Jeremiah 23:2 - Tedim Bible

² Tua ahih manin ka mipihte a kem gam ukte tawh kisai-in Topa, Israel mite’ Pasian in hong genin-ah, “Note in ka mite kikhenthang sakin na hawlkhiamang uh a, amaute na don kei uh hi. En un, Topa in kong cihin-ah, na gamtatsiate uh hangin gim kong pia ding hi.

Tedim Bible Revision 2017

² Tua ahih manin ka mipihte a kem gam ukte tawh kisai-in Topa, Israel miteʼ Pasian in hong genin ah, “Note in ka mite kikhenthang sakin na hawl khia mang uh a, amaute na don kei uh hi. En un, Topa in kong cih in ah, na gamtat siate uh hangin gim kong pia ding hi.

Jeremiah 23:2 Referans Kwoze

Micah 7:4

Amaute lakah a hoihpenin a kineite, lingkung bang hi a, a thutang pena kineite, ling hiam bang hi lel uh hi. Pasian in amaute a hilhkholh bangin, gim a piak ding hun hong tungta a, a lungman’ hun ding uh hong hita hi.

Paikhiatna 32:34

Ahih hangin tu-in pai in; nang’ tunga kong gensa munah mite paipih in. En in, na mai-ah ka vantungmi pai ding hi. Ahi zongin ka thukkik ni ciangin amau’ khialhna amau’ tungah ka thuk ding hi,” a ci hi.

Jeremiah 23:34

Kamsang khat, ahih kei leh siampi khat, ahih kei leh ka mite khat peuhpeuh in, ‘Topa’ thugen pen vangik khat ahi hi,’ a cih leh tua mipa le a innkuanpihte khempeuh gim ka pia ding hi.

Jeim 1:27

Pa Pasian in a siangtho biakna citakin a ngaihsut thu in: Tagahte le meigong numeite a haksatna uhah hoihtakin kemin, leitung siatnate tawh kisawhkha loin siangtho takin omna ahi hi.

Mattiu 25:43

khualmi ka hih laitakin zin nong do kei uh a, puan ka neih loh laitakin puan nong guan kei uh a, ka cinat laitakin nong veh kei uh a, ka thongkiat laitakin nong hawh kei uh hi,’ a ci ding hi.

Hosea 2:13

Kei hong mangngilh tanvei sung, Baal pasian tungah paknamtui a hal tanvei sung, le a pasal it dangte tawh a kikhawl dingin a manpha kizepna a tuamtuamte tawh a kizep hun tanvei sungzah mah gim ka pia ding hi.

Jeremiah 13:21

Nangma lawm dingin na bawl mite teekteek in nang hong uk ni ciangin bang na ci ding hiam? Numei nausuakte in na a sak velval uh bangin nang zong na na sa ding hi.

Jeremiah 11:22

Vanglian Topa in, “En un, amaute gim ka pia ding hi. A tangvalte uh namsau-in si ding uh a, a tapate le a tanute uh kialin a puksi ding uh hi.

Jeremiah 8:12

Hih a kihhuai nate a sep uh ciangin a maizum beek uh hiam? Maizum beek lo uh a, kisuangthei beek lo uh hi. Tua ahih manin a site lak mahah amau zong si ding uh a, gim ka piak ni ciangin a kilawnkhia ding uh hi, Topa in kong ci hi.

Jeremiah 5:29

“Hih thute hangin amaute gim pia lo ding ka hi hiam, Topa in ka ci hi. Hih bang minam’ tungah thukkik lo ding ka hi hiam, ka ci hi.

Jeremiah 5:9

Hih thute hangin amaute gim pia lo ding ka hi hiam? Topa in ka genin-ah, hici bang minam tungah thukkik lo ding ka hi hiam?

Mattiu 25:36

puan nei loin ka om laitakin puan nong guan uh a, ka cinat laitakin nong veh uh a, ka thongkiat laitakin nong hawh uh hi,’ a ci ding hi.

Jeremiah 10:21

Bang hang hiam cih leh makaite hai khin uh a, Topa’ deihna dong lo uh hi. Tua thu hangin amaute mapai lo uh a, a mite uh kithehthang mang hi.

Jeremiah 13:17

Ahih hangin ka thu nong ngaih kei uhleh na kisaktheihna uh hangin ka kapsim ding a, khitui luangin nakpitakin ka kidik ding hi. Bang hang hiam cih leh Topa’ tuuhonte sal dingin kikaikhia zo hi.

Jeremiah 13:20

Jerusalem khua aw, khuadak inla, leilu lam panin a hong paite en dih in. Nangmah a hong kipia a hoih mahmah na tuuhonte koi-ah om ahi hiam?

Jeremiah 44:22

Topa in na hoih lohnate uh le na bawl uh kihhuainate hangin note hong thuakzo nawn lo hi. Tua ahih manin tuni mahmahin zong na gam uh gamlak suakkhin a, mite’ kihamsiatna suakin kuamah teng nawn lo hi.

Ezekiel 34:5

Tua tuute in a cing ding nei lo uh ahih manin kithehthang gawp uh a, gamsate’ an a suak lel uh hi.

Zekhariah 11:16

Ka tuuhonte a cing dingin tuucing khat ka koih a, ahi zongin ka tuu a sia dingte huh loin, a mangthangte zong loin, a liamte bawl loin, a cidamte zong an vak lo hi. Amah in tua tuu thau pente’ sate ne-in a khecinte nangawn hawkkhiatsak zawsop hi.

Jeremiah 17:10

Keimah Topa in mi khempeuh’ nuntakzia le a gamtatna tawh kizui-in a piakhia dingin ngaihsutna ka entel a, lungsim ka sittel hi,” a ci hi.

Zekhariah 10:3

Ka mi a makaite tungah ka heh suak mahmah a, amaute gim ka pia ding hi. Judah mite pen Vanglian Topa ahi keima a’ hi a, amaute limtakin kemin, ka sakol galkap thahatte a suak ding uh hi.