Jeremiah 23:10 - Tedim Bible

¹⁰ Bang hang hiam cih leh mun khempeuhah angkawmte a dim hi. Topa’ hamsiatna hangin gam sung tengah kahna dim a, gamlak lonona munte a keu mang hi. Amaute gamtatsia uh a, a vangliatna uh a man lopi-in a zang uh hi.

Tedim Bible Revision 2017

¹⁰ Bang hang hiam cih leh mun khempeuh ah angkawmte a dim hi. Topaʼ hamsiatna hangin gam sung tengah kahna dim a, gamlak lo nona munte a keu mang hi. Amaute gamtat sia uh a, a vangliatna uh a man lopi-in a zang uh hi.

Jeremiah 23:10 Referans Kwoze

Jeremiah 9:10

“Mualte a dingin kapin tau unla, gamlak lonona munte a dingin thumin tau un. Bang hang hiam cih leh tuate keu gawp a, kuamah pai nawn lo hi. Bawng ham zong kiza nawn lo a, vana leeng vasate le gamsate a taimangta uh hi.

Jeremiah 9:2

Sehnel gamlakah khawlna ding bukno khat nei thei-in ka mite nusia-in a taisan thei hi leng ka ut hi. A vekpi-un angkawm hat hi khin uh a, thuman lo kim uh hi.

Malakhi 3:5

Vanglian Topa in hih bangin ci hi: “Note tungah thukhen dingin ka hong pai ding hi; ai tawite, numei tawh a mawhte, a man lopi a teci pangte, numeite’ thaman piakna-ah khemna a zangte; meigong, tagah, le gamdang mite a zawhthawh bawlte, le kei hong zahtak lo mi khempeuhte’ langkhatah thakhatin teci pangin thu ka khen ding hi.

Isaiah 24:6

Tua ahih ciangin Topa in leitung samsiatin susia a, a tunga a teng mite in amau’ mawhna hangun a thuak uh hi. Tua ahih ciangin leitungah a teng mite tawm semsem hi.

Jeim 4:4

A citak lo mite aw, leitung tawh kipawlna pen Pasian tawh kigalneihna ahih lamtak thei lo na hi uh hiam? Leitung tawh a kipawl mite pen Pasian tawh a kigalneih dingin a kibawlbawl ahi uh hi.

Hebru 13:4

Mi khempeuh in nupa thu thupi ngaihsut uh hen la, zite pen pasalte tungah citakin, pasalte zong a zite uh tungah citak uh hen. Pasian in a thangtat mite le nulepa mawhna a gamta mite tungah thu khen ding hi.

1 TIMOTI MASA 1:10

nulepa mawhna a gamtate, palepa mawhna a bawlte, mi a gute, zuauthu a gente, mite’ siat nading thu a gente, le thuman tawh a kilehbulhin a gamta mite a dingin thukham a kibawl ahi hi.

Joel 1:10

Lo ante kisusia a, leengguite keutum hi. Oliv kungte keugaw a, lolai-ah bangmah om nawn lo ahih manin leitang lungzuangin a thum hi.

Jeremiah 14:2

“Judah gam kap a, a khuapite maimang dekdek hi. A mite in puan vom khu-in leilakah bok uh a, Jerusalem khua-a om mite’ kahna aw ging hi.

Jeremiah 7:9

Note in na gu-in, tual thatin, ang kawmin, ahi lopi kiciamin, Baal kiangah meihal biakna pia-in, na theih ngei loh uh pasian dangte delhin,

Siampi Laibu 5:1

“Mi khatpeuh teci pang dingin a kisap ciangin a muhsa a theihsa thute gen loin a ip leh, amah in tua mawhna pua ding hi.

Isaiah 5:18

Amaute in, “I muh theih nadingin amah manlang sakin, ama nasep khawlsak ni. Israel-te’ Siangtho Pa’ deihna i theih theih nadingin naisakin tungsak ni!” ci-in ganhing kaih bangin khauzen tawh mawhna kai-in, khauhualpi tawh khialhna kai uh ahih manin gimna ngah ta uh hen.

Jeremiah 9:12

Tua ciangin keimah in, “Hih thu a theitel ding mipil kua om ahi hiam? Hih thu a gentel theih nadingin Topa in kua tungah hilhtel na hi hiam? Kuamah in hih gam a kantan nawn loh nadingin bang hangin kisia-in gamlak tawh kibang ahi hiam?” ci-in ka dong hi.

Jeremiah 12:11

Pawn lak hong suahsak uh a, dahin ka kap hi. Gam sung khempeuh a kisiat khit hangin kuamah in phamawh sa lo sawnsawn uh hi.

Hosea 7:4

Amaute zuautatin citak lo uh hi. Amaute pen, mohbawl pa in a anlom meek a pawm mateng, moh emna meikhuk sunga a tawhsa, mut loh seem lohin a koih phot mei tawh kibang uh hi.

Ezra 10:18

Siampite beh lak panin Jozadak’ tapa Jeshua le a sanggamte beh sung panin Maaseiah, Eliezer, Jarib, le Gedaliah-te in gamdang numei a tenpihna kimu hi.

Jeremiah 6:13

Bang hang hiam cih leh a neupen pan a lianpen dongin, thuman lopi tawh sum zongin a huaiham uh hi. Kamsangte a kipan siampite dongin thuman lo khin uh hi.

Zefaniah 3:4

A kamsangte kihisak uh a, kamsang citak hi lo uh hi. A siampite in a siangtho nate ninsak uh a, amau angsung ding bek a khualna-un Pasian’ thukham lehhei uh hi.