Jeremiah 30:21 - Tedim Bible

²¹ A kumpi ding uh amaute khat mah hi ding a, amaute a uk ding amau’ sung mah panin a piang ding hi. Keimah in amah ka kai ding a, kei kiangah amah hong pai ding hi. Tua hikeileh ama thu-in kei a hong zuan ngam ding kua om ahi hiam, Topa in kong ci hi.

Tedim Bible Revision 2017

²¹ A kumpi ding uh amaute khat mah hi dinga, amaute a uk ding amauʼ sung mah panin a piang ding hi. Keimah in amah ka kai dinga, kei kiangah amah hong pai ding hi. Tua hikeileh ama thu-in kei a hong zuan ngam ding kua om ahi hiam, Topa in kong ci hi.

Jeremiah 30:21 Referans Kwoze

Gamlak-vakna 16:5

Korah le a pawlte khempeuh kiangah, “Zing ciangin Topa in a siangtho ahi mi, ama a’ ahi mi hong lakin, ama kiangah paisak ding a, amah in a teel ding mipa ama kiangah paisak ding hi.

Ezekiel 37:24

Ka nasempa David pen amaute’ kumpi hi ding a, mi khat’ ukna nuai-ah amaute kigawmin, ka thukhamte hoihtakin zui ding uh hi.

Sawltak 5:31

Israel mite kisik kikin Pasian in a mawhna uh a maisak theih nadingin Ukpi le Honpa-in tua Jesuh bawlin ama taklamah a tusak hi.

1 JOHAN MASA 2:2

Tua Jesuh hangin eite’ mawhna hong kimaisak a, eite a’ ding bek hi loin leitung mi khempeuh’ mawhna zong a mai nading ahi hi.

Jeremiah 30:9

Topa, amau’ Pasian’ na ahi a, amaute’ kumpipa-in ka koih ding David’ na ahi zongin a semzaw ding uh hi.

2 SAMUEL NIHNA 7:13

Amah in keima min dingin biakinn khat lam ding a, keimah in ama kumpi gam tokhom a tawntungin ka kipsak ding hi.

Thu-hilhkikna 33:5

Mite’ makaite kikhawmin, Israel minamte khempeuh a kikaihkhop ciangin, ama mi Israel-te lakah Topa, kumpi a suak hi,” a ci hi.

Thu-hilhkikna 18:18

Amau sanggamte lak panin nang tawh a kibang kamsang khat amaute a dingin ka khangsak ding hi. Ama gen dingte ka hilh ding a, amah ka thupiak khempeuh amaute tungah a gen ding hi.

Piancilna 49:10

Judah in kumpi ciangkhut len tawntung ding a, a suan a khakte in zong ukna aana nei tawntung ding hi. Minam dangte in ama tungah siah puak ding a, zahtakna tawh ama mai-ah kun ding uh hi.

Mangmuhna 19:16

A puan tung le a phei tungah, “Kumpite’ Kumpi, topate’ Topa,” ci-in a min kigelh hi.

Mattiu 27:37

Tua ciangin amah a mawhsakna uh, “Hih pa, Jew mite’ Kumpi Jesuh ahi hi,” cihna lai gelhin ama lutang sanah a suang uh hi.

Mattiu 3:17

Tua sung mahin vantung panin aw khat hong ging a, “Hih pen ka it mahmah ka Tapa hi a, ama tungah ka lungkim mahmah hi,” a hong ci hi.

Mattiu 2:2

“Jew mite’ kumpi ding ahi naungek a hong suak pen koi lai-ah om ahi hiam? Nisuahna lam pan ama aksi hong suah ciangin ka mu uh a, amah a bia dingin a hong pai ka hi uh hi,” hong ci uh hi.

Jeremiah 50:44

“En un, lonona-ah nuamtakin a om tuute, Jordan gam tulak panin a hong paito humpinelkai in a delhmang bangin a gam uh nusia-in thakhat thu-in amaute ka taimangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Ka to ding kua omlai ahi hiam? Ka mai-ah kua kumpi hong ding ngam ding ahi hiam?

Jeremiah 49:19

En un, lonona-ah nuamtakin a om tuute, Jordan gam tulak panin a hong paito humpinelkai in a delhmang bangin, a gam uh nusia-in thakhat thu-in ka taimangsak ding a, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Keima to ahi ding kua omlai ahi hiam?

Piancilna 18:27

Abraham in thu gen leuleu a, “En in, leivui le vut bang ahi lel keimah in Topa’ tungah thu kong gen ngamna hong maisak in.

Hebru 1:3

Tua Tapa in Pasian’ minthanna vang hong taangkhiasak a, Pasian’ lim taktak mah hong pua-in, ama kampauna tawh leitung vantung buppi pai-in a kip hi. Mihingte a mawhna panun a siansak khit ciangin Vanglian pipa Pasian’ taklam, vantungah a tu hi.

ROM (Romans) 8:34

Tua ahih manin kua in amaute tungah thu khenthei nawn ding ahi hiam? Eite a dingin a hong thumsak pa pen Pasian’ taklamah a tu, a sih khit ciangin sihna panin a kihingkiksak Khrih Jesuh hi lo ahi hiam?

Luka 24:26

Khrih in minthanna a ngah nadingin hih bangteng a thuak ding kisam hi lo ahi hiam?” a ci hi.

Jeremiah 33:15

Tua hun ciangin David’ suan lak panin kumpi dingin a diktat mi khat ka khangsak ding a, amah in gam sungah thuman tawh thu hong khen ding hi.

Isaiah 63:1

Edom gam, Bozrah khua panin puan ausan silhin a hong pai, a puansilhna-ah minthanna mel nei-in, ama thahatna tawh a hong pai pa kua ahi hiam? A honkhiazo dingin hatna a nei, gualzawhna thu a zasak dingin a hong pai pa pen Topa ahi keimah ka hi hi.

Late 89:29

Ama suanlekhakte kumpi ka hisak ngitnget ding a, a ukna za, vantung bangin ka kipsak ding hi.

Nehemiah 7:2

ka sanggampa Hanani le biakinn a uk Hananiah in a et dingin Jerusalem ka pia hi; bang hang hiam cih leh Hananiah pen midang tampi sangin a citakzaw, Pasian a zahtakzaw khat ahi hi.

Ezra 2:2

Zerubbabel, Jeshua, Nehemiah, Seraiah, Reelaiah, Mordekai, Bilshan, Mispar, Bigvai, Rehum, le Baanah-te makai-in tua mite a ciahpih uh hi. Israel mi phazahte:

Piancilna 18:32

Tua ciangin amah in, “Topa heh kei in, hih khatvei bek thu hong gensak lai in. Tua lai-ah sawm bang kimu leh,” a ci hi. Amah in dawngin, “Sawmte’ hangin ka susia kei ding hi,” a ci hi.

Piancilna 18:30

Tua ciangin amah in, “Topa heh kei in, thu kong gen lai ding hi. Tua lai-ah sawmthum bang kimu leh,” ci hi. Amah in dawngin, “Sawmthum ka muh leh ka hih kei ding hi,” a ci hi.

Gamlak-vakna 16:40

Topa in Moses tungtawnin Eleazar tungah a gen bangin Korah le a pawlte tawh a kibang kha lo dingin, siampi ahi lo, Aaron’ suanlekhakte ahi lo mi peuhmah, Topa’ mai-ah paknamtui hal dingin a pai loh nading, Israel mite tungah phawksakna khat ahi hi.

Paikhiatna 3:5

Tua ciangin amah in, “A nai-ah hong pai kei in. Na khe panin na khedapte suahkhia in. Bang hang hiam cih leh nangma dinna mun, leitang siangtho ahi hi,” a ci hi.

Thu-hilhkikna 17:15

Topa note’ Pasian in a teel mipa note’ tungah kumpi-in na koih thei takpi ding uh hi. Ahi zongin na mipihte bek uh lak panin kumpi-in mi khat na koih ding uh a, na sanggam uh ahi lo gamdang mi khat no’ tungah na koih thei kei ding uh hi.

Late 65:4

Nangma inn-ah a om dingin na teel na lakte mi nuamsa ahi hi. Nangma biakinn siangtho, na innsunga hoihna tawh kote ka lungkim ding uh hi.

Hosea 1:11

Judah mite le Israel mite kigawmkik ding uh a, amaute a makai dingin mi khat a seh ding uh hi. Amaute khangin citheikik ding uh a, tua Jezreel hun pen a nuam mahmah hun hi ding hi.