Isaiah 14:2 - Tedim Bible

² Israel mite in amaute manin amau’ gamah ciahpih ding uh a, Topa’ gam sungah amaute pen sila numei sila pasal dingin nei ding uh hi. Amaute a man ngei mite pen tu-in amaute in lehmat ding uh a, amaute a nengniam ngei mite tungah tu-in ukna nei ding uh hi.

Tedim Bible Revision 2017

² Israel mite in amaute manin amauʼ gamah ciahpih ding uh a, Topaʼ gam sungah amaute pen sila numei sila pasal dingin nei ding uh hi. Amaute a man ngei mite pen tu-in amaute in leh mat ding uh a, amaute a nengniam ngei mite tungah tu-in ukna nei ding uh hi.

Isaiah 14:2 Referans Kwoze

Isaiah 61:5

Gamdang mite in na tuuhonte uh hong kepsak ding a, khualmite pen note’ lo kho le leenggui puahte hi ding uh hi.

Isaiah 60:14

Nang hong nengniamte’ tate na mai-ah a kunsa-in hong pai ding uh a, nang hong simmawh mi khempeuh na khe mai-ah hong bok ding uh hi. Amaute in nang pen Topa’ khuapi, Israel-te’ Siangtho Pa’ Zion, hong ci ding uh hi.

Jeremiah 30:16

Tua ahih manin no hong thatte kithat ding a, na galte khempeuh uh salin kiman kik ding hi. No hong buluhte kibuluh ding a, no a hong mante, matin omzaw ding uh hi.

Daniel 7:18

Ahih hangin a Lianpen Pasian’ mite in kumpi za ngah ding uh a, a tawntungin a nei paisuak ding uh hi,” hong ci hi.

Isaiah 49:23

Kumpite pen nang hong kem na pate hong hi ding a, kumpinute pen nang hong khoi na nute hong hi ding hi. Amaute in a maitang uh leilak ngatin nang kiangah hong kun ding uh a, na khe-a leivui baangte a liak ding uh hi. Tua ciangin kei pen Topa ka hihna na hong thei ding hi. Kei hong muangte maizum lo ding hi,” a ci hi.

Mangmuhna 3:9

Jew mi hi lo napi-in Jew mi hi ung, ci-in zuau a gen Satan’ pawlte, note’ mai-ah hong paisakin na khephung uhah ka boksak ding a, note ka hong itna thu amaute ka theisak ding hi.

ROM (Romans) 15:27

Hih pen amau ngaihsut tawmna tawh lawptakin a huh uh ahi hi. A taktakin ci lehang hih mizawngte a huh dingun a kilawm mah ahi hi. Bang hang hiam cih leh Jew mite in kha thu tawh kisai nate Gentail mite hawm uh ahih manin Gentail mite in zong leitung nate tawh Jew mite a huh dingun a kilawm khat ahi hi.

Isaiah 18:7

Tua hun ciangin, amau’ gam gunpi in a phelkhap, a vanglian a gualzo minam, a nai a gamla-ah a kikihta mi, a tun sang mi, a cineel mite kiang panin Vanglian Topa’ min omna Zion mual, Vanglian Topa’ tungah letsong hong kipuak ding hi.

Late 68:18

Topa nangmah Pasian tua munah na om theih nadingin a sangna-ah kahto-in salte na paipih a, mihonte le mi lehdote’ tung nangawn panin piakkhong nate na ngah hi.

Efesa 4:8

Tua ahih manin Lai Siangtho sungah, “A sangna munah a paitoh ciangin matsa salte tampi paipih a, mite tungah letsong a pia hi,” ci-in na kigelh hi.

Galati 5:13

Sanggamte aw, note ahihleh a suakta mi ahi dingin Pasian in a hong sap ahi hi. Ahi zongin tua suahtakna pen na pumpi uh ut bangbangin gamtat theih nadingin paulam zonna-in nei kei unla, itna tawh khatlekhat kikhualna-in zangzaw un.

2 KORIN NIHNA 10:5

Mite’ ngaihsutna a man lote ka thalnial gawpzo uh a, Pasian’ thu theih nading a khaktan thei nate ka susiagawp uh a, mi khempeuh’ ngaihsutna zo gawpin Khrih’ thu a mang dingin ka bawl uh hi.

Ezra 2:65

amaute’ nasem numei le pasal mihing - tulsagih le zathum sawmthum le sagihte kisim lo hi. Amaute in lasa numei le pasal mihing zanih nei uh hi.

Luka 12:45

Ahi zongin tua nasempa in a lungsim sungah, ‘Ka topa hong ciahkik hak ding hi,’ ci-in ngaihsunin a naseppih numei le pasalte satgawp hen la, zukham ankhamin ommawk leh,

Isaiah 31:8

“Assiria pen mihing’ namsau ahi lo, namsau khat tawh puk ding a, mihing’ namsau ahi lo, namsau khat in susia ding hi. Namsau panin tai ding uh a, a tangvalte uh zawhthawh thu tawh nasem dingin kikoih ding hi.

Isaiah 45:14

Topa in Israel tungah, “Egypt’ hauhna le Ethiopia sumbuk vante le a tun a sang Seba mite nangma kiangah hong pai-in nangma a’ hong hi ding uh a, amaute in nang hong zui ding uh hi. Amaute sikkhau kibulhsa-in hong pai ding uh a, nangma kiangah hong kun ding uh hi. Amaute in nangma kiangah thumna hong bawl ding uh a, ‘Nangmah bek tawh Pasian omkhawm a, kuamah dang om loin, amah simloh pasian dang om lo hi,’ hong ci ding uh hi.

Isaiah 49:22

Topa Pasian in, “En in, minamte tungah ka khut ka laamto ding a, mite tungah ka lim ka lakto ding hi. Amaute in a angsung uhah na tapate tawi-in hong paipih ding uh a, a liangko tung uhah na tate hong pua ding uh hi.

Isaiah 49:25

Topa in, “A thahatpa’ mat salte kilakhia ding a, a thukhauh pa’ na kilakhia ding hi. Nang hong dem mite keimah in ka dem ding a, na tate ka honkhia ding hi.

Isaiah 54:3

Bang hang hiam cih leh taklam le veilamah nangmah kizelin, na suanlekhakte in minam dangte’ leitang luah ding uh a, a kinusia khuapite mi tawh dimsak ding uh hi.

Jeremiah 49:2

Tua ahih manin, Topa in kong cihin-ah, Ammon gam Rabbah khua kisimin, galdona aw a kizak hun ka tungsak ding hi. Tua khuapi kisusiamang ding a, a khuaneute a kihaltum ding hi. Tua ciangin Topa in kong cihin-ah, Israel mite in a gam uh a laksakte’ kiang panin a gam uh a ngahkik ding uh hi.

Ezekiel 39:10

Amaute in mei cih dingin a kinusia galhiamte nei uh ahih manin gamlakah sing tom kullo ding a, tulakah sing phuk ding zong kisam lo ding hi. Amaute in amau’ na a sutte’ na sutin, a suksiatsakte’ na suksiatsak ding uh hi. Topa Pasian in hih thu ka gen khin hi,” hong ci hi.

Joel 3:8

Na tanute uh le na tapate uh Judah mite tungah ka zuak ding a, amaute in a gamlapi-a om Seba minamte tungah zuaksawn ding uh hi. Bang hang hiam cih leh Topa in gen khinzo hi.

Obadiah 1:17

Ahih hangin Zion mualah pawlkhat va tai ding uh a, tua mun pen a siangtho suak ding hi. Jakob innkuante in amau’ gam mah luahkik ding uh hi.

Zekhariah 2:9

Topa mahmah in note hong su ding a, nidanga note’ na hong sepsak mite in tu-in note’ nate hong lehsuh kik ding uh hi, hong cisak hi. Hih bangin thu hong pian’ ciangin Vanglian Topa in kei hong sawl ahih lamtak na thei ding uh hi.

Siampi Laibu 25:44

Note in na neih theih ding uh sila numei le sila pasalte hih bang ahi hi: Na kimkot uha om minam dangte lak panin sila numei le sila pasal na lei thei ding uh hi.

Isaiah 60:4

Na kimkotah khuadak inla mu in. Na mite kikaikhawmin nang kiangah a ciah dingin hong pai uh hi. Na tapate gamlapi panin hong ciah ding uh a, na tanute naungek bangin hong kipua ding hi.

Isaiah 66:12

Topa in hih bangin ci hi: Tu-in gunpi bangin nopsakna le tuiletkhia bangin minamte’ hauhna ama tungah ka tungsak ding hi. Note pen a nu’ nawi teepin, a ang-ah kipua a, a khuk tungah a diang naungek na bang ding uh hi.

Zekhariah 2:13

Mi khempeuh aw, Topa’ mai-ah gamdai-in om un. Bang hang hiam cih leh a siangtho ama omna mun panin amah hong paikhia ta hi.