Filippi 1:20 - Tedim Bible

²⁰ Ka si a, ka hing zongin, a diak diakin tu a kipanin a tawntungin midangte in Khrih phat theih nading lungsim hanna a neih theih nadingun ka lungsim le ka pumpi tawh keima tavuan ka lelh hetloh nading pen ka deihdeih, ka lametet bulpi ahi hi.

Tedim Bible Revision 2017

²⁰ Ka si a, ka hing zongin, a diakdiakin tu a kipanin a tawntungin midangte in Khris phat theih nading lungsim hanna a neih theih nadingun ka lungsim le ka pumpi tawh keima tavuan ka lelh het loh nading pen ka deihdeih, ka lam etet bulpi ahi hi.

Filippi 1:20 Referans Kwoze

1 PETER MASA 4:16

Ahi zongin Khristian hihna hangin gimna na thuak uhleh kuamah in maizum ngaihsut kei unla, Khrih min hangin na thuak manun Pasian tungah na lungdam un.

1 KORIN MASA 6:20

Note pen Pasian in a hong leisa na hih manun na pumpi uh Pasian’ minthan nadingin na zang un.

Isaiah 54:4

Lau kei in, maizumna na thuak kei ding hi. Cihna ding thei loin om kei in; maizumin nang hong kikoih lo ding hi. Bang hang hiam cih leh na khangno lai-in na zulhtatna le na meigonna hangin hong kikonate na phawkkha nawn kei ding hi.

1 THESALONIKA MASA 5:23

Nopsakna a hong pia Pasian in na khempeuhah sianthona le kicinna hong pia hen la, na kha uh, na nuntakna uh, le na pumpi uh hoihtakin hong kem hen la, i Topa Jesuh Khrih hong pai ciangin mawhna khat zong a nei het lo dingin hong bawl tahen.

1 JOHAN MASA 2:28

Ka itte aw, Khrih hong kilatkik ciangin lungmuang takin i omtheih nading le ama hong pai Ni ciangin i bukbuk loh nadingin amah tawh kiptakin kipawl ni.

Filippi 2:17

Note’ upna hangin biakpiakna-in keimah hong kigo hitaleh zong, note khempeuh mah bangin kei zong ka lungdam veve ding hi.

ROM (Romans) 8:19

Pasian’ bawlsa khempeuh in Pasian’ tate a hong kilahkhiat hun ding lawp mahmahin a ngak uh hi.

2 KORIN NIHNA 10:8

Bang hang hiam cih leh note’ siat nading hi loin note’ hoihna dingin Topa in kote tungah hong piak thuneihna hong nakzat lua-in ka kisialhpih hangin themkhat zong ka maizum kei hi.

2 KORIN NIHNA 4:10

Kote’ pum tung panin Jesuh’ nuntakna a kilat theih nadingin hih ka leitung pumpi nuntakna mahmah uhah zong Jesuh’ sihna bangmah ka thuak zelzel uh hi.

1 KORIN MASA 7:34

a ngaihsutna uh khen nih pha hi. Pasal a nei lo numeite in a lungsim le a pumpi uh Topa a dingin zangnuam uh ahih manin Topa’ nasep bek kinin nei uh hi. Ahi zongin pasal a nei numeite in a pasal uh a lungdamsak theih nadingun hih leitung vai kinin nei uh hi.

Isaiah 50:7

Topa Pasian in kei hong huh hi. Tua ahih ciangin cih nading thei loin ka om kei hi. Tua ahih manin ka thuak tentan a, hong maizumsak lo ding hi, ci-in ka thei hi.

Late 119:116

Kei ka nuntak theih nadingin na thuciamna tawh kizui-in kei hong huh inla, ka lametna-ah kei hong zahhuaisak kei in.

ROM (Romans) 5:5

Pasian in eite tungah a hong piak a Kha Siangtho tawh eite sungah ama itna hong guang ahih manin hih lametna in eite hong lungkiasak ngei lo hi.

Isaiah 45:17

Ahih hangin Topa in Israel-te honkhia hi. A tawntungin gualzo ding uh a, cikmah hunin maizumna thuak ngei lo ding uh hi,” a ci hi.

Kolose 1:24

Tu-in ka pumpi-in ka thuakna tawh Khrih in ama pumpi ahi pawlpi a dingin a thuak ding a kisam laiteng a kitangcingsak suak ka hih manin note a dingin ka thuakna thu-ah ka lung a dam hi.

ROM (Romans) 12:1

Tua ahih ciangin sanggamte aw, Pasian in eite tam veipi tak hong hehpih ahih manin ama lungkim nading le ama nasep nadingin nomau mahmah a hingtangin Pasian tungah na kipiak nadingun ka hong thum hi. Tua banga kipiakna pen Pasian biakna man taktak ahi hi.

Filippi 1:14

Tua banah keima thongkiatna hangin hih lai-a om Khristiante a tamzaw in Topa muanna-in nei uh a, lau hetloin Pasian’ thu gen ngamna-in neizaw uh hi.

2 KORIN NIHNA 7:14

Titus mai-ah note ka hong kisialhpih ngei a, note in ka kisialhna thu-ah kei na hong zahhuaisak kei uh hi. Note tungah thuman bekbek a hong gen ka hih mah bangun Titus tungah ka kisialhna uh zong a kisial khial ka hihlohna uh hong kilang hi.

2 KORIN NIHNA 5:15

Ama hangin a nungtate, amau a dingin nungta nawn loin, amau’ hangin si-in a kihingkik sakpa a dingin a nuntak theih nadingun mi khempeuh a dingin amah a hong si hi.

1 KORIN MASA 15:31

Sanggamte aw, i Topa Jesuh Khrih thu-ah note hangin ka kisaktheih zah mah bangin nisim mahin sihna a thuakthuak ka hi hi.

ROM (Romans) 9:33

Lai Siangtho in, “En un, keimah in Zion-ah mite a muktuk theih nading, mite a puktheih nading suang khat ka koih hi. Ahi zongin amah a muang mite khempeuh tavai cih om ngei lo ding hi,” ci hi.

ROM (Romans) 6:19

Note’ theihtheih nadingin nisim nuntakna ziate tawh a hong genteh ka hi hi. Nidang lai-in hoih lohna le gitlohna a gamta dingin na pumpi uh na buppiak uh mah bangin, tu-in a man nate a sem dingin na pumpi uh buppiak unla, nuntakna siangtho nei ta un.

ROM (Romans) 6:13

Mawhna gamtat nadingin na pumpi nate uh khat beek na zang nawn kei ding uh hi. Note pen misi hinapi-in a kihingkiksak mite bang na hih manun, a hoihin a hong zattheih nadingin na pumpi bup uh Pasian’ tungah na piazaw ding uh hi.

Sawltak 21:13

Ahi zongin Paul in, “Bang hangin hih bangin kapin ka lungsim a tapkhap nadingin gamta na hi uh hiam? Jerusalem khua-ah khihcipna a thuak ding bek hi loin, Topa Jesuh hangin a si ding ciang dongin a kithawisa ka hi hi,” ci-in a hong dawng hi.

Sawltak 20:24

Ahi zongin Topa Jesuh in kei sep dingin a hong piak, Pasian hehpihna hangin Lungdamna Thu, mite kiangah gen ding nasep ka tangtut zawh nakleh kei nuntakna-ah bangbang hong piang taleh a thupi-in ka ngaihsun kei hi.

Johan 21:19

(Hih bangin a thugenna pen Peter a sih nading zia le Pasian’ min a thansak nading thu a gen nopna ahi hi.) Tua ciangin Jesuh in Peter kiangah, “Hong zui un,” a ci hi.

Paunak 23:18

Tua bang hi lecin lametna om a, cithei-in na khansau ding hi.

Paunak 10:28

Mihoihte’ lametna lungdamna hi a, migilote’ lametna a hawmpi ahi hi.

Late 119:80

Guallelh maizumna ka thuak loh nadingin nangma ngeina kipte a kicing takin a zuizo mi hong hisak ta in.

Late 62:5

Amah bek ka muan ahih manin, daitakin Pasian bek ka ngak hi.

Late 25:2

Ka Pasian aw, nangmah ka hong muang hi. Hong zahhuaisak kei in. Keima tungah ka galte gualzo-in lungdamsak kei in.

Sawltak 4:31

Tua bangin thu a nget khit uh ciangin amaute’ kikhopna mun hong kilinggawp hi. Amaute khempeuh Kha Siangtho tawh kidim uh a, hang takin Pasian’ thu gen ding a kipan uh hi.

2 KORIN NIHNA 3:12

Hih bang lametna nei ka hih manun hangtakin a om ka hi uh hi.

2 KORIN NIHNA 7:4

Note hong muang mahmahin note hangin ka kisathei a, lungkhamna a tuamtuam ka tuah hangin lunghimawh loin ka lungnuam mahmah hi.