Daniel 3:10 - Tedim Bible

¹⁰ Kumpipa in, tumtheihte a hong kitum khit phetin mi khempeuh kham milim mai-ah kunin bia ding uh hi, ci-in thu na pia khinzo hi.

Tedim Bible Revision 2017

¹⁰ Kumpipa in, tum theihte a hong kitum khit phetin mi khempeuh kham milim mai ah kunin bia ding uh hi, ci-in thu na pia khinzo hi.

Daniel 3:10 Referans Kwoze

Daniel 6:12

Amaute khempeuh kumpipa kiangah Daniel a heek dingin a pai uh hi. Amaute in, “Kumpipa aw, tuzawh ni sawmthum sungin kumpipa kiang longal, pasian kiang ahi a, mi khat peuhpeuh kiangah ahi zongin thungen a om leh humpinelkai kikhumna sungah kikhia ding hi, ci-in thupiakna lai hawmkhia-in na min gelh hi lo na hi hiam?” a ci uh hi. Tua ciangin kumpipa in, “Hi mah hi; Media-te le Persia-te’ upadi bangin a kikheel thei lo ding a ngat thupiakna ka bawl hi,” a ci hi.

Johan 11:57

Bang hang hiam cih leh siampi liante le Farisi mite in Jesuh a mattheih nadingun, “Jesuh a omna a thei na om uhleh hong ko un,” ci-in thupiakna nei khinzo uh hi.

Amos 6:5

David bangin la phuah nuam na sa uh a, lasaknate na tum nuam uh hi.

Daniel 3:15

Tua ahih ciangin tu-in peengkulte, tamngaite, laiza lasakna gingte, harp lasakna gingte, gawsem, le tumtheih dang a gingte na zak khit phet uh ciangin kunin milim na bia ding uh hi. Na biak kei uhleh thakhatin mei phualpi sungah hong kikhul ding ahih ciangin a hong honkhiazo ding pasian omin um na hi uh hiam?” a ci hi.

Isaiah 10:1

A cimawhte’ thutang kimlai hei khiatsakin, keima mite sungah a zawngte’ thuman sutkhia-in, meigong numeite’ neihsa amau a’ ding a suahtheihna ding le pa nei lote’ neihsa amau’ nek dingin a bawl theih nadingun a man lo thukhensatna pia a, nenniamna thu a gelhte in gimna ngah ta uh hen!

Thuhilh-sia 3:16

Tua tham loin, hih leitungah gitlohna in thuman thutang a suankhiatna zong ka mu hi.

Late 94:20

Sihna ding ngeina a bawl, a gilo gam ukte, nang tawh kipawl ding ahi hiam?

2 KHANG TANGTHU NIHNATE 29:25

Tua ciangin amah in David le kumpipa’ thumu pa Gad le kamsang Nathan’ thupiakna bangin Topa’ biakinn sungah daltuahte, harp lasaknate, le laiza lasaknate tawh Levi mite a koih hi; bang hang hiam cih leh tua thupiakna pen kamsangte’ tungtawnin Topa’ kiang pan a hong pai ahi hi.

1 KHANG TANGTHU MASATE 15:28

Tua ahih ciangin Israel mi khempeuh in sakite le peengkulte, le daltuahte’ awging tawh kizui-in awng kawmin Topa’ Thuciamna Singkuang paipihto uh a, harp lasaknate le laiza lasaknate tawh nakpitakin la a sa uh hi.

1 KHANG TANGTHU MASATE 15:16

Lungdamna aw ginsak nadingin lasakna nate, harp lasakna le laiza lasaknate le a daltuahte nakpitakin tumin la a sa dingin Levi ukpite in a mipihte uh a sehna ding David in thu a pia hi.

Paikhiatna 1:22

Tua ciangin Faro in a mipihte khempeuh thu pia a, “Hebru mite sung panin tapa a suak khempeuh Nail gun sungah na khia ding uh a, ahi zongin tanu khempeuh na nungtasak ding uh hi,” a ci hi.

Paikhiatna 1:16

“Hebru numeite nau domin, nausuahna tutphah tungah a tut ciangun, tapa ahihleh a naungek na that ding uh a, ahi zongin tanu ahih leh na nungtasak ding uh hi,” a ci hi.

Daniel 3:11

Tua milim mai-ah kun loin, a bia lo khempeuh mei phualpi sungah a kikhul ding ahi hi.