Jeremiah 3:14 - Tedim Bible

¹⁴ Hong kileh kik un, a zulhzau ka tate aw, Topa in kong ci hi. Bang hang hiam cih leh note pen keima mite na hi uh a, khuapi khat panin mi khat, beh khat sung panin nih cih bangin hong la-in, Zion khua-ah ka hong puak ding hi.

Tedim Bible Revision 2017

¹⁴ Hong kilehkik un, a zulhzau ka tate aw, Topa in kong ci hi. Bang hang hiam cih leh note pen keima mite na hi uh a, khuapi khat panin mi khat, beh khat sung panin nih cih bangin hong la-in, Zion khua ah ka hong puak ding hi.

Jeremiah 3:14 Referans Kwoze

Jeremiah 2:19

Na gitlohna mah in nangmah hong thuhilh ding a, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam hetloin kha velval hi, cih thu thei inla mu in, Vanglian Topa Pasian in ka hong ci hi.

Jeremiah 31:32

Tua pen, a pu a pate uh, Egypt gam panin ka lakkhiat nadingin a khut uh tawh ka kaihkhiat huna ka bawl uh thuciamna tawh kibang lo ding hi. Tua hun lai-in kei amaute’ pasal hinapi-in ka thuciamna a hong palsat uh hi, Topa in kong ci hi.

Isaiah 54:5

Bang hang hiam cih leh nangmah hong Bawlpa pen nang a dingin na pasal bang hi ding a, ama min pen Vanglian Topa ahi hi. Israel-te’ Siangtho Pa pen nang hong honkhia pa hi a, amah pen leitung buppi’ Pasian a kici hi.

Jeremiah 23:3

Ka mite a omlai sunteng, ka hawlkhiatna ding gamte panin ka kaikhawmkik ding a, a gam uhah ka ciahsakkik ding hi. Amaute pungin a khang ding uh hi.

Jeremiah 3:8

A zulhzau Israel, midang tawh a khialhna hangin kimakna lai pia-in, ka hawlkhiat zong amah in a mu hi. Ahih hangin numei ginalo Judah lau tuan loin, amah zong numei paktat khat mah a va suak veve hi.

Jeremiah 2:2

“Pai inla, Jerusalem khuamite’ zak dingin va taangko in. Topa in kong cihin-ah: Na khangno lai-a nong kipiakna, na mothak lai-a nong itna, a kikho nai lo gamlakah kei’ nung nong zuih lai hun ka phawk hi.

Isaiah 10:22

Na mi Israel-te, tuipi sehnel zah a phak hangin amaute tawmkhat bek hong ciahkik ding hi. Amaute’ thuak dingin a kilawm bangin thu a kikhen ahi hi.

Isaiah 6:13

Mi sawm ah khat bang a omlai tei hangin, taak kung le tawsaw kungte a kiphuk khit ciangin a bulsum a omlaite mei tawh a kihalkik bangin amaute zong kisusia ding hi,” hong ci hi. (A bulsum pen Pasian’ mite a kipatthakna ding lahna lim ahi hi.)

ROM (Romans) 9:27

Isaiah in Israel mite’ thu a genna-ah, “Israel mite, tuipi gei-a sehnel zahin a tam hangin mi tawmno khat bek suakta ding uh hi.

Jeremiah 3:1

“Mi khat in a zi ma hen la, tua nu in zong amah nusia-in, midang khat’ zi va suak leh, a pasal masa in tua nu lakik thei ding ahi hiam? Tua gamteng a ninsak khin suak ding hi lo ahi hiam? Nang pen numei paktat suakin mi tampi tak tawh kingai khinzo napi-in, tu-in kei kiang hong zuankik ding na hi hiam, Topa in kong ci hi.

Isaiah 17:6

Oliv kung a kisin’ khit ciangin a hiang sangpen dawnah pum nih pum thum singkung hiang dawnah pum li pum nga a omlai tawh kibang lel ding hi, Israel-te’ Topa Pasian in ci hi.

Isaiah 1:9

Vanglian Topa in eite tawmno khat a nungta-in hong siit hikeileh, eite pen Sodom khua bang khinin Gomorrah khua i bang khinta ding hi.

Isaiah 31:6

Israel mite aw, nakpitakin na do pa uh’ lamah kihei kik un.

Isaiah 57:17

Amau’ huaiham-mawhna hangin ka heh mahmah a, ka hehna lungsim tawh amaute gim pia-in ka nusia hi. Ahih hangin amaute a lungsim uh khauhin, a gamtat ngei bangun gamta lai veve uh hi.

Jeremiah 3:12

Pai inla leilu lam Israel gamah hih bangin va taangko in: ‘Hong kilehkik in, a zulhzau Israel aw, Topa in kong ci hi. Hehna tawh nang kong en kei ding hi; bang hang hiam cih leh a hehpih thei pa ka hi hi, Topa in kong ci hi. Ka heh tawntung kei ding hi.

Jeremiah 29:14

Topa in kong cihin-ah, note in nong mu ding uh a, na saltanna uh hong beisakin, kong hawlkhiatna gam khempeuh le mun khempeuh panin kong kaikhawm kik ding a, note kong lakkhiatna gam mahah kong tunpih kik ding hi, Topa in kong ci hi.

Jeremiah 31:6

Bang hang hiam cih leh Efraim mualtung panin galvilte in, ‘Tho un! Topa i Pasian kiang Zion khua-ah va pai ni,’ ci-in a hong kiko hun uh hong tung ding hi,” hong ci hi.

Jeremiah 31:12

Amaute hong pai-in Zion mual tungah ngaihtakin la sa ding uh a, Topa’ hehpihna ahi, buh, leenggahzu, sathau le tuuno, bawngnote’ hangin amaute a lungdam mahmah ding uh hi. A nuntakna uh, tui a kibuak huan bang ding a, lungkham nawn lo ding uh hi.

Hosea 5:15

Ka mite in a mawhna hangun gimna thuakin kei hong zonkik mateng ka tuaci nusiat phot ding hi. A lungkham uh ciangin kei hong zong ding uh hi.

2 KHANG TANGTHU NIHNATE 30:6

Tua ahih ciangin kumpipa le a uliante kiang pana laikhakte tawh Israel khempeuh le Judah sungah laikhakte tawh pai uh a, kumpipa’ thupiakna: “Israel mite aw, Assiria kumpite’ khutsung panin a suakta, a omlai note’ lamah amah hong kiheikik theih nadingin Abraham, Isaac, le Israel Pasian, Topa’ lamah kiheikik un.

Isaiah 27:12

Israel mite aw, tua ni ciangin Eufratis gunpi panin Egypt luipi dongin Topa in thu hong khen ding a, note khat khatin hong kikaikhawm ding hi.

Isaiah 44:22

Na thupalsatnate meiipi bangin na khialhnate meiilum bangin ka phiatkhia khinzo hi. Hong honkhia khin ka hih manin kei kiangah hong ciahkik in.

Isaiah 55:7

Migilo in ama gitlohna nusia hen la, thuman lo mi in ama ngaihsutna nusia hen. Amah in a hehpih theih nadingin Topa eite’ Pasian’ kiangah amah paisak un. Bang hang hiam cih leh a mawhna maisiangsak ding hi.

Zekhariah 1:4

Na pu na pate uh bang nawn kei un. Nidanga kamsangte in amaute kiangah ka thu gen uh a, gamtatsia gamta loin, a mawh nawn loh nading hilh uh hi. Ahi zongin amaute in ka thu ngainuam loin, ka thu hong mang lo uh hi.