Jeim 4:3 - Tedim Bible

³ Pasian kiangah na nget sun uh ciangin zong note’ nopsak nading bek ngenin, na ngaihsutna uh man lo ahih manin a ngah lo na hi uh hi.

Tedim Bible Revision 2017

³ Pasian kiangah na nget sun uh ciangin zong noteʼ nopsak nading bek ngenin, na ngaihsutna uh man lo ahih manin a ngah lo na hi uh hi.

Jeim 4:3 Referans Kwoze

1 JOHAN MASA 5:14

Eite in ama deihna tawh kituakin i nget nakleh i nget khempeuh Pasian in hong pia ding hi, ci-in kimuanna lungsim i nei hi.

1 JOHAN MASA 3:22

Ama thupiaknate zui-in ama lungkim nadingin gamta ihih manin ama kiang panin i nget peuhpeuh i ngah hi.

Jeim 4:1

Note lakah a om kitotna le kilaina koi panin hong piang ahi hiam? Deihluatna lungsim na neih manun note’ pumsung a kitoktok niloh ahi hi.

Micah 3:4

Topa’ tungah huhna ngenin na kiko hun uh hong tung ding a, ahi zongin amah in note hong dawng lo ding hi. Note gamtatsia na hih manun, na ngetna uh hong ngai lo ding hi.

Paunak 15:8

Topa in migilote’ biakpiakna kihhuai sa a, thuman mite’ thungetna-ah lungdam hi.

Paunak 21:13

Mizawngte’ huh ngetna a pia nuam lote pen amau zong cimawhin huhna a nget uh ciangin kipia lo ding hi.

JOB (Job) 35:12

Amaute migilo mi kihisakte ahih manun, huh ding a nget hangun Pasian in pia lo hi.

Zekhariah 7:13

Amaute ka hopih ciangin hong ngai nuam lo uh hi; kei zong amaute’ hong thungetna ka ngai kei ding hi, Vanglian Topa in ci hi.

Luka 15:13

Ni tawmkhat khit ciangin a nauzawpa in ama neihsateng zuakin a sum tawh inn panin a gamlapi-ah paikhia a, a sumte a phengzat gawp hi.

Marka 10:38

Ahi zongin Jesuh in, “Note in na hong nget uh na thei kei uh hi. Keimah in ka thuak ding gimna note in thuakzo ding a, ka kiphum nading gimna-ah kiphumzo ding na hi uh hiam?” ci-in a dot ciangin

Mattiu 20:22

Ahi zongin Jesuh in, “Na nget uh na thei kei uh hi. Ka thuak ding gimna note in thuakzo ding na hi uh hiam?” ci-in a dot ciangin amaute in, “Ka thuakzo ding uh hi,” a ci uh hi.

Jeremiah 11:14

“Tua ahih manin Jeremiah aw, hih mite a’ ding thu ngetsak kei in la, amau’ tangin thumsak kei in. Bang hang hiam cih leh amaute in gim ngahin hong sap uh ciangin ka ngai kei ding hi.

Paunak 21:27

Topa in migilote’ biakpiaknate deih lo a, ngimna hoih lo tawh a piakte uh deih lo zaw kan lai hi.

Paunak 1:28

Tua bang hun ciangin kei nong sam ding uh a, ahi zongin kong dawng kei ding hi. Limtakin kei nong zong ding uh a, ahi zongin koimahah nong mu kei ding uh hi.

Jeremiah 14:12

An a tan’ uh hangin amau’ thumna ka ngai kei ding a, meihal biakna le an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisakzaw ding hi,” hong ci hi.

Late 18:41

Huhna ding ngenin amaute kikoko uh a, ahih hangin a hon ding kuamah om lo hi. Amaute in Topa’ tungah ko uh a, ahih hangin amah in dawng lo hi.

Jeremiah 11:11

Tua ahih ciangin Topa in kong cihin-ah, en un, a pelh theih loh uh gimna amau’ tungah ka tungsak ding a, kei kiangah a hong kap liang uh zongin ka dawng nawn kei ding hi.

Luka 15:30

Ahi zongin hih na tapa in na neihsa khempeuh numei paktatte tungah zangmang khin a, hong ciahkik ciangin bawngtalno limcipen na gawh lai hi,’ a ci hi.

1 KUMPI MASATE 3:11

Pasian in ama kiangah, “Nangmah in hih thu hong ngenin, nangma a dingin khansauna ahi a, hauhna ahi a, na galte thahzawh nading ahi zongin hong ngen loin, a man thu na theih nadingin nang a dingin thu theihtelna hong ngen na hih manin,

Luka 11:10

Bang hang hiam cih leh a ngente khempeuh in ngah ding a, a zongte khempeuh in mu ding a, a kiute khempeuh a dingin kong kihon ding hi.