Jeremiah 20:6 - Tedim Bible

⁶ Pashhur aw, nang le na innsung uha omte khempeuh sal dingin Babylon khua-ah na pai ding uh a, tua lai munah nang na si ding hi. Nang a kipan a man lopi a na thuhilh a ngai na lawmte khempeuh hong kivui ding uh hi,” a ci hi.

Tedim Bible Revision 2017

⁶ Pashhur aw, nang le na inn sung uh a omte khempeuh sal dingin Babylon khua ah na pai ding uh a, tua lai munah nang na si ding hi. Nang a kipan a man lopi a na thuhilh a ngai na lawmte khempeuh hong kivui ding uh hi,” a ci hi.

Jeremiah 20:6 Referans Kwoze

Kah la 2:14

Na kamsangte un zuauthu longal thudang gen ding nei lo uh a, a thuhilhna uh khemna thu bek ahih manin, a khial na hihlam uh a hong hilhtel kei uh hi. Amaute in lam hong lakkhial uh a, kisikkik theih nading hun a hong pia kei uh hi.

Ezekiel 22:28

Kulh nin kimlai leikang tui tawh a kizut kang bangin a kamsangte un hih bang mawhnate imcip uh hi. A man lopi maang mu uh a, a man lopi-in mailam thu gen uh hi. Topa ahi keimah in amaute tungah thu gen lo napi-in, Topa Pasian in hih bangin thu gen hi, ci-in zuau phuakin mite tungah thu gen uh hi.

Jeremiah 20:4

Bang hang hiam cih leh Topa in hong cihin-ah, ‘En in, keimah in nang le na lawmte’ lau nadingin nang kong bawl ding hi. Babylon kumpipa’ khut sungah Judah gam khempeuh ka pia ding hi. Amah in sal dingin amaute Babylon khua-ah paipih ding a, namsau tawh a thatlum ding hi.

Zekhariah 13:3

Mi khatpeuh kamsang a kineihlai teitei leh, a pianna a nu le a pa mahmah in kho ding uh a, ‘Topa’ min paulamin zuauthu gen na hih manin na si ding hi,’ ci ding uh hi. Tua bangin thu a gen teitei le, a nu le a pa mahmah in tem tawh sunlum ding uh hi.

Micah 2:11

Zuau genin khemna tawh thu gen kawikawi a, “Note a dingin leenggahzu le khamtheihzu tampi tak hong om ding hi,” a hong ci kamsangte pawl, note’ deih kamsangte ahi hi.

Jeremiah 29:32

Topa in kong cihin-ah: En un, keimah in Nehelam khuami Shemaiah le a suan a khakte gim ka pia ding hi. Amah in keimah hong langpanna ding thu gen ahih manin ka mite a dingin a hoih ka bawl ding nate, amah le a suan a khakte khat beek in a mu kei ding uh hi, ci-in gen in,” hong ci hi.

Jeremiah 23:32

En un, Topa in kong genin-ah, ka sawl lohpi zuau mang manin tua thu hilh a, a zuauthu uh le a kiphatsakna uh tawh ka mite lam a khialhpih mite’ langkhatah kei ka pang hi. Ka mite a dingin amaute a kimanna uh themkha beek om lo hi, Topa in kong ci hi.

Jeremiah 5:31

Kamsangte in thuman gen lo uh a, siampite in zong amau’ ut bangun a uk uh hi. Ka mite in phamawh sa lo sawnsawn uh hi. A tawpna hun hong tun ciangin bang cih ding uh ahi hiam, Topa in ci hi, ci-in gen in,” hong ci hi.

Isaiah 9:15

Upa pa le a zahtakhuai mipa pen a lutang hi a, zuauthu a hilh kamsangpa pen a mei ahi hi.

Thu-hilhkikna 28:25

“Topa in na galte uh mai-ah note hong guallelsak ding hi. Amaute a do dingin lam khatah na kuan khawm ding uh a, amau’ mai-ah lam sagihin na taikeek ding uh hi. Leitung kumpi gamte khempeuh’ muhna-ah note a cikzethuai na hi ding uh hi.

Siampi Laibu 26:17

Keimah in note kong maisiat ding a, na galte uh mai-ah lelhna na thuak ding uh hi. Note hong mudah mite in note hong uk ding a, kuamah in note hong delh lo napi-in na tai ding uh hi.

Jeremiah 20:1

Jeremiah in a gen hih thute, Immer’ tapa, Topa’ biakinn ukpa ahi siampi Pashhur in a za hi.

Jeremiah 14:13

Tua ciangin keimah in, “Ah, Topa Pasian aw, en dih in. Kamsangte in amaute kiangah, ‘Note in namsau ahi zongin, kial ahi zongin na mukha ngei kei ding uh a, hih munah Pasian in lungnopna kip hong pia ding hi,’ a ci uh hi,” ka ci hi.

Jeremiah 14:16

A hilh uh mite in zong kial le namsau thuakin amaute a kipan a zite uh, a tapate uh, le a tanute uh Jerusalem khua kongzing lakah kipaithang ding a, kuamah in a vui kei ding hi. Bang hang hiam cih leh amau’ gitlohna amau’ tung mahah ka buaksuk ding hi,” hong ci hi.