Jeremiah 4:24 - Tedim Bible

²⁴ Mualte ka et leh kiling damdam uh a, mual neute kileh kawikawi uh hi.

Tedim Bible Revision 2017

²⁴ Mualte ka et leh kiliing damdam uh a, mual neute kileh kawikawi uh hi.

Jeremiah 4:24 Referans Kwoze

Ezekiel 38:20

Ngasate le vasate, ganhing a neu a lian, le leitung a om mi khempeuh, keimah kihtakna hangin lau-in ling ding uh hi. Mualte pukin, keente cimin, kulh le phung khempeuh kicimmang ding uh hi.

Jeremiah 10:10

Ahih hangin Topa pen Pasian man hi a, amah pen a nungta Pasian le tawntung kumpipa ahi hi. A heh ciangin lei kiling a, gamte in a hehna nang zo lo hi.

Isaiah 5:25

Tua ahih ciangin Topa’ hehna ama mite tungah hong khangin, a khut zanin amaute vatgawp a, mualte a kiling hi. Amaute’ luanghawmte kongzing lampite-ah nin bangin a om hi. Hih bang teng hangin zong a hehna damzo nai loin ama khut kizanlai hi.

Micah 1:4

Meikhuk sungah khuainun a kikoih bangin ama khenuai-ah mualliante tuisuak ding a, mualtung panin tui a luangsuk bangin, guam sungah tua mualte luangsuk ding hi.

Late 97:4

Ama khuaphialepte in leitung taangsak a, leitung in mu-in a ling hi.

Late 18:7

Ama hehna hangin leitung kipumpei-in kivei a, mual bulpite zong kisingin ling damdam hi.

1 KUMPI MASATE 19:11

Tua ciangin amah in, “Paikhia inla, mualtung, Topa’ mai-ah ding in,” a ci hi. Tua ciangin Topa in hong nawk a, a lian a khauh huihpi in mualte semkhamin Topa’ mai-ah suangtumte sukham a, ahih hangin huihpi sungah Topa om lo hi. Huihpi nun’ a daih khit ciangin zin ling a, ahih hangin zinling sungah Topa om lo hi.

Habakkuk 3:10

Mual liante in nang hong muh ciangin ling uh a, van panin guah tampi hong zu hi. Leinuai-a om tuite ging zuazua a, tuihualte in a sangpipi banto hi.

Habakkuk 3:6

Amah a khawl ciangin leitung ling a, amah in a et ciangin minam khempeuh ling uh hi. Tangtawng lai-in a totsa, tanglai mual liante kitam kham a, a om tawntung mual neute kimetcip hi.

Jeremiah 8:16

Leilu lam Dan khua pek panin galte’ sakol nakging kiza hi. A sakol hatte’ hamna awging in gamlelei lingsak hi. Amaute in i gam le a sunga omteng, hong susia khin ding uh hi,’ a ci ding uh hi.

Late 77:18

Na vanging lianpi pingpei sungah omin, khuaphialepte in leitung taan a, leitang linggawpin a kising damdam hi.

Mangmuhna 6:14

Laidal a kizial bangin vanpi kizialin maimang a, mual le tuikulhte khempeuh a omna uh panin maimangta hi.

Paikhiatna 19:18

Meikhu in Sinai Mual tuamcip hi. Bang hang hiam cih leh mei sung tua mualtungah Topa a kumsuk hi. A khu, meiphualpi khu bangin kahto a, a mual buppi nakpitakin kiling hi.

Jeremiah 9:10

“Mualte a dingin kapin tau unla, gamlak lonona munte a dingin thumin tau un. Bang hang hiam cih leh tuate keu gawp a, kuamah pai nawn lo hi. Bawng ham zong kiza nawn lo a, vana leeng vasate le gamsate a taimangta uh hi.

Isaiah 13:13

Tua ahih ciangin ka sinso ni-in Vanglian Topa ka hehna hangin vantung lausakin ka lingsak ding a, ama omna panin leitung kisingkhia ding hi.

Isaiah 24:20

Leitung pumpi zukham bangin hoi ding a, huihpi’ mutgawp buk bangin awn ding hi. Ama mawhnate in nengcip gawp ding a, amah pukin thokikzo ngei nawn lo ding hi.