Jeremiah 12:1 - Tedim Bible

¹ Topa aw, nang tawh thu i kisel ciangin nang a tawntungin na man den hi. Ahih hangin thu khat ka hong dongnuam lai hi. Bang hangin migilote daupai uh a, mikhem hatte gualzo sese ahi uh hiam?

Tedim Bible Revision 2017

¹ Topa aw, nang tawh thu i kiseel ciangin nang a tawntungin na man den hi. Ahih hangin thu khat ka hong dong nuam lai hi. Bang hangin migilote daupai uh a, mi khem hatte gualzo sese ahi uh hiam?

Jeremiah 12:1 Referans Kwoze

Malakhi 3:15

I muhna bang leh, mi kiphasakteng mah in thupha ngahin nuamsa uh hi. Mi gamtatsiate ahihleh citheibek loin, a gamtatsiatnate uh tawh Pasian ze-et napi-un bangmah tuak se lo uh hi,’ na ci uh hi,” a ci hi.

Late 37:1

Migilote’ hangin kilungsosak kei inla, a man loin a gamta mite en’ dingin ngaihsun kei in.

Daniel 9:7

Topa, nang na hih leh na siangtho a, ahih hangin kote ka hih uhleh a zumhuai-in ka gamta uh hi. Judah gam le Jerusalem khuasunga teng Israel mite khempeuh thuman lo uh ahih manin, a nai a gamla gam tuamtuamah na thehthangzo hi.

JOB (Job) 12:6

Guta mite nuamtakin om hithiat uh a, Pasian a simmawhte nuamtakin nungta uh hi.

Habakkuk 1:4

Thukham in thu neizo loin a mawkna suak a, thu a manin kisem ngei lo hi. Thutang thute kilehhei-in, migilote in thuman mite zo zawsop hi.

Late 51:4

Nangma tungah khialin, nangma muhna-ah a sia ka gamta khin hi. Tua ahih ciangin na thugenna-ah nang na thutang a, thu na hong khenna-ah pauna ding bangmah om lo hi.

Late 37:35

Lebanon taamtak sing bangin a sang pha mahmah migilo kiphasak khat keimah in ka mu hi.

Zefaniah 3:5

Ahi zongin tua khuapi sungah Topa omin, a thuman na bek sem a, a khialin gamta ngei lo hi. Zingsang simin mihingte tungah pelh ngei loin thutang lak hi. Ahi zongin tua lai-a mihing thuman lote, a sia-in gamta teitei uh a, maizumna mel theithei lo uh hi.

Jeremiah 11:20

Ahih hangin thu a mantakin khenin, mihingte’ lungsim le a ngaihsutna uh a entel a Vanglian Topa aw, amaute na thuhkikna kei hong musak in. Bang hang hiam cih leh nangma tungah ka thu kong ap khin hi.

Jeremiah 12:6

Bang hang hiam cih leh na sanggamte le na innkuanpihte nangawn in nang hong zuak uh a, nang a hong do ding mihonpi a kaikhawm uh hi. Kam khum tawh nang a hong zol uh hangin um kei in,” ci-in hong dawngkik hi.

Jeremiah 5:11

Israel minamte le Judah minamte, Topa in ka cihin-ah, kei’ tungah hong thuman nawn het lo uh hi.

JOB (Job) 13:3

Ahi zongin note tawh kam a kinial hi loin, Pasian tawh a kinial ka hi hi. Pasian tawh hih ka thu ka kinial nuam hi.

Ezra 9:15

Israel Pasian, Topa aw, nang na thutang a, ahi zongin tuni-a a omlai ko teng nong suaktasak veve hi. Na muhna-ah kote a mawhpi mah hita le-ung hong hehpih in; bang hang hiam cih leh mawhna tawh nangma mai-ah kuamah om thei lo hi,” ci-in thu ka ngen hi.

Hosea 6:7

Ahi zongin ka ciamna gam a tun uh ciangin amaute in Adam khua-ah ka thuciamna palsat uh a, kei tungah hong thuman lo uh hi.

Isaiah 48:8

Note pen muantheih ding na hihlohna uh, na suah tung uh a kipan mi lehdo thei na hihna uh ka hong thei hi. Tua ahih manin hih thute na za ngei kei uh a, zong na thei ngei kei uh hi.

Isaiah 41:21

Na thu uh sung un, Topa in ci hi. Na lahtel nop teng uh gen un, Jakob’ Kumpipa in ci hi.

Paunak 1:32

Bang hang hiam cih leh thu thei lote in pilna a don loh manun sihlawh uh a, mihaite in lunghihmawhna a neih loh manun siatlawh uh hi.

Late 145:17

Topa pen a sepna khempeuhah thutang a, a gamtatna khempeuhah hehpihna a nei hi.

Late 119:137

Topa aw, nang na thuman a, na thukhennate zong thuman mahmah hi.

Late 119:75

Topa aw, nangmah biakna ngeina kipte man hi, ci-in ka thei a, na thumanna hangin kei gim na hong pia hi.

Thu-hilhkikna 32:4

“Eite’ belh Topa, a nasepna kicing a, ama sepna khempeuh thumanna ahi hi. Thumanna nei-in, mawhna a nei lo Pasian hi a, amah thutangin thuman hi.

Piancilna 18:25

Thuman mite, migilote tawh a kibat nadingin migilote tawh thuman mite thahkhawm ding, hi thei ding ahi hiam? Tua pen hi thei lo ding hi. Leitung khempeuh Thukhen pa a manin gamta lo ding ahi hiam?” a ci hi.

Nehemiah 9:33

Kote tungah hong tungsa thu khempeuhah nang a thutang na hi a, nang citakin a om na hi a, kote a khial gamtatkha ka hi uh hi.

Late 116:5

Topa dikin thuman a, i Pasian in hehpihna nei hi.

Thuhilh-sia 8:14

Ahi zongin hih thugenna a mawknapi ahi hi. Leitung a thupiangte ngaihsun dih in: Khat veivei midikte in migilote’ gimthuak dingteng thuak zawsop a, migilote in midikte’ thaman ngah dingteng ngah zawsop uh hi. Hih thu pen a haivai, a mawkna taktak ahi hi.

Jeremiah 3:7

Hih teng a hih khit ciangin kei kiangah hong kileh kik ngawn ding hi, ci-in ka up hangin amah hong kileh kik tuan lo hi. Tua bangin a gamtatna pen numei ginalo a sanggamnu Judah in zong a mu hi.

Jeremiah 3:20

Ahih hangin a thuman lo zi in a pasal a nusiat bangin Israel mite aw, Topa in kong cihin-ah, no zong kei tungah nong thuman kei uh hi,’ ci-in va taangko in,” hong ci hi.

Jeremiah 9:2

Sehnel gamlakah khawlna ding bukno khat nei thei-in ka mite nusia-in a taisan thei hi leng ka ut hi. A vekpi-un angkawm hat hi khin uh a, thuman lo kim uh hi.

Jeremiah 32:16

“Neriah’ tapa Baruk kiangah kileina lai ka piak khit ciangin Topa’ kiangah thu ka ngen a,

Kah la 1:18

Topa a thutang ahi hi. Bang hang hiam cih leh keimah in ama thu a mang lo ka hi hi. Mun khempeuhah a om mite aw, ka thugenna hong ngai un. Ka thuaknate hong mu dih un. Ka khangno numei le pasalte salin a kipuakhia hi.

Ezekiel 18:25

“Ahi zongin note in, ‘Topa’ hihna zia man lo hi,’ na ci uh hi. Israel mite aw, ka thugen hong ngai un. Keima hihna zia a man loin ngaihsun na hi uh hiam? A man lo pen nomau’ ngaihsutna zia hizaw hi.

JOB (Job) 8:17

Ahi zongin suangtum lakah a zung a kivialgawp, suangtawphah a phukha zung a suak hi.

JOB (Job) 24:12

Khuapi sungah a liam le a si kuante’ kikona kiza napi-in Pasian in amau’ thungetnate don lo hi.

JOB (Job) 24:23

Pasian in a lungnuamin amah nungtasak a, ahi zongin Pasian in amah encik tawntung hi.

Late 51:6

Nang in nuntakna sungah thumanna na deih hi. Tua ahih ciangin ka lungsim tawngah ciimna hong hilh in.

Daniel 9:14

Topa Pasian aw, nangmah in kote gim a pia dingin nong kithawi a, na hong pia takpi hi. Bang hang hiam cih leh na hihna khempeuh a thuman hi a, kote in na thu ka hong mang kei uh hi.

Malakhi 2:17

Thu na gengenna uh tawh Topa na gimsak uh hi. Note in, “Bangci gimsak ka hi uh hiam?” na ci uh hi. “Topa in a sia-in a gamtate a hoihin ngaihsun a, zong itin amaute tungah lungkim takpi hi,” na cihna khawng uhleh, “Thutang a gen Pasian koi lai-ah om ahi hiam?” ci-in na dotnate uh tawh na gimsak uh hi.