Jeremiah 2:19 - Tedim Bible

¹⁹ Na gitlohna mah in nangmah hong thuhilh ding a, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam hetloin kha velval hi, cih thu thei inla mu in, Vanglian Topa Pasian in ka hong ci hi.

Tedim Bible Revision 2017

¹⁹ Na gitlohna mah in nangmah hong thuhilh dinga, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam het loin kha velval hi, cih thu thei inla mu in, Vanglian Topa Pasian in ka hong ci hi.

Jeremiah 2:19 Referans Kwoze

Isaiah 3:9

Amau’ maiput in amau’ langah teci pang hi. Sodom bangin amaute a langtangin gamta uh a, amaute in im lo uh hi. Amaute in gimna ngah ta hen! Bang hang hiam cih leh amaute in amau’ tung mahah siatna kitun uh hi.

Jeremiah 4:18

Na lungsim le na gamtatnate’ hangin nang’ tungah hih thu hong tung hi. Hih pen nangma gitlohna hang hi a, na lungtang pailetin hong sun hi,” a ci hi.

Jeremiah 2:17

Israel aw, Topa na Pasian in lampi-ah hong makaih laitakin amah na nusiat manin nang tungah hih bang teng hong tung hi lo ahi hiam?

Late 36:1

Mawhna in migilo pa’ lungsim tawngah thu gen a, amah in Pasian zahtakna nei het lo hi.

Hosea 5:5

Israel-te’ kiphatsakna pen amau mah’ siatna ding ahi hi. Amau’ mawhna in amaute puksak ding a, Judah mite in zong pukpih ding uh hi.

Amos 8:10

Na lungdam pawite uh dahna ka suaksak ding a, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun pen a tawp dongin nasia semsem ding hi.

Hosea 11:7

Ka mite in kei kiang panin pial ding ngaihsun tawntung uh ahih manin amaute in kolbulhna thuak ding uh a, kuamah in a kol sutsak lo ding hi.

Jeremiah 5:6

Tua ahih manin tulak panin humpinelkai in amaute that ding a, sehnel gam panin keivom in amaute a petgawp ding hi. Kamkei in a khuapite uh limtakin vil gige a, a pusuakkhia peuhpeuh balzan gawp ding hi. Bang hang hiam cih leh amaute’ mawhna tamlua a, hong taisan mun lua uh hi.

ROM (Romans) 3:18

Pasian zahtak ding ngaihsutin nei lo uh hi,” ci-in a kigelh hi.

Zekhariah 7:11

Ahi zongin amaute in mang nuam het lo uh a, hih thute ngaihsutin zong nei nuam lo uh hi.

Hosea 14:1

Israel-te aw, note’ Topa Pasian’ lamah kihei kik un. Na mawhna hangun note na puk khin uh hi.

Jeremiah 8:5

Tua ahihleh bang hangin hih mite lam khialin hong kilehkik nawn lo ahi uh hiam? Zuau pasian milimte lenkip uh a, hong kilehkik nuam lo uh hi.

Hosea 4:16

A kizualsak zo lo bawngla bangin Israel mite phengphi uh ahih manin, lonona munah tuunote anvak bangin amaute bangci vak ding ka hi hiam?

Jeremiah 5:22

kei hong kihta lo na hi uh hiam, Topa in kong ci hi. Keima mai-ah ling lo na hi uh hiam? Tuipi gei-a om sehnelte keima koih hi a, tui ka dalsak tawntung hi. Tuihualte in a lawhlawh hangin zo zo lo uh a, a gin’ zuazua uh hangin kantanzo tuan lo uh hi.

Jeremiah 3:22

Topa in, “Hong kileh kik un, a zulhzau ka tate aw, na zulhzauna uh kong damsak ding hi,” a ci hi. Amaute in zong, “En in, nang kiang kong pai uh hi. Bang hang hiam cih leh Topa kote’ Pasian na hi hi.

Isaiah 50:1

Topa in, “Amah ka ciahsakna, na nu a kimakna lai koi-ah om ahi hiam? Tua ahih kei leh nang kong zuakna ka leibatnate koi pan ahi hiam? Nomau mawhna hangin note hong kizuak a, nomau khialhna hangin na nu uh kipaikhiasak hi.

Isaiah 5:5

Tu-in, ka leenggui lo tungah ka hih ding thu note tungah kong gen ding hi. A daai ka lakhia ding a, kinemang ding hi. A gawl ka susia ding a, kituancil ding hi.

Paunak 5:22

Migilo pa’ mawhna thangzak bang hi a, ama mawhna thang sung mahah amah a awk hi.

Paunak 1:31

na gamtatna bangun na thuak ding uh a, nomau’ gamtatna mah in note hong gimsak ding hi.

Paunak 1:32

Bang hang hiam cih leh thu thei lote in pilna a don loh manun sihlawh uh a, mihaite in lunghihmawhna a neih loh manun siatlawh uh hi.

Jeremiah 5:24

A lungsim sung uhah, ‘A huna guah hong zusak a, tukguah, khalguah hong pia a, anlak hun ding a hong sehsak den Topa i Pasian zahtak ni,’ a ci kei uh hi.

Ezekiel 39:24

le amaute’ nitna le a gitlohna uh tawh kituakin amaute tungah bawlin, amaute a nungngat ka hihna thu, minam dangte in thei ding uh hi,” hong ci hi.

Hosea 7:2

Amau’ gamtatsiatna khempeuh ka phawk lamtak amaute in ngaihsutin neikha lo uh hi. Amau’ mawhna in amaute gakcip a, ka muhna mahmahah om gige uh hi.

Hosea 13:9

No Israel-te kong sugawp ding hi. Kua in note hong huhzo ding ahi hiam?

Micah 1:5

Pasian’ tungah Israel-te’ mawhna le a khialhnate uh hangin hih thute khempeuh a piang ahi hi. Israel-te’ khialhna kua ngawh ding ihi hiam? Samaria mite ngawh ding ihi hiam? Judah gam sungah milim bia-in a khial kua ahi hiam? Jerusalem mite ahi hi.

Paikhiatna 33:6

Tua ahih ciangin Israel mite in Horeb Mual pan a kipanin amau’ kizepnate suahkhia uh hi.

Thukhente 10:13

Tua hinapi-in note in kei hong nusia-in pasian dangte na bia uh hi. Tua ahih ciangin note kong honkhia nawn kei ding hi.

1 KUMPI MASATE 18:18

Amah in dawngin, “Keimah in Israel mite ka lungkhamsak kei hi. Nang in Topa’ thupiaknate nusia-in Baal-te zui na hih manin nang le na pa’ innkuan in na lungkhamsak uh hi.

2 KHANG TANGTHU NIHNATE 12:5

Tua ciangin Shishak’ huhau-in Jerusalem-ah a kikhawm Rehoboam le Judah uliante kiangah kamsang Shemaiah hong pai-in amaute kiangah, “Topa in hih bangin ci hi: ‘Note in kei nong nusia uh hi. Tua ahih ciangin Shishak’ khut sungah note kong pia khin hi,’ ci hi,” a ci hi.

2 KHANG TANGTHU NIHNATE 21:10

Tua ahih ciangin tuni dongin Judah ukna panin Edom mite leengkhia hi. Amah in a pu a pate’ Pasian, Topa nusia ahih manin tua hun laitakin Libnah zong ama ukna panin a lengkhia hi.

2 KHANG TANGTHU NIHNATE 25:16

Ahih hangin amah in thu a gen laitakin kumpipa in ama kiangah, “Kumpipa tungah ngaihsutna a pia dingin nang hong koih ka hi uh hiam? Khawl in! Bang hangin nang hong kithat ding ahi hiam?” a ci hi. Tua ahih ciangin kamsangpa khawl a, ahih hangin ama kiangah, “Hih bang gamta-in ka thugenna ngai lo na hih manin Pasian in nang hong suksiat ding a lungsim a khentatna ka thei hi,” a ci hi.

Jeremiah 1:16

Ka mite in kei hong taisan uh ahih manin a mawhna uh hangin amau’ tungah thu ka khen ding hi; pasian dangte tungah meihal biakna pia uh a, a khut uh tawh a bawlsa uh milimte a bia uh hi.

Jeremiah 7:19

Topa in kong cihin-ah, tua hangin gimna a thuak, kei hi zenzen ka hi hiam? Hilo hi. Amau’ zum nadingin amau mah in a thuak uh hizaw hi lo ahi hiam?

Jeremiah 13:22

Bang hangin hih thute kei tungah hong tung ahi hiam, ci-in na ngaihsut leh na mawhna a liatluatna hang ahi hi. Tua thu hangin na nik hong kihawkgawp a, a hong kibuan gawp ahi hi.

Ezekiel 23:30

nangma tungah hih bangteng hong tungsak hi. Minam dangte tawh na paktat a, a milimte uh tawh na kininsak hi.

Hosea 9:1

Israel mite aw, midangte bangin lungdamin kipak kei un. Na Pasian uh na nusia uh a, ama tungah na citak kei uh hi. Numei paktatte bangin mun citengah Baal tungah na kizuak uh a, a hong leina ante hangin na lungdam uh hi.