ka suaksak ding hi.

Jeremiah 44:12 Referans Kwoze

Jeremiah 42:22

Tua ahih manin na tennopna mun uhah namsau tawh thahna, kial le pulnatna tawh sihna na thuak ding uh hi, ci-in tu-in teltakpi-in thei ta un,” ka cithuah lai hi.

Isaiah 65:15

Keima teel mite in samsiatna-in na min uh zang ding uh a, Topa Pasian in note hong that ding hi. Ahih hangin ama nasemte pen min dang a phuah ding hi.

Hosea 4:6

Ka mite in kei hong phawk lo uh ahih manin ka susia ding hi. No siampite in kei hong phawknuam loin, ka thuhilhnate nial na hih manun ka siampi dingin kong deih nawn kei a, na tate uh zong siampi-in ka zang kei ding hi.

Jeremiah 29:22

Amaute’ hangin Judah gam panin Babylon khua-ah saltang mi khempeuh in, ‘Babylon kumpipa in Zedekiah le Ahab, a hingtangin mei sungah a hal bangin Topa in nang hong hal ta hen,’ ci-in kihamsiatna-in a zang ding uh hi.

Jeremiah 29:18

Amaute, namsau, kialpi, le pulnatna tawh ka nungdelh ding a, ka hawlkhiatna ding mun khempeuhah mite in kihamsiatna-in a zat dingun simmawhna le zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Jeremiah 18:16

Amaute’ gam pen a mulkimhuai le simmawhna tawh a kiphitsan den ding gam a suaksak uh hi. Tua gam a kantan khempeuh mulkim mahmah uh a, lamdangsa-in a lu uh a pei uh hi.

Isaiah 1:28

Ahih hangin a lehdo mite le a khial mite kisusia khawmin Topa a nusiate pen kibeimangsak ding hi.

Gamlak-vakna 5:27

Amah in a tui a dawnsak khit ciangin, tua nu amahmah kininsakin a pasal tungah thuman loin gamta ahihleh, tua tuisia pen ama sungah tumin nasak velval ding a, a pumpi pawmin a pheipi teem ding a, tua numei pen mite lakah hamsiatna-in kizang ding hi.

Jeremiah 16:4

Natna lian tawh si ding uh a, kuamah in kah loin kuamah in zong a vui kei ding uh hi. Leilak a ek ki-tha a bang lel ding uh hi. Namsau le kial tawh a si ding uh a, a luanghawmte uh huihlaka a leeng vasate le leilaka ganhingte in a ne ding uh hi.

Jeremiah 24:9

Amaute ka hawlkhiatna ding mun khempeuhah mite in kihamsiatna-in a zat dingun simmawhna le zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Jeremiah 26:6

hih Jerusalem biakinnpi Shiloh khua-a biakinn ka bawl bangin ka bawl ding a, hih khuapi pen leitung gam khempeuhte’ kihamsiatna-in ka zangsak ding hi,’ na ci ding hi,” a ci hi.

Jeremiah 42:1

Tua ciangin galkapmangte khempeuh, Kareah’ tapa Johanan, Hoshaiah’ tapa Azariah, le a neupen pan a kipan a lianpen dongin mi khempeuh hong paikhawmin

Jeremiah 44:22

Topa in na hoih lohnate uh le na bawl uh kihhuainate hangin note hong thuakzo nawn lo hi. Tua ahih manin tuni mahmahin zong na gam uh gamlak suakkhin a, mite’ kihamsiatna suakin kuamah teng nawn lo hi.

Zekhariah 8:13

A beisa hunah, Judah gammite le Israel gammite pen, minam dangte in kihamsiatna-in zang uh a, ‘Judah le Israel-te’ thuak bangin thuak un,’ kici uh hi. Ahi zongin note kong honkhia ding a, tu-in midangte in, ‘Judah le Israel bangin thupha ngah un,’ ci-in thupha kipiakna-in zang ding uh hi. Tua ahih manin na lungsim uh hangsak unla lau kei un.

Jeremiah 43:11

Amah hong pai-in Egypt gam hong simgawp ding a, pulnatna tawh a si ding mite pulnatna tawh si-in, sala mat dingte salin kimanin, namsau a si ding mite namsau tawh kithat ding uh hi.

Hosea 9:6

Lungkhamna hun hong tungin, mite na kithehthang uh ciangin, Egypt mite in note hong kaikhawm ding a, amau gam Memfis khuapi-ah vui ding bek na hi uh hi. Na inn na lote uh, kiak le lopa in khuhcip lel ding hi.