Jeremiah 21:4 - Tedim Bible

⁴ “Zedekiah kiangah hih bangin na genkik un, ‘Topa, Israel mite’ Pasian in a genin-ah: En un, khuakulhpi pualamah a hong umcih Babylon kumpipa le Khaldea mite na dona uh ahi, na khutsung uha na kep na galhiamte uh bangmahin a kimang lo ka suaksak ding a, amaute khempeuh hih khuapi laizangah kong paipih ding hi.

Tedim Bible Revision 2017

⁴ “Zedekiah kiangah hih bangin na genkik un, ‘Topa, Israel miteʼ Pasian in a genin ah: En un, khua kulhpi pua lamah a hong umcih Babylon kumpipa le Khaldea mite na dona uh ahi, na khut sung uh a na kep na galhiamte uh bangmahin a kimang lo ka suaksak dinga, amaute khempeuh hih khuapi laizang ah kong paipih ding hi.

Jeremiah 21:4 Referans Kwoze

Jeremiah 33:5

Ka hehna le ka thangpaihna tawh ka thahlup ding misi luangte tawh a kidimsak dingin Khaldea mite in a hong sim ding uh hi. Bang hang hiam cih leh khuapi sunga a om mite’ gitlohna hangin hih khuapi panin ka mai ka seel hi.

Jeremiah 32:5

Amah in Babylon khua-ah Zedekiah la ding a, ama tungah na ka sep mateng tua lai-ah om ding hi. Khaldea mite na do uh hangin na zo kei ding uh hi, Topa in hong ci hi,’ ci-in bang hangin thu hilh na hi hiam?” ci-in thong sungah a khum hi.

Isaiah 13:4

Ngai un, mihonpi lungdam bangin mualtungte ah gamlumna! Ngai un, minamte’ kumpi gamte kikhawmin a gamlumna! Vanglian Topa in galdo dingin mihon khat kaikhawm hi.

Isaiah 5:5

Tu-in, ka leenggui lo tungah ka hih ding thu note tungah kong gen ding hi. A daai ka lakhia ding a, kinemang ding hi. A gawl ka susia ding a, kituancil ding hi.

Zekhariah 14:2

Jerusalem khuapi a sim dingin Topa in minam khempeuh kaikhawm ding hi. A khuapi kila-in, a innte kiluh gawpin, a numeite zong kibuan gawp ding hi. Mi alang bang salin kipaikhiatpih ding a, adangte ahihleh kipaikhiatpih lo ding hi.

Kah la 2:7

Topa in a siangtho biakinnpi le a biakna tau deih nawn lo a, biakinn kulhpi, galte a susiasak hi. Lungdamna tawh amah i biakna munah, amaute gualzo-in a kiko uh hi.

Kah la 2:5

Topa in galte bangin Israel-te a susia hi. Amah in kulhpite le a kumpi innte a siasa-in a nusia hi. Amah in a bei thei lo dahna Judah gam sungah a tungsak hi.

Jeremiah 39:3

Jerusalem khua a kilak laitakin Nergalsharezer, Samgarnebo, galkapbu Sarsekhim le sakol galkapmang Nergalsharezer te a kipan Babylon kumpi uliante khempeuh hong pai-in kongpi laita penah hong tu uh hi.

Mattiu 22:7

Kumpipa zong heh mahmah a, a galkapte kuansakin tua mi thatte a thahsak khit ciangin a khua a haltumsak hi.

Hosea 9:12

Amaute in ta khoi mah ta le-uh zong, suanlekhak a neihtheih ma-un ka khansihsak khin ding hi. Hih mite ka nungngat ciangin amaute tungah a lungkhamhuai lianpite a tung ding hi.

Jeremiah 52:18

Tua banah, biakpiakna a kizang beelte, vutluahnate, taitehte, kuangte, sikkeute, le biakinn kikhopna-a kizang sumngo tawh a kibawl kuangte khempeuh zong a la uh hi.

Isaiah 10:4

Thongkiate’ lakah tonbucipin om ding le a kithat mite lakah sih ding bek a om hi. Hih thute khempeuh hangin ama hehna damzo nai lo a, ama khut kizanlai hi.

Jeremiah 20:4

Bang hang hiam cih leh Topa in hong cihin-ah, ‘En in, keimah in nang le na lawmte’ lau nadingin nang kong bawl ding hi. Babylon kumpipa’ khut sungah Judah gam khempeuh ka pia ding hi. Amah in sal dingin amaute Babylon khua-ah paipih ding a, namsau tawh a thatlum ding hi.

Jeremiah 21:3

Tua ciangin Jeremiah in dawngkik a,

Jeremiah 32:3

Bang hang hiam cih leh Judah kumpipa Zedekiah in ama kiangah, “Bang hangin nangmah in thu genkhol a, ‘Topa in a cihin-ah: En un, hih khuapi, Babylon kumpipa’ khut sungah ka pia ding a, amah in a la ding hi.

Jeremiah 32:24

“‘En in, khuapi lak nadingin kan a to khinzo uh hi. Namsau tawh kithahna hang, kialpi hang, le pulnatna hangin amaute a sim Khaldea mite’ khut sungah khuapi a kipia ding hi. Nong gensa bangin hong tun loh phamawh ahih manin en in, nang’ na mu ta hi.

Jeremiah 35:17

Tua ahih manin keimah Topa Vanglian Pasian in kong genin-ah: En un, Judah mite le Jerusalem khua-ah a teng mi khempeuh tungah a tung dingin ka gen khiatsa khempeuh ka tungsak ding hi. Bang hang hiam cih leh amau tungah ka gen hangin amaute in ka thu hong ngai lo uh a, amaute ka sap hangin hong dawngkik lo uh hi, ci hi, ci-in va gen in,” a hong ci hi.

Kah la 2:3

A hehna tawh Israel-te’ thahatnate hong suksiatsak gawp a, gal in a hong sim ciangin amah in eite a hong huh nuam kei hi. Meikuang tawh kibangin eite’ langah hong pang a, na khempeuh a susia hi.

Ezekiel 39:3

Tua lai mun panin na veilam khutah na tawi na thal hong betkhiatsakin, na taklam khutah na tawi na thaltangte zong kong betkhiatsak ding hi.