Jeremiah 26:9 - Tedim Bible

⁹ Bang hangin, ‘Hih biakinnpi pen Shiloh tawh kibang ding a, hih khuapi-ah a teng om loin gam simtham suak ding hi,’ ci-in Topa’ minin thu hilh ngam na hi hiam?” ci-in a gen uh hi. Topa’ biakinnpi sungah a om mi khempeuh in Jeremiah a umcih uh hi.

Tedim Bible Revision 2017

⁹ Bang hangin, ‘Hih biakinnpi pen Shiloh tawh kibang dinga, hih khuapi ah a teeng om loin gam simtham suak ding hi,’ ci-in Topaʼ minin thu hilh ngam na hi hiam?” ci-in a gen uh hi. Topaʼ biakinnpi sungah a om mi khempeuh in Jeremiah a umcih uh hi.

Jeremiah 26:9 Referans Kwoze

Sawltak 22:22

Paul in Gentail mite kianga pai nading thu a gen matengin mite in limtakin a ngai uh hi. Ahi zongin tu-a thu a pulak ciangin a aw neihzah uh tawh mite kiko-in, “Leitungah hih bang mi omsak kei un! That un! A hing dingin kilawm lo!” ci-in a awng uh hi.

Sawltak 21:30

Tua ciangin hih thu in khuasung khempeuh hong zel a, mite hong tai-in hong kikhawmin Paul man uh a, biakinn pualamah kaikhia-in, biakinn kongkhakte a khakpah uh hi.

Sawltak 13:50

Ahi zongin Jew mite in tua khuasung uliante le Gentail mi numei citheite holhthawh uh a, Paul le Barnabas bawlsiat ding kipanin, tua gam panin a taikhia sak uh hi.

Sawltak 6:14

Hih Nazareth khuami Jesuh in biakinnpi phelgawpin, Moses tung pek panin a hong kipan ngeina khempeuh khelmang ding hi, ci-in a thuhilhna ka za uh hi,” a cisak uh hi.

Sawltak 5:28

“Hih mipa’ min tawh thu na hilh nawn loh nadingun khauhtakin thu kong pia uh hi. Tu-in na gamtatnasate uh thei un. Jerusalem khuasung khempeuhah thu na genthang uh a, ama sihna pen kote nong ngawh nuam uh hi,” a ci hi.

Johan 8:59

Tua bang a cih ciangin amaute in amah a den nading suang tawm uh a, ahi zongin biakinn sung panin Jesuh a gelkhia hi.

Johan 8:20

Jesuh in hih thute pen sumpi khiatna kuang a kikoihna biakinn dei sungah a gen hi a, ahi zongin ama hun tung nai lo ahih manin kuamah in amah man lo uh hi.

Marka 15:11

Ahi zongin Barabbas hong khahsak zaw in, ci-in mihonte in a nget nadingun siampite in mihonte a hanthawn uh hi.

Mattiu 27:20

Barabbas khahin Jesuh a thah nadingin Pilat kiangah a nget nadingun siampi liante le upate in mihonte a hanthawn uh hi.

Mattiu 21:23

Biakinn tual sungah Jesuh lutkik a, thuhilhin a om laitakin siampi liante le upate ama kiangah hong pai uh a, “Hih nate kua thu tawh bawl a, na bawl nading kua in aana hong pia ahi hiam?” ci-in a dot uh ciangin

Micah 2:6

Amaute in kei kiangah, “Tua bang thu hong gen kei in. Tua bang thu gen dingin kilawm lo hi. Tua bangin Pasian in hong minsiasak lo ding hi,” hong ci uh hi.

Amos 5:10

Note in thukhen zumah thutang a deih pa na mudah uh a, thuman a gen pa na hua uh hi.

Jeremiah 9:11

“Jerusalem khuapi ninkholna ka bangsak ding a, se-alte’ tenna mun ka suaksak ding hi. Judah gam khuapite gamlak ka suaksak ding a, kuamah teng nawn lo ding hi,” a ci hi.

2 KHANG TANGTHU NIHNATE 25:16

Ahih hangin amah in thu a gen laitakin kumpipa in ama kiangah, “Kumpipa tungah ngaihsutna a pia dingin nang hong koih ka hi uh hiam? Khawl in! Bang hangin nang hong kithat ding ahi hiam?” a ci hi. Tua ahih ciangin kamsangpa khawl a, ahih hangin ama kiangah, “Hih bang gamta-in ka thugenna ngai lo na hih manin Pasian in nang hong suksiat ding a lungsim a khentatna ka thei hi,” a ci hi.

Sawltak 3:11

Tua mipa in Peter le Johan beel cinten a, mi khempeuh in hih thupiang lamdangsa uh ahih manin amaute’ omna Solomon’ Talap a kici-ah mite a hong tai uh hi.

Sawltak 5:12

Sawltakte in mite lakah lim le nalamdang tampi a bawl uh hi. Thu um mi khempeuh Solomon’ Talap-ah kikhawmin a om uh hi.

Joshua 18:1

Tua ciangin Israel mihon buppi Shiloh-ah kikhawmin tua lai-ah kikhopna buk lam uh a, amaute’ mai-ah gam zawhsa-in om hi.

Jeremiah 32:3

Bang hang hiam cih leh Judah kumpipa Zedekiah in ama kiangah, “Bang hangin nangmah in thu genkhol a, ‘Topa in a cihin-ah: En un, hih khuapi, Babylon kumpipa’ khut sungah ka pia ding a, amah in a la ding hi.

Jeremiah 33:10

“Topa in kong cihin-ah, note in, ‘Hih munah mihing, ganhing om loin mundai suak hi,’ ci-in na gen uh mah bangin Judah gam khuapite le Jerusalem khua kongzingte awng a, mihing ganhing kuamah a teng kei hi.

Jeremiah 36:29

Judah kumpipa Jehoiakim’ thu tawh kisai-in hih bangin ama kiangah va gen in: ‘Topa in hong genin-ah: Nangmah in, “Jeremiah aw, bang hangin Babylon kumpipa hong pai taktakin hih gam hong susia ding a, mihing le ganhing a tengsak nawn kei ding hi, ci-in hih lai sungah at na hi hiam?” ci-in na gen a, tua laizial na haltum hi.

Kah la 4:13

Kamsangte le siampite in mawhna a bawl manun mi siangtho midikte’ sihna a hong piang ahi hi.