Jeremiah 21:10 - Tedim Bible

¹⁰ Bang hang hiam cih leh Topa in kong cihin-ah, hih khuapi hoihna ding hi lo, a siatna dingin ka lungsim ka khensat khinzo hi. Babylon kumpipa’ khut sungah ka pia ding a, amah in mei tawh a hal ding hi,’ na ci ding hi.

Tedim Bible Revision 2017

¹⁰ Bang hang hiam cih leh Topa in kong cih in ah, hih khuapi hoih nading hi lo, a siat nadingin ka lungsim ka khensat khinzo hi. Babylon kumpipaʼ khut sungah ka pia dinga, amah in mei tawh a hal ding hi,’ na ci ding hi.

Jeremiah 21:10 Referans Kwoze

Jeremiah 44:11

“Tua ahih manin Vanglian Topa, Israel mite’ Pasian in kong genin-ah: En un, note a susia dingin na langkhat uhah kei ka ding a, Judah gam khempeuh ka susia ding hi.

Amos 9:4

Galte in a sal dingin hingmat ta le-uh zong, namsau tawh a thah nadingun thu ka pia ding hi. Amaute’ hoihna ding ngaihsun hetloin, amaute suksiat ding ka sawm hi,” a ci hi.

Jeremiah 44:27

En un, amaute tungah hoihna tung loin siatna a tun nadingin keimah in ka bawl ding hi. Egypt gamah a om Judah mi khempeuh namsau le kialpi tawh si ding uh a, khat beek a suakta kei ding uh hi.

Ezekiel 15:7

gim ka pia ding hi. Mei panin khatvei a suahtak khit hangun tu-in mei in amaute kangtum ding hi. Amaute gim ka piak ciangin Topa ka hihna thu na hong thei ding hi.

Jeremiah 52:13

Amah in Topa’ biakinnpi a kipan kumpipa’ inn le Jerusalem khua-a inn lian khempeuh a hal hi.

Jeremiah 39:8

Babylon mite in kumpipa’ inn le midangte’ innte hal uh a, Jerusalem khua kulhpi a susia uh hi.

Jeremiah 38:18

Ahih hangin Babylon kumpipa’ uliante na belh kei leh Babylon kumpipa’ khut sungah hih khuapi kipia ding a, amau in mei tawh halin amaute’ khutsung pan na suakta kei ding hi,” ka ci hi.

Jeremiah 38:3

Topa in hong cihin-ah, Babylon kumpipa’ khut sungah hih khuapi kipia taktak ding a, a kila ta ding ahi hi,” ka ci hi.

Jeremiah 34:2

“Topa, Israel mite’ Pasian in kong cihin-ah: Judah kumpipa Zedekiah kiangah pai inla, hih bangin va gen in: ‘Topa in hong genin-ah: En in, keimah in Babylon kumpipa’ khut sungah hih khuapi ka pia ding a, amah in mei tawh a hal ding hi.

2 KHANG TANGTHU NIHNATE 36:19

Tua ciangin amaute in Pasian’ biakinn halin Jerusalem khua susia uh a, a kumpi inn khempeuh mei tawh halin umlebeel a manpha khempeuh a susia uh hi.

Jeremiah 38:23

Na nupite le na tate khempeuh Babylon mite kiangah kipaipih ding a, nangmahmah zong amaute’ khutsung panin na suakta kei ding hi. Babylon kumpipa in hong man ding a, hih khuapi mei tawh a kangtum ding hi,” ka ci hi.

Late 34:16

Siatna a bawl mite hih leitung panin a kiphawkna a kisuktat nadingin Topa in amaute a langpang hi.

Siampi Laibu 26:17

Keimah in note kong maisiat ding a, na galte uh mai-ah lelhna na thuak ding uh hi. Note hong mudah mite in note hong uk ding a, kuamah in note hong delh lo napi-in na tai ding uh hi.

Siampi Laibu 17:10

“Israel mite sung pan hitaleh amau’ lakah a peem khualmite sung pan hitaleh mi khat in si khat peuhpeuh a nek leh, si a ne mipa ka maisiat ding a, ama mite lak panin amah ka khenkhia ding hi.

Zekhariah 1:6

Ahi zongin ka nasem ahi kamsangte’ tungtawnin ka hilhkholhna le ka thupiaknate in note dongin hong sukhalo ding sa na hi uh hiam, ka ci hi. Tua ahih ciangin a tawpna-ah amaute kisik uh a, hih dinga ka lungsimah ka geelsa bangin amau’ gamtatna tawh kizui-in gim a pia ka hihna thu a phawk uh hi,’ ci in,” a ci hi.

Jeremiah 34:22

En un, Topa in kong cihin-ah, keimah in thu ka pia ding a, hih khuapi-ah hong paikik ding uh hi. Amaute in hih khuapi hong simin, hong la-in mei tawh hong halsak ding uh hi. Judah gam khuapite kuama’ ten lohna mun awng ka suaksak ding hi,” a hong ci hi.

Jeremiah 26:6

hih Jerusalem biakinnpi Shiloh khua-a biakinn ka bawl bangin ka bawl ding a, hih khuapi pen leitung gam khempeuhte’ kihamsiatna-in ka zangsak ding hi,’ na ci ding hi,” a ci hi.

Jeremiah 17:27

Ahih hangin ka thu nong ngaih kei uh a, Sabbath ni siangthosak loin, Jerusalem khua kongpite-ah van pua-in nong lutpih uhleh, tua kongpite ka hal ding hi. A mei in Jerusalem khua kumpi innte lawhin kangtum ding a, a mei a kiphelhzo kei ding hi,’ va ci in,” hong ci hi.

Jeremiah 33:5

Ka hehna le ka thangpaihna tawh ka thahlup ding misi luangte tawh a kidimsak dingin Khaldea mite in a hong sim ding uh hi. Bang hang hiam cih leh khuapi sunga a om mite’ gitlohna hangin hih khuapi panin ka mai ka seel hi.

Jeremiah 39:16

“Ethiopia mi Ebedmelek kiangah pai inla, ‘Vanglian Topa, Israel mite’ Pasian in hong genin-ah: En in, hih khuapi hoihna ding hi lo, a siatna ding ka gensate ka tungsak ding a, tua ni a hong tun ciangin nangmah in zong na mu ding hi.

Ezekiel 24:11

Tua ciangin a taubeel hawm mei-am tungah suangin sansak veva un. Tua hileh a kang-op ninteng kangtumin hong siangkik ding hi.

Amos 2:5

Tua ahih ciangin Judah gam sung teng ka kangtumsak ding a, Jerusalem munmuanhuai teng a kangtum ding hi.

Jeremiah 38:17

Tua ciangin keimah in Zedekiah kiangah, “Topa, Vanglian Pasian, Israel mite’ Pasian in hong genin-ah, Babylon kumpipa’ uliante na belh leh na nuntakna hong kimap ding a, hih khuapi in zong mei tawh haltumna thuak loin nang le na innkuanpihte na nungta ding uh hi.