Jeremiah 1:15 - Tedim Bible

¹⁵ Bang hang hiam cih leh leilu lamah a om gam khempeuh keimah in ka sam a, amaute hong pai-in Jerusalem khua kongpite-ah ahi zongin, khua kimkota kulh kiimte-ah ahi zongin, Judah gam khuapi khempeuh kiimte-ah ahi zongin a kumpi tokhomte uh hong phut ciat ding uh hi.

Tedim Bible Revision 2017

¹⁵ Bang hang hiam cih leh leilu lamah a om gam khempeuh keimah in ka sam a, amaute hong pai-in Jerusalem khua kongpite ah ahi zongin, khua kimkot a kulh kiimte ah ahi zongin, Judah gam khuapi khempeuh kiimte ah ahi zongin a kumpi tokhomte uh hong phut ciat ding uh hi.

Jeremiah 1:15 Referans Kwoze

Jeremiah 43:10

Tua ciangin amaute kiangah, ‘Vanglian Topa, Israel mite’ Pasian in hong genin-ah: En un, keimah in ka nasempa ahi Babylon kumpipa Nebukhadnezzar ka la ding a, hih ka suang phumte tungah ama kumpi tokhom hong phut ding a, tuate tungah a kumpi puanbuk a lam ding hi.

Jeremiah 25:9

en un, leilu lama om minam khempeuhte le ka nasempa ahi Babylon kumpipa Nebukhadnezzar ka vaikhak ding a, hih gam le a sunga a teng mi khempeuh le hih kiima om gam khempeuh a sim dingin ka va la ding hi. Keimah in amaute ka susia mangkhin ding a, amaute a tawntungin siacipin simmawhna ka thuaksak ding hi, ci-in Topa in kong gen hi.

Jeremiah 9:11

“Jerusalem khuapi ninkholna ka bangsak ding a, se-alte’ tenna mun ka suaksak ding hi. Judah gam khuapite gamlak ka suaksak ding a, kuamah teng nawn lo ding hi,” a ci hi.

Jeremiah 4:16

Minamte kiangah va gen unla, Jerusalem kiangah va taangko un. “Gamlapi panin mite hong pai uh a, Judah gam khuapite langpangin hong kiko uh hi.

Jeremiah 39:3

Jerusalem khua a kilak laitakin Nergalsharezer, Samgarnebo, galkapbu Sarsekhim le sakol galkapmang Nergalsharezer te a kipan Babylon kumpi uliante khempeuh hong pai-in kongpi laita penah hong tu uh hi.

Jeremiah 10:25

Nangmah a hong thei lo gamte tung le nangma min a hong lo ngei lo mite tungah na hehna sungsuk in. Bang hang hiam cih leh amaute in Jakob’ suanlekhakte thatmang khinin amau’ tenna a susia khin uh hi.

Isaiah 22:7

Nomau’ teel Judah kuamte sakol leeng tawh kidim a, sakol tung tuangte in Jerusalem kulhkongpite-ah a pang uh hi.

Kah la 5:11

Zion mual le Judah gam sung khempeuhah ka zite uh le ka nungakte uh hong kibuansak hi.

Jeremiah 44:6

Tua ahih manin Judah gam khuapite sung le Jerusalem khua kongzing lakah ka hehna le ka thangpaihna ka bua a, ka kuangsak hi. Tuni-a na muh uh bangin tuate kisia-in gamlak suak khinta hi.

Jeremiah 34:22

En un, Topa in kong cihin-ah, keimah in thu ka pia ding a, hih khuapi-ah hong paikik ding uh hi. Amaute in hih khuapi hong simin, hong la-in mei tawh hong halsak ding uh hi. Judah gam khuapite kuama’ ten lohna mun awng ka suaksak ding hi,” a hong ci hi.

Jeremiah 33:10

“Topa in kong cihin-ah, note in, ‘Hih munah mihing, ganhing om loin mundai suak hi,’ ci-in na gen uh mah bangin Judah gam khuapite le Jerusalem khua kongzingte awng a, mihing ganhing kuamah a teng kei hi.

Jeremiah 25:28

“Amaute in na khuttung panin hai la-in dawn ding uh a, hong nial uhleh amaute kiangah, ‘Vanglian Topa in hong genin-ah: Na dawn uh kul ding hi.

Jeremiah 10:22

Ngai dih un, thu khat kigen hi. Judah khuapite gamlak a suaksak ding le se-alte’ khua a suaksak dingin leilu lam gam panin buaina lianpi khat hong pai hi.

Jeremiah 6:22

Topa in, “En un, leilu lam gam panin mi hong pai uh a, leimong gamla pen panin galsim dingin gam lian khat hong kithawithawi hi.

Jeremiah 5:15

“En un, Israel minamte aw, Topa in kong cihin-ah, gamlapi panin note a hong sim dingin gam khat kong kuansak ding hi. Tua gam pen tanglai pekin a om khinsa, a hat mahmah, amaute’ pau na theih loh uh gam khat ahi hi.

Jeremiah 4:6

Zion paina lampi kihilh unla, na suahtak nadingun tai un; zekai kei un. Bang hang hiam cih leh leilu lam panin siatna lianpi ka hong puaksuk hi.

Jeremiah 13:20

Jerusalem khua aw, khuadak inla, leilu lam panin a hong paite en dih in. Nangmah a hong kipia a hoih mahmah na tuuhonte koi-ah om ahi hiam?

Jeremiah 34:1

Babylon kumpipa Nebukhadnezzar in a galkapte khempeuh, a ukna gam khempeuh le a mi khempeuh tawh Jerusalem khua le a kiima khuapite a sim laitakin Topa in kei hong hopih a,

Jeremiah 46:24

Egypt nungakte a maizum ding uh hi. Leilu lam panin a hong pai mite’ khut sungah amaute a kipia ding uh hi,” a hong ci hi.

Ezekiel 32:30

“Leilu lam uliante le Sidon mite zong tua lai mahah om uh hi. Amaute’ vangliatna in midangte lausak ngei a, ahi zongin tu-in galsung a si mite tawh mindai-in paisuk uh a, Pasian a thei loin kivui uh hi. Misite’ gam Leinuai-a a paisukte tawh a mindaina uh kibang hi.

Joel 2:20

Leilu lam gam panin a hong pai mite, note kiang panin sehnel gamah ka hawlkhia ding a, a madawkte uh nisuahna tuipi sungah khia-in, a nungdalte uh nitumna tuipi sungah ka khia ding a, amaute in note tungah hong bawlna hangin a luanghawmte uh uihgawp ding hi.

Zekhariah 6:6

Sakol vomte in a kaih leeng pen leilu lam Babylon-ah a pai ding hi a, sakol kangte, nitumna lam, sakol gialte, leitaw lam, sakol sante, nisuahna lam gamah a pai ding ahi hi.