Jeim 1:12 - Tedim Bible

¹² A hoih takpi mah hiam, ci-in sinna a thuak ciangin a nangzote a hampha mahmah ahi hi. Tua bangin a nangzote in, amah a itte tungah Pasian in a piak dingin a ciam nuntakna lukhu a ngah ding uh hi.

Tedim Bible Revision 2017

¹² A hoih takpi mah hiam, ci-in sinna a thuak ciangin a nang zote a hampha mahmah ahi hi. Tua bangin a nang zote in, amah a itte tungah Pasian in a piak dingin a ciam nuntakna lukhu a ngah ding uh hi.

Jeim 1:12 Referans Kwoze

1 PETER MASA 5:10

Tawlkhat na thuak khit uh ciangin, Khrih tawh na kipawlna hangun tawntung minthanna a ngah dingin note a hong sam, hehpihna kicingin a nei Pasian in note a cingtaakin hong bawl ding a, kipna, thahatna, bulkip kician hong pia ding hi.

Mangmuhna 2:10

Na thuak ding uh haksatnate kihta kei un. Dawimangpa in note pawlkhat thong sungah hong khia-in hong ze-et ding hi. Gimna na thuak hun ding uh ni sawm sung bek hi ding hi. Na sih dongun kei tungah hong citak un. Tua hileh nuntakna lukhu ka hong pia ding hi.

Jeim 5:11

Tua bangin a thuak mite a hampha mahmah hi, i ci hi. Job in a thuakna-ah a lungduaina na thei uh a, Topa in dikna le hehpihna nei ahih manin a tawpna-ah Job tungah a piak thuphate na thei uh hi.

ROM (Romans) 8:28

Ama deihna bang a sem dingin Pasian in a hong sap, amah a it eite a dingin na khempeuh a hoihlamin piangsak hi, ci-in i thei hi.

Mattiu 10:22

Keima hangin Gentail mi khempeuh in note hong mudah ding uh hi. Ahi zongin a tawp dongin a thuakzo mite in hotkhiatna a ngah ding uh hi.

1 KORIN MASA 9:25

Kimawlna sungah a kihel mi khempeuh in thu khempeuhah a pumpi uh uk ciat uh hi. Amaute pen a kisiathei pak a ngah nadingun a hanciam uh hi a, eite pen a kisia thei lo i ngah nadingin a hanciam ihi hi.

1 PETER MASA 3:14

A hoihin na gamtat manun gimna na thuak uhleh zong Pasian in thupha hong pia ding hi. Mite kihta kei unla, lunghihmawh ngaihsut kei un.

2 TIMOTI NIHNA 4:8

Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi. Kei tung bekah a hong pia ding hi lo a, ama hong paikik ding itna tawh a ngakte khempeuh tungah zong a pia ding ahi hi.

Jeim 2:5

Sanggamte aw, hoihtakin na ngai un. Pasian a it mite tungah piak dingin a ciam vantung gam a ngah ding le upna thu-ah mihau a suak dingin Pasian in leitung mizawngte a teel hinapi-in,

1 PETER MASA 5:4

Tuucing pipa hong pai ciangin a mual ngei lo minthanna lukhu a hong pia ding hi.

1 KORIN MASA 2:9

Tua ahih manin Lai Siangtho sungah, “Kuamah in a muh ngei loh, a zak ngei loh, piangthei dingin zong a ngaihsut loh uh thu pen Pasian in amah a it mite a dingin a bawlkholh saksa ahi hi,” ci-in na kigelh hi.

Thu-hilhkikna 8:2

A thupiakte na zui uh hiam, na zui kei uh hiam cih a theih nadingin note hong niamkhiatin, na lungsim uhah bang om hiam cih a theih nadingin Topa na Pasian un sehnel gamah hih kum sawmli sung note hong paipihna lampi khempeuh na ciamteh ding uh hi.

Paunak 17:3

Kham le ngunte mei sungah kize-et a, mihingte’ lungsim Topa in ze-et hi.

Zekhariah 13:9

Tua a suakta sehkhatte pen meikhukah ngun a kisiansak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ thungetna ka pia ding hi. Keima mi ahihna uh amaute tungah ka gen ding a, amaute in kei pen amau’ Pasian ka hihna thu a kam uh tawh pulak ding uh hi,” a ci hi.

Mangmuhna 3:21

Keimah zong gualzo-in ka Pa’ tokhomah ka tutkhawm uh mah bangin a gualzote khempeuh zong kei tawh ka tokhom tungah hong tutkhawm theih nadingun thu ka pia ding hi.

1 PETER MASA 4:13

Tua bangin Khrih tawh thuakkhawm le-uhcin ama minthanna hong kilat ciangin note lungdam mahmah ding na hih manun, tua banga na thuakna uhah na lungdamzaw un.

1 KORIN MASA 8:3

Mi khat in Pasian a it leh Pasian in tua mipa a na thei hi.

Mangmuhna 3:19

Ka it mite thuhilhin ka taii hi. Tua ahih manin lungsim tak tawh na mawhna panun kisik kik un.

Thu-hilhkikna 13:3

tua kamsangpa’ thu ahi a, mangman pa’ thu ahi zongin na ngai kei ding uh hi. Bang hang hiam cih leh Topa note’ Pasian na lungsim khempeuh uh le na nuntakna khempeuh uh tawh na it uh hiam cih a kitheih nadingin Topa na Pasian un no hong ze-etna ahi hi.

Hebru 10:32

A beisa hun a note tungah thupiangte phawkkik un. Pasian’ khuavak sungah na om khit uh ciangin haksatna tampi thuak napi-in tuate na lel kei uh hi.

Late 119:71

Nangma ngeina kipte ka sin theih nadingin gimna ka thuak pen kei a dingin hoih mahmah hi.

Thu-hilhkikna 7:9

Tua ahih ciangin Topa na Pasian uh amah bek ahi Pasian hi a, amah itin a thupiakna a zuite tungah khang tulkhat dongin thuciamna le itna kip lenin a thuman Pasian,

Hebru 6:15

Abraham in lungduai takin na ngak ahih manin Pasian’ thuciam a ngah hi.

Mattiu 25:34

Tua ciangin Kumpipa in a taklamah a om mite kiangah, ‘Ka Pa in thupha a piak mite aw, hong pai ta un. Leitung piancil a kipanin note a dingin a kibawlkholsa gamnuam hong luah un.

Late 119:67

Gim nong piak ma-in lam ka pial thei zel a, ahih hangin tu-in na thu ka zui hi.

Nehemiah 1:5

Ka thungetna-ah, “Aw vantung Pasian, Topa, nang hong itin na thupiakna a zuite tungah thuciamna limtakin a zui, a lian a kihtakhuai Pasian aw,

Hebru 11:17

Pasian in Abraham a ze-et laitakin Abraham in a upna hang mah tawh Pasian biak nadingin a tapa Isaac na pia ngam hi. Pasian mah in Abraham tungah tapa ka hong pia ding ci-in a ciam hinapi-in, Pasian’ ciamna bangin a neih tua a tapa neihsun mah, Pasian biak nadingin Abraham in pia dingin na kithawi hi.

Late 119:75

Topa aw, nangmah biakna ngeina kipte man hi, ci-in ka thei a, na thumanna hangin kei gim na hong pia hi.

1 JOHAN MASA 4:19

Pasian in eite hong it masa ahih manin eite in itna i nei thei hi.

Isaiah 64:4

Amah a ngakte a dingin na a sempa’ thu tanglai pek panin kuamah in thei ngei lo, kuama bil in za ngei lo a, kuama mit in nang simloh Pasian dang mu ngei lo uh hi.

Late 5:11

Ahih hangin nang hong belte khempeuh lungdamsak inla, nuamna la sasak tawntung in. Nangma min a deihte nangma hangin gualzo-in a lungdam theih nadingun amaute na hu hi.

Paikhiatna 20:6

ahih hangin kei hong itin ka thupiakte a zui mi a tul tampite tungah itna kip a lak pa ka hi hi.

Hebru 12:5

Pasian in note, tate, hong ci-in hong hanthotna thu mangngilh khinta na hi uh hiam? Pasian in note kiangah, “Ka ta aw, Topa’ hong thuhilhna zangkhai ngaihsut kei inla, gim a hong piak ciangin lungkia kei in.

JOB (Job) 5:17

“Pasian in a taii mite mi nuamsa hizaw ahih manin, Vanglianpa’ taiina thupi san in.

Late 94:12

Topa aw, migilote a dingin gum khat a kitawh hun mateng, haksat hun sungteng a tawlngak theih nadingin na thukham na hilh mi, na thuhilh mi, mi nuamsa ahi hi.

Piancilna 22:1

Hih thute khit ciangin Pasian in Abraham ze-et a, ama kiangah, “Abraham,” a ci hi. Amah in, “Hiah om ing,” a ci hi.

JOB (Job) 2:10

Ahih hangin amah in a zi kiangah, “Numei haite’ kampau bangin na pau hi. Pasian’ tung panin a hoih sang ihih ciangin siatna zong sang lo ding ihi hiam?” a ci hi. Hih thu khempeuhah a kampau nangawnin Job khial lo hi.

Late 11:5

Topa in midikte le migilote entel a, a ngongtat nuam mite a lungsim in mudah hi.

Luka 6:22

“Mihing Tapa’ hangin mite in hong mudahin hong tuamkoih a, hong simmawhin migiloin hong seh ciangin thupha ngah na hi uh hi.

ROM (Romans) 5:4

thuakzawh hatna in Pasian’ pahtakna hong ngahsak a, ama hong pahtakna in lametna lianpi hong neisak ahihna thu i thei hi.

2 TIMOTI NIHNA 2:15

Pasian’ thuman a mantakin hilhin, na nasepna-ah maizumna thuak loin, Pasian’ pahtakna na ngahtheih nadingin na siam tawpin hanciam in.

1 PETER MASA 4:14

Khrih nungzui hihna hangin mite’ kosiatna na thuak uhleh note sungah a minthang Kha Siangtho ahi Pasian’ Kha Siangtho hong om ahihna lim ahih manin a hampha mahmah na hi uh hi.