Habakkuk 3:2 - Tedim Bible

² Topa aw, nangma sepsa thute ka za a, lamdang ka sa mahmah hi. Na hih ngeisa na liante, kote’ hunin zong hong hih kik in. Na heh hun ciang nangawnin zong hehpihna lungsim hong nei in.

Tedim Bible Revision 2017

² Topa aw, nangma sep sa thute ka za a, lamdang ka sa mahmah hi. Na hih ngeisa na liante, koteʼ hunin zong hong hihkik in. Na heh hun ciang nangawnin zong hehpihna lungsim hong nei in.

Habakkuk 3:2 Referans Kwoze

Late 85:6

Kote in nangmah kong phat theih nadingun ko na mite hong nungtasakkik lo ding na hi hiam?

Kah la 3:32

Dahna hong thuaksak thei ding a, ahih hangin eite a hong itna muanhuai-in kip tawntung hi.

Habakkuk 3:16

Hih thute khempeuh ka zak ciangin ka pumlin’ a, lau lua-in ka muk ling sapsap hi. Ka guh ka taang hong zen a, guh nei lo bangin ka pukcipsuk hi. Ko hong simgawp mite Pasian in gim a piak ding hun daitakin ka ngak khikhe ding hi.

Filippi 1:6

Note sungah hih nasep hoih a hong pankhia Pasian in Jesuh Khrih hong paikik hun ciang dong, mi cingtaak na hih nadingun hong huh ding hi, ci-in teltakin ka thei hi.

Jeremiah 10:24

Topa aw, a hoihbek takin, hehlua loin kei hong hilh in. Hong hehlua lecin kei ka si ding hi.

Isaiah 63:15

A siangtho, a minthang, nangma omna vantung panin hong ensuk inla hong mu in. Nangma deihsakna le na vangliatna koi-ah omta ahi hiam? Na lungsim’ deihna le nangma hehpihna kote a dingin maimangta hi.

Isaiah 54:8

Hehluatna hangin tomno sung nang kiang panin ka maitang ka seel a, ahih hangin tawntung itna tawh nang kong hehpih kik ding hi, nangmah a hong honkhia Topa in ci hi.

Late 119:120

Nang kong zahtakna hangin ka khuasikmul suak a, na thukhennate ka zahtak hi.

Johan 10:10

Gutate pen a gu ding, a that ding, le a siasak ding bekin hong pai hi. Kei ka hih leh tuute a nungta maimai bek hi loin nuntakna cingtaak a neihtheih nadingun a hong pai ka hi hi.

Late 44:1

Pasian aw, ka pu ka pate uh a khan lai-a na hihnasate, amaute in kote tungah hong gen uh a, kote in ka bil uh tawh ka za khin uh hi.

Zekhariah 1:12

Tua ciangin Topa’ vantungmi in, “Vanglian Topa aw, Jerusalem khuapi le Judah gam khuapite tungah kum sawmsagih sung na heh khinta hi. Amaute hehpih loin bang tanvei omlai ding na hi hiam?” ci hi.

Jeremiah 29:10

“Topa in kong cihin-ah: Babylon khua-ah kum sawmsagih na om khit uh ciangin, note kong kan kik ding a, kong kamciamnasa hong tangtung sakin hih munah kong lakik ding hi.

Isaiah 66:2

Hih nate khempeuh keima bawlsa ahih manin hih nate khempeuh keima-a’ ahi hi, Topa in ci hi. Ahih hangin kiniamkhiatin, lungsim a kitamzan mipa, keima thu-ah lau-in a ling kelkel pa, keima deih mipa ahi hi.

Late 38:1

Topa aw, a hehsa-in kei hong taii kei inla, lungsosa in kei hong thuhilh kei in.

Ezra 9:8

Ahi zongin tu-in Topa ka Pasian un tomkha sung kote hong hehpih a, a suakta pawlkhat hong omsakin nangma mun siangtho-ah siksan ding mun nong pia hi. Nangmah in ka mit uh hong vaksakkikin ka salsuahna uhah ka nuntakna uh ka thakpat theih nading uh kalsuan cilna nong pia hi.

Mangmuhna 15:4

Topa aw, nang, kua in hong kihta lo ding a, na liatna hong phat lo ding ahi hiam? Nang bek na siangtho hi. Thumanin na sepnate mi khempeuh in mu uh ahih manin minam khempeuh nang kiangah hong pai-in, na mai-ah hong bia ding uh hi,” a ci uh hi.

ROM (Romans) 10:16

Ahi zongin Isaiah in, “Topa aw, ka thugente uh kua in um ahi hiam?” a cih mah bangin Lungdamna Thu a za mi khempeuh in um kim lo uh hi.

Daniel 9:2

Amah kumpi a suah a kum masa kumin keimah Daniel in, Topa in kamsang Jeremiah tungah Jerusalem kum sawmsagih sung kisia ding hi, ci-in a genna thu ngaihsunin biakna laibute ka sim hi.

Isaiah 53:1

Tua ciangin mite in, “I zak thu kua in um thei ding ahi hiam? Hih bang thu-ah Topa’ vangliatna khut kua in bangci muh theih ding ahi hiam?

Late 78:38

Ahi zongin amah in hehpihna lungsim nei ahih manin amau’ khialhnate maisakin, amaute susia lo hi. Amah in a hehna ip zelzel a, a hehna khempeuh phongkhia lo hi.

Hebru 11:7

Noah in zong a upna hang mah tawh mailam a thupiang ding a muh theih lohpi mahin Pasian’ thugenna na mang a, teembaw khat bawlin a innkuanpihte tawh na suakta hi. Hih bangin a gamtatna tawh leitung midangte a mawh ahihna kilangsak a, a upna hangin mihoih hihna thu Pasian kiang panin a ngah hi.

Daniel 8:17

Gabriel hong pai-in ka kiangah hong ding a, laulua mahmah ka hih manin leitungah ka puk hi. Amah in, “Leitung mi aw, a khiatna thei in. Maangmuhna pen hun beina ding lahna ahi hi,” ci-in ka kiangah a hong gen hi.

Hebru 12:21

Tua pen naklauhuai mahmah ahih manin Moses in zong, “Lau-in ka ling hi,” a na ci hi.

JOB (Job) 42:5

Nidangin mi’ gensawn bekin nang ka hong thei a, tu-in keima mit mahmah tawh nang ka hong mu ta hi.

Late 71:20

Gimna lianpipi a hong tuaksak nangmah in kei nong hingkiksak ding a, lei thukpi sung panin nong lakhiato ding hi.

Jeremiah 10:7

Gam khempeuhte’ Kumpipa aw, nang a hong kihta lo ding kua om ahi hiam? Nang, kihtak ding mah na hi hi. Bang hang hiam cih leh leitung mipil khempeuhte le amau’ gam sung khempeuh lakah nang tawh a kibang kuamah om lo hi.

Jeremiah 46:28

Topa in kong cihin-ah, ka nasem Jakob’ suante aw, lau kei un. Bang hang hiam cih leh note kong ompih hi. Note ka hong thehthangna gamte khempeuh ka susia khin ding a, ahih hangin note kong susia khin kei ding hi. A kilawm zahin kong thuhilh ding a, gim pia loin kong mawk koih kei ding hi,” a hong ci hi.

Habakkuk 3:1

Kamsang Habakkuk in hih bangin thu ngen hi:

Late 25:6

Topa aw, tanglai pek a kipan a omsa ahih manin, na hehpihna le na itna kip hong phawkkik in.