Isaiah 48:6 - Tedim Bible

⁶ Ka gensa thu khempeuh hong tungta ahih manin, na gennate a man hi, na hong cih ding uh hita hi. Tu a kipanin na a thakte, na theih ngei loh uh hong tung ding a ki-im nate kong gen ding hi.

Tedim Bible Revision 2017

⁶ Ka gen sa thu khempeuh hong tung ta ahih manin, na gennate a man hi, na hong cih ding uh hi ta hi. Tu a kipanin na a thakte, na theih ngei loh uh hong tung ding a ki-im nate kong gen ding hi.

Isaiah 48:6 Referans Kwoze

Mangmuhna 4:1

Hih thuteng khit ciangin ka khuadak leh vantungah kong a kihongsa-in a om ka mu hi. Peengkul awging tawh a kibang, kei kiangah thu a hong gensa awging mah in, “Hih lai-ah hong paito in. Tunung ciangin thupiang dingte ka hong lak ding hi,” hong ci hi.

Isaiah 42:9

En un, hun beisa-a nate in hong khengta a, tu-in a thak nate kong gen hi. Tuate a hong piankhiat ma-in note tungah a thute ka hong genkhol hi,” a ci hi.

Mattiu 10:27

Zan khuamial sunga kong gente, sun khuavak sungah taangko unla, a simthamin kong huau thute, innkhumdawn zangah na taangko un.

Isaiah 43:19

Tu-in a thak na khat ka bawl a, tu-in hong piangkhia hi. Note in thei lo na hi uh hiam? Gamlakah lam lianpi khat ka bawl ding a, sehnel gam sungah gunte ka luangsak ding hi.

1 KORIN MASA 2:9

Tua ahih manin Lai Siangtho sungah, “Kuamah in a muh ngei loh, a zak ngei loh, piangthei dingin zong a ngaihsut loh uh thu pen Pasian in amah a it mite a dingin a bawlkholh saksa ahi hi,” ci-in na kigelh hi.

Sawltak 1:8

Ahi zongin note tungah Kha Siangtho hong tun ciangin vangliatna tawh na kidim ding uh a, Jerusalem khuasung, Judea gam sung, Samaria gam sung, le leimong dongin note in keima thu na gen ding uh hi,” ci-in a dawng hi.

Johan 15:15

Nasemte in a tote’ nasepna bangmah thei lo ahih manin note pen nasemte ka hong ci nawn kei ding hi. Ka Pa’ tung panin ka zak thu khempeuh note kiangah hong genkhin ka hih manin note, lawm, ka hong ci zaw ding hi.

Jeremiah 50:2

“Gam khempeuhah genin taangko unla, dial khai unla im kei un. ‘Babylon khuapi kia ta hi. Bel pasian maizum ta a, Merodak pasian kitan gawpta hi. A milimte uh maizum ta a, a pasian-te uh kisiagawp ta hi,’ ci-in taangko un.

Jeremiah 2:31

No Israel mite aw, Topa’ kammal limtakin ngai dih un. Israel-te a dingin gamlak tawh kibang ngei ka hi hiam? A mial mahmah gam tawh kibang ngei ka hi hiam? Tua ahihleh bang hangin ka mite in, ‘Ko ka suakta uh hi; nang kiangah kong pai nawn kei ding uh hi,’ ci uh ahi hiam?

Isaiah 21:10

A kicilsa, a kiseepsa keima mite aw, Israel-te’ Pasian, Vanglian Topa’ tung panin ka zaksa thu teng note tungah ka hong gen hi.

Late 119:13

Nangma hong piak nangmah biakna ngeina kipte khempeuh ka gengen ding hi.

Late 107:43

A pil peuhmah in hih thute don hen la, Topa’ itna kip lungngaingai tahen.

Mangmuhna 1:19

Tua ahih ciangin tu-a na muh, tu laitakin a om thute le tu nung ciangin a hong piang ding thute, lai sungah gelh in.

Micah 6:9

Topa, zahtak ding kilawm hi. Khua sungah amah hong kiko a, “Ngai un, khuapi sungah a hong kikhawm mite aw.

Amos 3:6

Khuapi sungah pataukohna gal peengkul a kitum ciangin mite lau loin ommawk thei ahi hiam? Topa’ tunsak lohpi-in khuapi sungah lauhuaina mawk tun ahi hiam?

Isaiah 48:7

Hihte pen tuhunin a piangsak ka hi a, a beisa hunah hih bang piang nai lo hi. A piang khinsa thu hileh, ka theihsa uh thu hi, na ci kha ding uh hi.

Jeremiah 33:3

Kei nong sap leh kong dawngkik ding a, na theih ngei nai loh a ki-imcip thu lianpite kong gen ding hi.

Isaiah 42:8

“Kei pen Topa ka hi a, Topa pen keima min ahi hi. Pasian dang’ tungah keima-a’ tawh a kibang minthanna ka pia kei a, a kisui milimte zong keimah hong kiphatnate pawl ka ngahsak kei hi.

Isaiah 42:20

Israel in na tampi mu a, ahih hangin tuate encian lo hi. Ama bilte vang a, ahih hangin amah in khua za lo hi,” a ci hi.