Isaiah 43:2 - Tedim Bible

² Tuite na kantan ciangin nang kong ompih ding a, gunte na kantan ciangin tui in hong tuum lo ding hi. Mei kantanin na pai ciangin na kang kei ding a, meikuangte in nang hong kangtum lo ding hi.

Tedim Bible Revision 2017

² Tuite na kantan ciangin nang kong ompih dinga, gunte na kantan ciangin tui in hong tuum lo ding hi. Mei kantanin na pai ciangin na kaang kei dinga, meikuangte in nang hong kaang tum lo ding hi.

Isaiah 43:2 Referans Kwoze

Isaiah 41:10

nang hong ompih ka hih manin lau kei in. Na Pasian ka hih manin lungkia kei in. Nang hong thakhauhsakin ka hong huh ding a, nang hong huhin ka hong honkhia ding hi.

Joshua 1:9

Thu hong pia khin hi lo ka hi hiam? Thahat inla hang in. Lau kei inla lungkia kei in; bang hang hiam cih leh na paina peuhpeuhah Topa na Pasian nang tawh hong om hi,” a ci hi.

Late 66:12

Ka galte uh nong tuancilsak a, tui le mei lauhuainate ka thuak uh hi. Ahih hangin nangmah in a tanzau munah kote nong paipih hi.

Late 23:4

Topa aw, kei hong ompih na hih manin khuamial thukpi ka nawk hangin ka lau kei hi. Na molhtum le na ciangkhut in kei hong hu hi.

Late 91:15

Amah in hong sap ciangin amah ka dawng ding hi. Haksatna sungah amah ka ompih ding a, amah honkhia-in ka pahtawi ding hi.

Hebru 11:29

Lei keu tunga pai bang keekin Israel mite in San Tuipi a kantan theihna uh zong a upna hang mah uh ahi hi. Amaute’ pai bangin Egypt mite in pai ding a sawm uh ciangin tui in a tuumcip hi.

Joshua 1:5

Na nuntak sung tawntung kuamah in na mai hong khak zo lo ding hi. Moses tawh ka om mah bangin nang tawh zong kong om ding hi. Nang kong tamasak kei ding a, kong nusia kei ding hi.

Mattiu 1:23

“Nungak khat gai-in tapa khat nei ding a, ama min dingin Emmanuel kiphuak ding hi,” ci hi. Emmanuel a khiatna in, eite tawh Pasian hong omkhawm hi, a cihna ahi hi.

Late 66:10

Bang hang hiam cih leh Pasian aw, kote na hong sin khin a, mei tawh ngun a kisin bangin kote na hong sin khin hi.

Paikhiatna 14:29

Ahih hangin tuipi kantanin lei keu tungah Israel mite pai uh a, amau’ taklam le veilamah kawm bangin tuite a om hi.

2 TIMOTI NIHNA 4:17

Ahi zongin Topa in kei hong ompih a, Gentail mi khempeuh tungah Pasian’ thu a kicingin ka gentheih nadingin thahatna a hong pia hi. Tua ahih manin sih nading thukhenna pan hong suaktasak hi.

Isaiah 41:14

Lungno bang ahi lel Jakob, no Israel mite aw, lau kei un! Note kong huh ding hi, Topa in ci hi. Note hong honpa pen Israel-te’ Siangtho Pa ahi hi.

2 TIMOTI NIHNA 4:22

Topa in nangmah hong ompih tahen. Note khempeuh tungah Pasian’ hehpihna thupha hong tung tahen.

Zekhariah 13:9

Tua a suakta sehkhatte pen meikhukah ngun a kisiansak bangin, meikhukah kham a kize-et bangin, meikhukah ze-etin ka siangsak ding hi. Amaute in kei tungah thu hong ngenin, kei zong amau’ thungetna ka pia ding hi. Keima mi ahihna uh amaute tungah ka gen ding a, amaute in kei pen amau’ Pasian ka hihna thu a kam uh tawh pulak ding uh hi,” a ci hi.

Isaiah 30:27

En un, Topa’ vangliatna le a minthanna vang, gamlapi panin kimu thei hi. Meikuang le meikhu in ama hehna hong kilangsak a, ama kampaunate, mei bangin a kuang hi.

Isaiah 29:6

Vanglian Topa in vanging, zinling, a ging lianpi, pingpei le huihpi le, a kangtum thei meikuang tawh nang hong hon ding hi.

Malakhi 4:1

Vanglian Topa in hih bangin ci hi: “En un, mi kiphasak khempeuh le migilo khempeuh, a zung a hiang cih om loin buhtu bangin a kattum ding hun hong tung ding hi. Tua ni ciangin khat zong suakta loin a vekpi-in kangtum khin ding uh hi.

Paikhiatna 3:12

Amah in, “Nang tawh kong om taktak ding hi. Hih pen nangma a dingin nangmah kong sawlna lim hi ding hi: Nangmah in Egypt panin mihingte na paikhiatpih khit ciangin, nang in hih mualtungah Pasian na bia ding hi,” a ci hi.

Late 32:6

Tua ahih ciangin nang hong kimuh theih lai-in mihoih khempeuh, nang tungah thu kingensak in. Tua hileh tuikhang in amaute ban lo ding hi.

Isaiah 43:5

Nang hong ompih ka hih manin lau kei in. “Nisuahna lam panin na suanlekhakte kong paipih ding a, nitumna lam panin na mite kong kaikhawm ding hi.

Jeremiah 42:11

Na kihtak uh Babylon kumpipa kihta nawn kei un. Topa in kong cihin-ah, lau nawn kei un. Bang hang hiam cih leh ama khutsung pan a hong honkhia ding le a hong lakhia dingin keimah in note kong ompih hi.

Jeremiah 46:28

Topa in kong cihin-ah, ka nasem Jakob’ suante aw, lau kei un. Bang hang hiam cih leh note kong ompih hi. Note ka hong thehthangna gamte khempeuh ka susia khin ding a, ahih hangin note kong susia khin kei ding hi. A kilawm zahin kong thuhilh ding a, gim pia loin kong mawk koih kei ding hi,” a hong ci hi.

Daniel 3:23

Tua ahih ciangin Shadrak, Meshak, le Abednego-te hencipsa-in meikuangpi laizangah a kiasuk uh hi.

Haggai 1:13

Tua ciangin Topa’ kamtai Haggai in mite tungah Topa’ thugente gensawn a, “Topa in note kong ompih hi,” ci hi, ci-in a gen hi.

JOB (Job) 5:19

Lungkhamna gukvei dong na tuahna-ah amah in nang hong hon ding a, a sagihveina dingah siatna in nang hong su nawn lo ding hi.