Isaiah 22:12 - Tedim Bible

¹² Tua ni ciangin Vanglian Topa Pasian in kahna le thumna, sam mettolna le puanhampi silhna a zang dingin thu hong pia hi.

Tedim Bible Revision 2017

¹² Tua ni ciangin Vanglian Topa Pasian in kahna le thumna, sam mettolna le puanhampi silhna a zang dingin thu hong pia hi.

Isaiah 22:12 Referans Kwoze

Joel 2:17

Topa’ na a sem siampite, biakinn sung innliim le biakna tau kikalah kapin thu ngen uh hen la, “Topa aw, na mite hong hehpih in. Minam dangte in, ‘Na Pasian uh koi-ah om ahi hiam,’ ci-in kote hong simmawhsak kei in. Amaute’ nuihsatin kote hong omsak kei in,” ci uh hen.

Joel 1:13

Siampite aw, puanhampi silhin kap un; biakna tau-a nasemte aw, thumin tau un. Ka Pasian’ na a semte aw, biakinn sungah tum unla, zanthapai-in dahna lim puanhampi silh un. Note’ Pasian’ biakinn sungah piak ding an le leenggahzu khat zong om nawn lo hi.

Micah 1:16

Judah mite aw, na it mahmah na tate uh, sal a suak dingin hong kilaksak ding ahih manin, amaute’ hangin na dahna limun na sam uh met unla, musane bangin na lu uh tolsak un.

Jeim 5:1

A haute aw, tu-in ka thugen hong ngai dih un. Note tungah a hong tung ding lungkhamna hangin kapin thum un.

Amos 8:10

Na lungdam pawite uh dahna ka suaksak ding a, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun pen a tawp dongin nasia semsem ding hi.

Jonah 3:6

Nineveh khua kumpipa in tua thu a zak ciangin a kumpi tokhom tung pan dingkhia-in a kumpi puan suahkhia a, puanhampi silhin vut lakah a tu hi.

Isaiah 15:2

A sangna munte-ah a kap dingin Dibon khuamite paito uh hi. Nebo le Medeba khuate’ hangin Moab mite nakpitakin kap uh hi. Dahna limin lu khempeuh kimettol a, khamul khempeuh zong kimetmai hi.

Thuhilh-sia 3:11

Amah in na khempeuh amau’ hun ciat tawh a kituak dingin a bawl hi. Amah in mailam thu theihnopna lungsim eite tungah hong guan a, ahi zongin ama sepnate a cing a theihzawhna ding hong guan lo hi.

Thuhilh-sia 3:4

Kah hun om a, nuih hun om hi. Dah hun om a, laam hun om hi.

JOB (Job) 1:20

Hih thu a zak ciangin Job dahlua-in a puan balkek a, a sam met khia-in leilakah bok sukin Pasian a bia hi.

Nehemiah 9:9

“‘Nangmah in Egypt gam sunga ka pute ka pate uh’ gimna mu-in San Tuipi-ah hong kikona uh na za a,

Ezra 9:3

Hih thu ka zak ciangin dah mahmahin ka puante balkekin, ka sam le ka khamul botin, cih nading thei loin ka om hi.

2 KHANG TANGTHU NIHNATE 35:25

Jeremiah in zong Josiah’ hangin kah la a phuak hi. Numei lasate le pasal lasate khempeuh in tuni dongin amau’ kahna-ah Josiah tamlawh uh hi. Amaute in Israel sungah hih thu biakna ngeina kipin a bawl uh hi. Kah la sungah tuate kikhum hi.

Isaiah 3:24

Paknamtui tangin uihna, kawnggak tangin khauhualpi, limtak a kizem sam tangin lu kolhna, puan hoih tangin puanhampi, melhoihna tangin maizumna hun hong tung ding hi.

Isaiah 26:10

Migilote tungah nangmah na migit hangin a manin gamtat ding theithei tuan lo uh a, lungsim thutang mite’ gam sungah amaute in khialhna bawllai veve uh hi. Amaute in Topa’ minliatna hong phawk nuam lo uh hi.

Isaiah 29:1

Pasian’ biakna tau, Jerusalem khuapi, David in a sat khuapi, a sia ding hita hi. Kumte, a banbanin paipai sak unla, pawite zong a ngeina bangin kot paipai sak un.

Isaiah 32:11

Nuamtakin a om hithiat numeite aw, ling un. Nomau tumtakin a lungkimte aw, linglawng un. Na puan uh hawkkhia-in na tangguakun om unla na kawng uhah puanhampi teng un.

Isaiah 58:3

“Kote in an tang napi-in bang hangin kote hong phawk lo na hi hiam? Kote kiniamkhiatin om napi-in bang hangin kote hong thei kha lo na hi hiam?” hong ci uh hi. Note in an na tan’ uh ciangin nomau’ deihna na zong uh a, na nasemte uh na nengniam uh hi.

Jeremiah 4:8

Tua ahih manin puanhampi silhin tau-in kap un. Bang hang hiam cih leh Topa’ hehna lauhuaipi eite’ kiang panin kiheikhia nai lo hi.

Jeremiah 7:29

“Jerusalem mite aw, na lu uh mettol un. Na sam uh paimang unla, mualtungah va kap un. Bang hang hiam cih leh Topa in hih a gilo khang mite ka nialzo a, ka taisan khinzo hi.

Jeremiah 16:6

Hih gamah miliante le mineute si ding uh a, kivui loin, amau’ hangin kuamah kap loin, kuamah in a pumpi uh kuiliam loin a sam uh zong a met kei ding uh hi.

Jeremiah 16:8

Pawi kibawlna inn-ah na pai kei ding uh a, amaute tawh a ne a dawnkhawm dingin na tu kei ding uh hi.

Ezekiel 27:31

Nangma hangin a lu uh mettol uh a, dahna limin puanhampi silh uh a, na sa lua-in a kap uh hi.

Daniel 5:1

Kumpi a suah ciangin Belshazzar in pawi lianpi khat bawl a, a mi liante tulkhat samin amaute tawh zu a ne uh hi.

Hosea 9:1

Israel mite aw, midangte bangin lungdamin kipak kei un. Na Pasian uh na nusia uh a, ama tungah na citak kei uh hi. Numei paktatte bangin mun citengah Baal tungah na kizuak uh a, a hong leina ante hangin na lungdam uh hi.

Joel 1:8

Nungak khat, a tenpih ding a lawmpa in a sihsan ciangin a kah bangin note zong kapin thum un.

Isaiah 37:1

Kumpi Hezekiah in a zak ciangin dahin ama puante balkek a, Topa’ inn sungah a pai hi.

Isaiah 37:2

Tua ciangin amah in innsung saipa Eliakim, lai-at pa Shebna, le siampi khangham teng dahna limin puanhampi silh kawmin Amoz’ tapa kamsangpa Isaiah kiangah a sawl hi.

Joel 2:12

Topa in hih bangin ci hi: “Tu mahmah nangawnin lungsim tak tawh kisik kikin, an tangin, kapin, thumna tawh kei kiangah hong paikik un.