Jeremiah 15:7 - Tedim Bible

⁷ Na gam sung khua kongpite-ah huihpi’ mut bangin note kong mutmang ding hi. Na tate uh ka beisak ding a, ka mite ka susia ding hi. Bang hang hiam cih leh na gitlohna uh le na omdan hoih lo panun na kiheikik kei uh hi.

Tedim Bible Revision 2017

⁷ Na gam sung khua kongpite ah huihpiʼ mut bangin note kong mut mang ding hi. Na tate uh ka beisak dinga, ka mite ka susia ding hi. Bang hang hiam cih leh na gitlohna uh le na om dan hoih lo panun na kiheikik kei uh hi.

Jeremiah 15:7 Referans Kwoze

Mattiu 3:12

Amah in a khutah anzapna tawi-in a ante zap a, a taksate khawmin a ansal sungah koih ding a, a ansite ahihleh a mit ngei lo mei sungah a khul ding hi,” ci-in thu a hilh hi.

Jeremiah 51:2

A zapsiang ding mi Babylon-ah ka sawl ding a, amaute in tua gam a zapsiang ding uh hi. Gimna ni hong tun ciangin amah a sim dingin mun khempeuh panin hong pai ding uh a, gam sungah bangmah a omsak nawn kei ding uh hi.

Jeremiah 5:3

Topa aw, nangmah in thuman en gige hi lo na hi hiam? Nangmah in amaute na sat hangin a awlmawh tuan kei uh hi. Na sukgawp hangin na thuhilhna a ngai tuan kei uh hi. Amaute’ maitang suangtum sangin sakzaw a, a kisik nuam kei uh hi.

Isaiah 41:16

Amaute na haih ding uh a, huih in amaute mutkhia ding a, huihpi in amaute thehthang ding hi. Tua ciangin Topa’ hangin na lungdam ding uh a, Israel-te’ Siangtho Pa’ hangin na minthang ding uh hi.

Isaiah 9:13

Amaute a satpa’ lamah Israel mite kihei lo a, Vanglian Topa zong lo uh hi.

Jeremiah 18:21

Tua ahih manin a tate uh kial tawh puksisak inla, amaute namsau-in sisak in. A zite uh ta neisak kei inla, meigong suaksak in. A pasalte uh pulnatna tawh sisak inla, a tangvalte uh gal sungah namsau tawh kithatlum sak in.

Late 1:4

Migilote ahihleh tua bang hi lo uh a, huih in a letkhiat anvai tawh kibang lel uh hi.

Zekhariah 1:4

Na pu na pate uh bang nawn kei un. Nidanga kamsangte in amaute kiangah ka thu gen uh a, gamtatsia gamta loin, a mawh nawn loh nading hilh uh hi. Ahi zongin amaute in ka thu ngainuam loin, ka thu hong mang lo uh hi.

Ezekiel 24:25

Tua ciangin Topa in kei kiangah, “Mihing ahi Ezekiel aw, amaute in a kisaktheihpih, a lungdampih, paipai-in a etet nop uh biakinnpi ka lakhia ding a, a tanu a tapate uh zong ka laksak ding hi.

Thu-hilhkikna 28:41

Tanute le tapate na nei ding uh a, ahih hangin amaute pen nomau a’ hi lo ding uh hi; bang hang hiam cih leh amaute galmat suak ding uh hi.

Ezekiel 24:21

Israel mite kiangah hih bangin thu gen in hong ci hi. Ama cihna-ah: Note in na kisaktheihpih uh, a sungah paipai-in na etet nop uh ka biakinn pen a ninsak ding ka hi hi. Tua ciangin note’ nungah a omlai na tate uh, namsau-in si ding uh hi, ci hi.

Jeremiah 9:21

Bang hang hiam cih leh tawlet vang panin sihna hong lut a, kumpipa’ inn sungah zong sihna hong lut hi. Kongzing a naupangte vatmang a, sumbuk a tangvalte vatlum hi.

Thu-hilhkikna 28:32

Na tapate uh le na tanute uh midang tungah kipia ding a, amaute ngai-in sun nilohin na mit un enin na mit uh gim ding hi. Tuate pen nomau’ tha tawh na dalzawh ding uh hi lo ding hi.

Thu-hilhkikna 28:18

“Note’ sung pana piangte le na leitang uh pana piangte, na bawngte uh le na tuuhon note uh in zong samsiatna ngah ding hi.

Ezekiel 36:12

No ka mi Israel-te, na leitang uhah kong gamtangsakkik ding hi. Note’ leitang suak ding a, tua leitang in na tate uh gilkialin puksisak nawn lo ding hi.

Isaiah 9:12

Ama mai-a om Syria mite le a nunga om Filistia mite in kam ka-in Israel netum uh hi. Hih thute khempeuh hangin ama hehna damzo nai lo a, ama khut kizanlai hi.