Jeremiah 18:16 - Tedim Bible

¹⁶ Amaute’ gam pen a mulkimhuai le simmawhna tawh a kiphitsan den ding gam a suaksak uh hi. Tua gam a kantan khempeuh mulkim mahmah uh a, lamdangsa-in a lu uh a pei uh hi.

Tedim Bible Revision 2017

¹⁶ Amauteʼ gam pen a mulkimhuai le simmawhna tawh a kiphitsan den ding gam a suaksak uh hi. Tua gam a kantan khempeuh mulkim mahmah uh a, lamdang sa-in a lu uh a pei uh hi.

Jeremiah 18:16 Referans Kwoze

Late 22:7

Hong mu mi khempeuh in kei hong zahko-in, hong mukpiksan uh a, a lu uh hong peisan hi.

Jeremiah 25:9

en un, leilu lama om minam khempeuhte le ka nasempa ahi Babylon kumpipa Nebukhadnezzar ka vaikhak ding a, hih gam le a sunga a teng mi khempeuh le hih kiima om gam khempeuh a sim dingin ka va la ding hi. Keimah in amaute ka susia mangkhin ding a, amaute a tawntungin siacipin simmawhna ka thuaksak ding hi, ci-in Topa in kong gen hi.

Jeremiah 19:8

Hih khuapi a mulkimhuai le a simmawhhuai ka suaksak ding a, a kantan mi khempeuh in khuapi siatna hangin lamdangsa-in zahpihin a phitsan ding uh hi.

Mattiu 27:39

Tua ciangin amah a va mukha mi peuhmah in a lu uh peisanin,

Micah 6:16

Bang hang hiam cih leh Kumpi Omri’ gamtatna zui-in, ama tapa Kumpi Ahab’ sep khempeuh na sem uh a, amau’ gamtat khempeuh na zui uh hi. Tua ahih manin note kong susia ding hi. Minam dangte in note hong nuihsanin, amaute’ simmawhna na thuak ding uh hi.

Jeremiah 50:13

Topa’ hehna hangin kuamah teng lo ding a, gamlakpi a suak ding hi. Babylon khua a kantan mi khempeuh in lamdangsa-in khuapi siatna hangin zahko-in a phitsan ding uh hi.

Jeremiah 49:13

Bang hang hiam cih leh Topa in kong cihin-ah, Bozrah khua pen mite’ lipkhap ding, zahpih ding, nusiat ding le kihamsiatna-in a zat ding uh a suak ding hi,” a ci hi.

1 KUMPI MASATE 9:8

Tua ciangin hih biakinn pen ninbulomtang suak ding a, a nawkkha mi khempeuh in lamdangsa-in, eh! ci ding uh hi. Amaute in, ‘Bang hangin Topa in hih leitang le hih biakinn hih bangin hih ahi hiam?’ ci ding uh hi.

Marka 15:29

Amah a va mukha mi peuhpeuh in a lu uh singin zahpihbawl uh a, “A! Biakinn susia-in ni thum sungin a lamkik ding pa!

Isaiah 37:22

amah tawh kisai-in Topa’ thugen hih bang ahi hi: ‘Sennakherib aw, Jerusalem mite in nang hong simmawhin hong zahko uh hi. Jerusalem mite in na nungah a lu hong peisan lel uh hi.

Ezekiel 12:19

Hih bangin na gamtatna pen, amaute’ gam a omlai ahi Jerusalem khuamite tungah Topa Pasian’ thugenna ahihna thu va gen in. Amaute in launa linna tawh an ne-in tui dawn ding uh hi. Amau’ gam sungah a tengte a hoih gamtat khat beek om lo ahih manin, a gam sung uhah a om mi khempeuh kipai khiatpihmang ding hi.

Ezekiel 6:14

Keimah in ka khut zanin a gam khempeuh uh ka susia ding hi. Leitaw lam sehnel gam pan a kipanin leilu lam Riblah khuapi dongin, Israel mite’ omna mun khempeuh, siit nei loin ka vatmai ding hi. Tua ciangin Topa ka hih lamtak mi khempeuh in hong thei ding uh hi,” a hong ci hi.

Jeremiah 9:11

“Jerusalem khuapi ninkholna ka bangsak ding a, se-alte’ tenna mun ka suaksak ding hi. Judah gam khuapite gamlak ka suaksak ding a, kuamah teng nawn lo ding hi,” a ci hi.

Isaiah 6:11

Tua ciangin keimah in, “Topa aw, bang tanvei sawt ding ahi hiam?” ka ci hi. Amah in, “Khuapi-ah a teng kuamah om loin hawm suakin, innte-ah kuamah om loin, leitang pen gamkhing suak kiuhkeuhin,

Late 44:14

Minam dangte lakah a sia lama gentehna, mite lakah ciamnuih-a neihin kote na hong bawl khin hi.

Thu-hilhkikna 29:23

‘A gambup pen kaat le ci, le nin a kangtum, khai kituh lo, bangmah po lo, lopa zong a po zawh lohna mun Sodom le Gomorrah, Admah le Zeboiim bangin a kilawnthal gawp, a hehna le a sinsona tawh Topa’ lotgawpte tawh kibang hi,’ ci ding uh hi.

Thu-hilhkikna 28:59

Topa in note le na suan na khakte uh tungah nasia-in sauvei a om gimna, gimna a tuan diak, le a nasia, nat saute hong tungsak ding hi.

Siampi Laibu 26:43

Ahih hangin amaute in leitang nusia-in, amaute om loin gamkhingin a om sungteng leitang in a sabbath-te na ngah ding hi. Amaute in ka biakna ngeina kipte nialin, ka thukhamte mudah uh ahih manin, a mawhna uh a kipuahphat ding uh kisam hi.

Siampi Laibu 26:32

Keimah in leitang ka siasak ding a, tua tungah a teng na galte un lamdangsa ding uh hi.

Late 109:25

Amaute’ nuihsatin kei ka om a, amaute in kei hong muh ciangun lusu ngeungeu uh hi.

Jeremiah 42:18

“Bang hang hiam cih leh Vanglian Topa, Israel mite’ Pasian in kong cihin-ah: Jerusalem khua-ah a teng mite’ tungah ka hehna le ka thangpaihna a kibuak bangmahin Egypt gamah na pai uhleh note tungah ka hehna hong kibua ding hi. Mite in note hong lipkhap ding a, kihamsiatna-in hong zangin hong zahko ding uh hi. Note in hih mun na mukik nawn kei ding uh hi, ci-in gen hi,” ka ci hi.

Jeremiah 44:12

Egypt gamah a teng dingin a lungsim a khensat khin Judah mi a omlaite, a vekpi-un ka sisak khin ding hi. Egypt gamah namsau tawh kithat sakin kial tawh ka puksisak ding hi. A neupen a kipan a golpen dongin namsau le kialpi tawh a si ding uh a, mite’ lipkhap, mite in kihamsiatna-in a zat leh mite’ simmawh ka suaksak ding hi.

Jeremiah 48:27

Moab aw, nang zong Israel mite nuihsan hi lo na hi hiam? Ama thu na gen simin lungdamin na lu na sinsin’, amah guta sa na hi hiam?

Jeremiah 49:17

“Edom gam pen a mulkimhuai gam suak ding a, a kantan mi khempeuh in a siatgawpna hangin lamdangsa-in a mulkim ding uh hi.

Kah la 1:12

A kiim a pamah a pai mi khempeuh kiangah, “Hong en in, kei’ thuak zahin gimna a thuak, Topa in a heh laitakin a hong thuaksak gimna a thuak kei longal, midang kuamah om lo hi,” ci-in a kiko hi.

Ezekiel 27:36

Tu-in nang a maimang paisuak na hita a, nangma tuah bang a tuahkhak ding uh leitungah a om sumbuk dang khempeuh lau-in ling uh hi,” a hong ci hi.

Ezekiel 36:3

Tua ahih ciangin mailam thu ding gen inla, Topa Pasian ahi keima thugen hih bangin pulak in: Na kimkot uhah a om minam dangte in no Israel mualtung gamte hong la-in na neihsate uh a hong suh uh ciangin, mite khempeuh in no Israel mite hong simmawh bawlin hong ciamnuihbawl lel uh hi.

2 KHANG TANGTHU NIHNATE 29:8

Tua ahih ciangin Judah le Jerusalem tungah Topa’ hehna hong tung a, note’ mit mahmah tawh na muh uh mah bangin amah in amaute a cikzethuai, lamdangsakna, le a dipkuathuai-in a bawl hi.

Jeremiah 29:18

Amaute, namsau, kialpi, le pulnatna tawh ka nungdelh ding a, ka hawlkhiatna ding mun khempeuhah mite in kihamsiatna-in a zat dingun simmawhna le zahkonate ka thuaksak ding a, amaute’ thuakna hangin leitung gam khempeuh ka lausak ding hi.

Jeremiah 51:37

Tua ciangin Babylon khuapi innsia losia suakgawp ding a, se-alte’ tenna mun suakin, a lipkhaphuai, simmawhna tawh a kiphitsan, kuamah a ten lohna gamkhing a suak ding hi.

Jeremiah 51:43

A khuapite a mulkimhuai suak a, lei keuna sehnel gam a suak khinta hi. Gam sungah kuamah teng lo a, kuamah in kantan ngei lo hi.