Isaiah 64:1 - Tedim Bible

^1-2 Nangma langte tungah na min na theihsakna ding le nangma omna-ah minamte lau-in a lin nadingin mei in selkeu kuangsakin mei in tui a sosak bangin nangma mai-ah mualte a lin nadingin bang hangin na vangliatna tawh vantung balkekin hong paisuk lo na hi hiam?

Tedim Bible Revision 2017

^1-2 Nangma langte tungah na min na theihsakna ding le nangma omna ah minamte lau-in a liin nadingin mei in selkeu kuangsakin mei in tui a sosak bangin nangma mai ah mualte a liin nadingin bang hangin na vangliatna tawh vantung bal kekin hong pai suk lo na hi hiam?

Isaiah 64:1 Referans Kwoze

Marka 1:10

Tui sung panin Jesuh a thawhkhiat khit phetin vantung kihongin, ama tungah vakhu bangin Kha Siangtho a hong kumsuk a mu hi.

Mangmuhna 20:11

Tua ciangin tokhom kang a lian khat le a tungah a tupa ka mu hi. Ama omna panin lei le van lengkhiamang a, a tunna mel uh kithei lo hi.

Late 68:8

nangmah Pasian na om manin lei kiling gawpin vantungte in guah a zusak hi. Pasian ahi, Israel Pasian’ omna-ah Sinai mual nangawn a kiling gawp hi.

Amos 9:13

Topa in hih bangin ci hi: An a kihauh luat manin, anlak a kizawh ma-in lo khawhkik hun tungin, leenggahte, leenggahzu a bawl a kizawh ma-in a suankik hun hong tun ding, hun nuam hong tungta ding hi. Mual lian khempeuh panin leenggahzu khum hong taakkhia-in, mual neu khempeuh tungah leenggahzu a luang ding hi.

Isaiah 63:15

A siangtho, a minthang, nangma omna vantung panin hong ensuk inla hong mu in. Nangma deihsakna le na vangliatna koi-ah omta ahi hiam? Na lungsim’ deihna le nangma hehpihna kote a dingin maimangta hi.

Paikhiatna 3:8

Egypt mite’ khutsung panin amaute khahkhia-in, tua leitang panin amaute la khia-in a hoih a tanzau leitang, bawngnawi le khuaizu a luanna leitang, Kanaan mite, Hit mite, Amor mite, Perez mite, Hiv mite, le Jebus mite’ omna-ah amaute a paipih dingin kong paisuk hi.

Late 46:6

Minamte lungkham uh a, kumpi gamte kiling hi. Ama aw gingkhiasak a, leitung kicimgawp hi.

Paikhiatna 19:11

a ni thum ni-in a baihsa-in om un. Bang hang hiam cih leh a ni thum ni-in Sinai Mual tungah mite khempeuh’ muhna-ah Topa hong paisuk ding hi.

Amos 9:5

Vanglian Topa Pasian in leitung a lawn’ ciangin tuisuak a, leitung a om mi khempeuh a kap uh hi. Nail Gunpi bangin leitung buppi khangto-in kiamsuk ding hi.

Isaiah 41:15

Note pen, a thak, a hiam, ha a nei buhcilna bangin ka hong bawl ding hi. Note in mual liante cilin na suvui ding uh a, mual neute pen ansi bangin na gawizan ding uh hi.

Isaiah 63:19

Kote pen nangmah in cikmahin na uk ngei loh mite, nangma mi ahi ngei lo mite tawh a kibang ka suakkhin uh hi.

Zekhariah 14:4

Tua ciangin Jerusalem nisuahna lamah a om Oliv Mual tungah Topa a ding ding hi. Tua ciangin nisuahna lam pan nitumna lamah Oliv Mual kitamin phel nih suak ding a, a kikalah kuampi om ding hi. A mual kimkhat leilu lamah kikhinin, kimkhat leitaw lamah kikhin ding hi.

Late 79:10

“Amaute’ Pasian koi-ah om ahi hiam?” minam dangte in a cih ding kilawm ding ahi hiam? Na nasemte’ sisan luangkhia a phulakna pen, minam dangte’ lak, komau’ muhna-ah kitheisak in.