Jeremiah 21:7 - Tedim Bible

⁷ Tua khit ciangin, Topa in kong cihin-ah, Judah kumpipa Zedekiah le a nasemte, le pulnatna, namsau, le kialin a si lo a nungta laiteng pen, amau’ galte le amaute a thatnuam Babylon kumpipa Nebukhadnezzar’ khut sungah ka pia ding hi. Amah in amaute namsau tawh that ding a, hehpih loin, zong a maap kei ding a, itna lungsim a nei kei ding hi,’ va ci un,” a ci hi.

Tedim Bible Revision 2017

⁷ Tua khit ciangin, Topa in kong cih in ah, Judah kumpipa Zedekiah le a nasemte le pulnatna, namsau le kialin a si lo a nungta lai teng pen, amauʼ galte le amaute a that nuam Babylon kumpipa Nebukhadnezzarʼ khut sungah ka pia ding hi. Amah in amaute namsau tawh that dinga, hehpih loin, zong a maap kei dinga, itna lungsim a nei kei ding hi,’ va ci un,” a ci hi.

Jeremiah 21:7 Referans Kwoze

Jeremiah 37:17

kumpi Zedekiah in kei hong samsak hi. Kumpipa in a inn sungah, “Topa’ hong thugen kam khat beek om lo ahi hiam?” ci-in a hong dongsim hi. Kei zong, “Om mah hi,” ka cih khit ciangin, “Babylon kumpipa’ khut sungah nang hong kipia taktak ding hi,” ci-in ka gen hi.

Ezekiel 7:9

Note kong zah kei ding a, zong kong khasiat kei ding hi. A muhdahhuai na gamtatnasate uh hangin gim a hong pia ding ka hi hi. Tua ciangin Topa ka hihna le note tungah gim a hong piapa ka hihna na thei ding uh hi.

Jeremiah 13:14

Pate le tate a kipan amaute khatlekhat ka kiphusak ding a, Topa in kong cihin-ah, hehpih lo, lainat lo, it loin ka sisak ding hi, ci hi,’ va ci in,” hong ci hi.

Ezekiel 9:10

Tua ahih manin amaute ka zah kei ding a, kuamah ka khasiat kei ding hi. Amaute’ gamtatna, amaute’ tung mah ka tusak ding hi,” hong ci hi.

Ezekiel 8:18

Tua ahih manin amaute in ka heh mahmahna thuak ding uh a, amaute zah loin, zong ka khasiat kei ding hi. Amaute in a thaneih tawpun kei kiangah thu hong nget uh hangin amaute’ thungetna ka ngai kei ding hi,” a hong ci hi.

Isaiah 47:6

Ka mite tungah ka heh a, ka luah gamh ka ninsak hi. Nangma khut sungah amaute kong pia a, nangmah in amaute na hehpih bawl kei hi. A khangham mite nangawn na ngong bawl mahmah hi.

Isaiah 27:11

A hiangte a keu ciangin kitan hi. Nupite hong pai-in mei-in cih uh hi. Hih mite in khentel theihna nei lo ahih ciangin amaute a bawlpa in amaute hehpih lo ding a, amaute a piangsak pa in amaute tungah maipha lak lo ding hi.

Jeremiah 15:5

“Kua in nang hong hehpih ding ahi hiam? Jerusalem aw, kua in nang hong kah ding ahi hiam? Kua, hong lambaangin, damlenat kitheihsakna-in hong hawh ding ahi hiam?

Jeremiah 15:9

Ta sagih a nei nupi khakham vei-in a sibup hi. Sunkimlai hinapi ama a dingin khuamial bang a, maizumna le mindaina a thuak hi. No a nungta laite na galte un namsau tawh a hong satlup dingun ka hong pia ding hi, Topa in kong ci hi,” a hong ci hi.

Jeremiah 22:25

na kihtak, nang hong thatnuamte’ khut sungah kong pia ding hi. Babylon kumpipa Nebukhadnezzar le Khaldea mite’ khut sungah nang kong pia ding hi.

Jeremiah 27:6

Tu-in hih gamte, ka nasempa ahi Babylon kumpipa Nebukhadnezzar’ khut sungah ka pia khinzo hi. Gamsate nangawn ama nasem dingin ka pia lai hi.

Jeremiah 34:3

Ama khutsung panin na suakta kei ding a, hong kimanin ama khut sungah nang hong kipia taktak ding hi. Nang le Babylon kumpipa maitang kimu-in na kiho ding uh a, Babylon khua-ah na pai ding hi.

Ezekiel 23:28

“Bang hang hiam cih leh Topa Pasian in hih bangin ci hi: Na muhdah na etsat mite’ khut sungah nang kong pia ding hi.

Jeremiah 14:12

An a tan’ uh hangin amau’ thumna ka ngai kei ding a, meihal biakna le an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisakzaw ding hi,” hong ci hi.

Jeremiah 19:7

Hih munah Judah mite le Jerusalem mite’ ngimna ka tangtungsak kei ding a, a galte uh’ namsau le a thatnuamte’ khutlumin amaute ka sisak ding hi. Amau’ luanghawmte huihlaka leeng vasate le leilak ganhingte’ an dingin ka pia ding hi.

Jeremiah 20:4

Bang hang hiam cih leh Topa in hong cihin-ah, ‘En in, keimah in nang le na lawmte’ lau nadingin nang kong bawl ding hi. Babylon kumpipa’ khut sungah Judah gam khempeuh ka pia ding hi. Amah in sal dingin amaute Babylon khua-ah paipih ding a, namsau tawh a thatlum ding hi.

Jeremiah 32:4

Judah kumpipa Zedekiah zong Khaldea mite’ khutsung pan a suakta kei ding a, Babylon kumpipa’ khut sungah a kipia taktak ding hi. Amah tawh maitang kimu-in a ki-en ding uh a, a kiho ding uh hi.

Jeremiah 36:29

Judah kumpipa Jehoiakim’ thu tawh kisai-in hih bangin ama kiangah va gen in: ‘Topa in hong genin-ah: Nangmah in, “Jeremiah aw, bang hangin Babylon kumpipa hong pai taktakin hih gam hong susia ding a, mihing le ganhing a tengsak nawn kei ding hi, ci-in hih lai sungah at na hi hiam?” ci-in na gen a, tua laizial na haltum hi.

Jeremiah 50:17

“Israel mite, humpinelkai in a delhmang tuu tawh a kibang uh hi. A masa-in Assiria kumpipa in ne a, tu-in a tawpna-ah Babylon kumpipa Nebukhadnezzar in a guh dongin a teeptum hi.

Kah la 2:20

Topa aw hong en in. Na bawlsiat mite hong en dih in. Nupite in a it mahmah uh a tate uh’ sa ne tanghial uh hi. Siampite le kamsangte in biakinnpi sung mahmahah thahna thuak uh hi.

Kah la 2:22

Kei a hong dipkuasak dingin ka galte pen pawi siim ding bangin na sam a, amaute in hong umcih uh hi. Nangma heh ni-in a suaktazo khat beek a om kei hi. Ka hawmthawh ka it ka tate a hong thahsak uh hi.