Jeremiah 14:8 - Tedim Bible

⁸ Israel mite’ lamet pa aw, haksat hun ciangin ko a hong honkhia pa na hi hi. Bang hangin ka gam sung uhah khualmi bangin nang omin khualzin zan khat bek a taam bangin hong om na hi hiam?

Tedim Bible Revision 2017

⁸ Israel miteʼ lamet pa aw, haksat hun ciangin ko a hong hon khia pa na hi hi. Bang hangin ka gam sung uh ah khualmi bangin nang omin khualzin zan khat bek a taam bangin hong om na hi hiam?

Jeremiah 14:8 Referans Kwoze

Jeremiah 17:13

Aw Topa, Israel mite’ lamet pa aw, nang a hong taisan mite a zahhuai ding uh hi. Nang a hong lehngatsan mite leivui lak a min gelh bangin a mangthang uh hi. Bang hang hiam cih leh nuntakna ciktui ahi Topa a hong taisanzo uh hi.

Jeremiah 50:7

Amau a mute in na ne gawp uh hi. A galte un, ‘Ko bangmah khialhna ka nei kei uh hi. Bang hang hiam cih leh a pute a pate un a muan leh a lametna uh Topa’ tungah amaute a khial uh hi,’ a ci uh hi.

Isaiah 43:3

Bang hang hiam cih leh kei pen Topa na Pasian, Israel-te’ Siangtho Pa, nangmah hong honpa ka hi hi. Nangmah tat nadingin Egypt ka pia a, nangmah khek nadingin Ethiopia le Seba ka pia hi.

Late 50:15

Haksat hun ciangin keima tungah hong ko un. Note kong honkhia ding a, note in keima min nong thangsak ding uh hi,” a ci hi.

Joel 3:16

Zion Mual panin Topa hong hawksuk a, Jerusalem panin hong awngkek a, vanpi le leipi a ling damdam hi. Ahi zongin Topa pen ama mite’ belh pa hi a, Israel mite a hu ding hi.

Isaiah 45:21

Na thu uh sung unla, hong gen un. Na thu uh kikum khawm un! Hih thu sawtpekin kua in gen ahi hiam? Tanglai-in kua in pulak ahi hiam? Keimah Topa hi lo ka hi hiam? Thuman Pasian le Honpa ahi, kei simloh pasian dang om lo a, kei simloh kuamah dang om lo hi.

Isaiah 43:11

“Kei, keimah pen Topa ka hi a, kei simloh honpa dang om lo hi.

1 TIMOTI MASA 1:1

Eite a hong Hon Pasian le eite’ lamet Khrih Jesuh’ thupiakna tawh Khrih Jesuh’ sawltak ahi keimah Paul in,

Sawltak 28:20

Israel mite in a lamet uh mipa’ hangin sikkhau khihna thuakin thongkia mi ka suak hi. Hih thute khempeuh note kiangah hong gennuam ka hih manin a hong samsak ka hi hi,” a ci hi.

Isaiah 45:15

A taktakin, Israel-te’ Pasian, Honpa pen, amahmah a bucip Pasian ahi hi.

Late 138:7

Haksatna tuamtuamte ka thuak ciangin kei nong kem hi. A heh ka galte, kei’ tangin nong dosak a, na thahatna tawh kei na hong honkhia hi.

Late 91:15

Amah in hong sap ciangin amah ka dawng ding hi. Haksatna sungah amah ka ompih ding a, amah honkhia-in ka pahtawi ding hi.

Late 46:1

Pasian, i belh leh i thahatna hi a, haksat hunin a hong huh pahpah pa ahi hi.

Late 9:9

Topa pen, netniamna a thuakte a’ dingin munkip hi a, haksat hun ciangin munmuanhuai ahi hi.

Late 10:1

Topa aw, bang hangin gamla din na hi hiam? Haksat hunin bang hangin nang bucip khong na hi hiam?

Thukhente 19:17

Amah khuadak a, khualzin pa, khuapi kongzingah a mu hi. Tua ciangin puteekpa in, “Koi-ah pai ding na hi hiam? Koi panin hong pai na hi hiam?” a ci hi.

Late 71:5

Bang hang hiam cih leh Topa Pasian aw, ka neu lai a kipanin ka hong lamet, ka hong muan na hi hi, Topa aw.

Isaiah 63:8

Bang hang hiam cih leh Topa in, “Amaute pen keima mi taktak hi a, amaute in kei hong khem lo ding hi,” a ci hi. Tua ahih manin a lungkhamna panun amaute a honkhia hi.

Jeremiah 30:7

Nu e! Tua ni lianpi hong tung ding a, nidang tawh tehtheih ding hi lo hi. Jakob suante’ gimhun hi ding a, ahih hangin amaute suakta veve ding uh hi.

Zekhariah 9:12

Lametna a om no salte aw, ciahkik unla, a muanhuai mahmah na mun ngei uh zuankik un. Note’ thuaknasa a zah nihin thupha ka hong piakna ding tuni-in note kiangah ka hong gen hi.

Late 46:2

Tua ahih ciangin, leitung kikhinin, mualte tuipi sung a kidenna zongin, a tuite ging zuazua-in phuan zuazua a, hih ginna hangin mual liante a ling zongin, i lau kei ding hi.

Isaiah 33:2

Topa aw, kote hong hehpih in; nang kong muang uh hi. A tawntungin kote hong hu inla, lungkham hunin hong honkhia in.

Jeremiah 16:19

Aw Topa, ka hatna le ka kulhpi, lungkham hun ciangin ka bukna pa aw, leimong panin gamdang mite nangma kiangah hong pai ding uh a, “Ka pu ka pate un zuauthu le bangmahin a kimang lo milimte longal bangmah dang a luah kei ding uh hi.