Jeremiah 27:18 - Tedim Bible

¹⁸ Amaute kamsang taktak ahih uh a, Topa in ka hopih taktak ahih uhleh, Topa’ biakinnpi sung, Judah kumpipa’ innsung, le Jerusalem khua sungah a kinusia lai beelte Babylon khua-ah a kipuakkhiat nawn lohna dingin Vanglian Topa kiangah hong thum uh hen.

Tedim Bible Revision 2017

¹⁸ Amaute kamsang taktak ahih uh a, Topa in ka hopih taktak ahih uh leh, Topaʼ biakinnpi sung, Judah kumpipaʼ inn sung le Jerusalem khua sungah a kinusia lai beelte Babylon khua ah a kipuakkhiat nawn loh nadingin Vanglian Topa kiangah hong thum uh hen.

Jeremiah 27:18 Referans Kwoze

1 SAMUEL MASA 7:8

Tua ciangin Israel mite in Samuel kiangah, “Filistia-te’ khutsung panin amah in eite hong hotkhiat theih nadingin Topa i Pasian’ tungah eite a dingin thunget na khawl kei in,” a ci uh hi.

Jeremiah 18:20

Hoihna pen siatna tawh a kituak ding mah ahi hiam? Keimah hong siahna-in gum a to uh hi. Nangma mai-ah kong ding a, amau a’ ding thuhoih kong gen hi. Na hehna amaute tungah na tunsak loh nadingin ka hong ngetnate hong phawk in.

1 KUMPI MASATE 18:24

Tua ciangin note in na pasian tung uhah thu ngen unla, keimah in zong Topa’ tungah thu ka ngen ding hi. Tua ciangin thungetna mei tawh hong pia pasian pen Pasian taktak ahi hi,” a ci hi. Tua ciangin mi khempeuh in dawngin, “Hih na thugen hoih hi,” a ci uh hi.

1 SAMUEL MASA 12:23

Tua tham loin kei zong, note a dingin Topa’ tungah thunget lohna tawh ka na khial het kei ding a, keimah in a hoih a man lampite note kong hilh ding hi.

1 SAMUEL MASA 12:19

Tua ciangin mi khempeuh in Samuel kiangah, “Kote ka sih loh nadingun na nasemte a dingin Topa’ tungah thu ngen in; bang hang hiam cih leh ka khialhnasate uh banah kote a dingin kumpi khat ngenin ka khialhnate uh banah hih siatna ka behlap lailai uh hi,” a ci uh hi.

Malakhi 1:9

Tua ahih ciangin no siampite aw, Pasian in eite hong hehpih theih nadingin ama kiangah thum un. Na hih ngeisa bangun na nget uh hangin na ngetnate uh hong pia lo ding hi; tua pen nomau’ khialhna ahi hi.

Ezekiel 22:30

Keimah in ka hehna tawh ka suksiat ding hun ciangin kulh a ciangzo ding, kulh a kicipna munah a cingzo ding, le gam sung a huzo ding mi khat amaute lakah ka zong a, ahi zongin tua bang ding mi khat beek ka muzo kei hi.

Ezekiel 14:14

Noah, Daniel, le Job, hih mihing thumte nangawn, amaute’ lakah a om hileh, amaute’ hoihna in amau’ nuntakna ciat bek mah suahtakzo ding uh hi, Topa Pasian in ci hi.

Jeremiah 42:2

kei kiangah, “Kong thumna uh hong ngai inla, a hong kinusia ko teng a dingin Topa na Pasian kiangah thu hong ngetsak in. Bang hang hiam cih leh khatvei lai-in mi tampi ka hih uh hangin tu-in nong muh bangin mi tawmno khat bek ka hita uh hi.

Jeremiah 15:1

Tua ciangin Topa in kei hong hopih a, “Moses le Samuel nangawn ka mai-ah hong dingin hong thum uh zongin hih mite ka hehpih tuan kei ding hi. Ka muhna panin hawlkhia unla, paikhia sak un.

Jeremiah 7:16

“Jeremiah aw, hih mite a dingin thu ngetsak kei in. Amau a dingin kapin kei’ tungah hong thumsak kei in. Bang hang hiam cih leh nong thumna kong ngai kei ding hi.

2 KHANG TANGTHU NIHNATE 32:20

Tua ciangin kumpipa Hezekiah le Amoz’ tapa, kamsang Isaiah in hih thu hangin thu ngenin vantung lamah kiko uh hi.

1 KUMPI MASATE 18:26

Tua ciangin amaute in amaute tungah a kipia bawngtal la-in bawl uh a, zingsang a kipan sun dong Baal tungah thu ngenin, “Baal aw, kote hong dawng in,” a ci uh hi. Ahih hangin awging om lo a, kuamah in dawng lo hi. Tua ciangin amau’ bawlsa biakna tau-ah amaute diang uh hi.

Piancilna 20:17

Tua ciangin Abraham in Pasian’ tungah thu ngen a, Pasian in Abimelek a damsak hi. Amaute in ta a neih theih nadingin a zi le a sila numeite zong a damsak hi.