Jeremiah 15:2 - Tedim Bible

² Amaute in, ‘Koi-ah pai ding ka hi uh hiam?’ ci-in hong dot uhleh hih bangin genkik in: ‘Topa in, “Pulnatna tawh a si dingte pul-in si ding uh a, namsau tawh a si dingte namsau-in si ding uh hi. Kial tawh a puksi dingte kialin si ding uh a, sala kikai dingte zong salin kikai ding uh hi,” a ci hi,’ va ci in.

Tedim Bible Revision 2017

² Amaute in, ‘Koi ah pai ding ka hi uh hiam?’ ci-in hong dot uh leh hih bangin genkik in: ‘Topa in, “Pulnatna tawh a si dingte pul-in si ding uh a, namsau tawh a si dingte namsau-in si ding uh hi. Kial tawh a puksi dingte kialin si ding uh a, sal a kikai dingte zong salin kikai ding uh hi,” a ci hi,’ va ci in.

Jeremiah 15:2 Referans Kwoze

Jeremiah 43:11

Amah hong pai-in Egypt gam hong simgawp ding a, pulnatna tawh a si ding mite pulnatna tawh si-in, sala mat dingte salin kimanin, namsau a si ding mite namsau tawh kithat ding uh hi.

Zekhariah 11:9

Tua ciangin kei zong tuuhonte kiangah, “Note ka hong cing nawn kei ding hi. A si dingteng si unla, a kisusia dingteng siacip un. A omlaisun teng khatlekhat kisanek un,” ka ci hi.

Ezekiel 5:2

Umcihna lim na man ciangin khuapi lim sungah seh khat haltum in. Tua ciangin seh khat la leuleu inla, khuapi kiimah na paikawmin na namsau tawh satnen in. A omlai seh khat pen huihlakah lawn in. Keimah in ka namsau tawh tuate ka sat ding hi.

Ezekiel 5:12

Note seh thum suah seh khat pen cina le gilkialin khuapi sungah na si ding uh hi. Seh thum suah seh khat, khuapi kiimah namsau-in na si ding uh hi. A omlai seh thum suah seh khat ahihleh mun khempeuhah hong thehthangin namsau tawh kong delh ding hi.

Jeremiah 14:12

An a tan’ uh hangin amau’ thumna ka ngai kei ding a, meihal biakna le an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisakzaw ding hi,” hong ci hi.

Isaiah 24:18

Lauhuaina panin a tai mipa gum sungah kia ding a, gum sung panin a taikhiat ciangin thangzak sungah awk ding hi. Bang hang hiam cih leh van panin guahpi hong bua sukin leitung bulpite kiling ding hi.

Amos 5:19

Humpinelkai kihta-in vompi a tuakpa tawh kibang ding hi. Tua ahih kei leh mi khat a inn-ah hong tai a, a kawmah a khut a ngak ciangin gul in a tuk tawh kibang ding hi.

Daniel 9:12

Na gensa bangin kote tung le ko hong ukte tungah na hong bawlzo hi. Leitung a om khuapi dang khatpeuh sangin Jerusalem khuapi a nasia zaw-in gim na pia hi.

Ezekiel 14:21

“Topa Pasian’ thugen hih bang ahi hi: Mihing ganhing a sumai dingin gimna nasia pen li ahi gal, kialpi, a kihtakhuai gamsate, le natna, Jerusalem-ah ka tungsak ding hi.

Jeremiah 14:16

A hilh uh mite in zong kial le namsau thuakin amaute a kipan a zite uh, a tapate uh, le a tanute uh Jerusalem khua kongzing lakah kipaithang ding a, kuamah in a vui kei ding hi. Bang hang hiam cih leh amau’ gitlohna amau’ tung mahah ka buaksuk ding hi,” hong ci hi.

Jeremiah 16:4

Natna lian tawh si ding uh a, kuamah in kah loin kuamah in zong a vui kei ding uh hi. Leilak a ek ki-tha a bang lel ding uh hi. Namsau le kial tawh a si ding uh a, a luanghawmte uh huihlaka a leeng vasate le leilaka ganhingte in a ne ding uh hi.

Jeremiah 19:7

Hih munah Judah mite le Jerusalem mite’ ngimna ka tangtungsak kei ding a, a galte uh’ namsau le a thatnuamte’ khutlumin amaute ka sisak ding hi. Amau’ luanghawmte huihlaka leeng vasate le leilak ganhingte’ an dingin ka pia ding hi.

Ezekiel 12:11

Na gamtatnasate pen amaute tungah a thupiang ding lahna lim ahihna thu gen in. Amaute pen a kiman, sal a suak ding mi ahi uh hi.

Ezekiel 33:27

Amaute kiangah hih bangin gen in: Kei pen a nungta Topa Pasian ka hih mah bangin, khuapi siate sungah a teng mite galin si ding uh a, khuaneu-ah a teng mite khempeuh gamsate in ne ding uh hi. Dum muanhuai sung leh leihawm sungah a bute khempeuh zong pulnatna tawh si veve ding uh hi.

Isaiah 10:4

Thongkiate’ lakah tonbucipin om ding le a kithat mite lakah sih ding bek a om hi. Hih thute khempeuh hangin ama hehna damzo nai lo a, ama khut kizanlai hi.