Daniel 2:44 - Tedim Bible

⁴⁴ Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo ding a, tua gam in gamdang khempeuhte zogawpin a kip tawntung ding hi.

Tedim Bible Revision 2017

⁴⁴ Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo dinga, tua gam in gamdang khempeuhte zo gawpin a kip tawntung ding hi.

Daniel 2:44 Referans Kwoze

Mattiu 28:18

Tua ciangin amaute mai-ah Jesuh hong pai a, “Leitungah ahi a, vantungah ahi zongin vangliatna khempeuh kei tungah hong kipia khinta hi.

Late 145:13

Nangma kumpi gam pen a kip tawntung kumpi gam hi a, nangma ukna khang tawntungin a kip hi. A thuciamna khempeuhah Topa thutak mahmah a, a gamtatna khempeuhah zong hehpihna a nei ahi hi.

Daniel 6:26

Ka gam sunga om mi khempeuh in Daniel’ Pasian kihta-in a zahtak nadingun thu ka pia hi. “Bang hang hiam cih leh amah a nungta Pasian hi a, a tawntungin a uk ding hi. Ama gam kisia ngei lo ding a, a vangliatna a bei ngei kei ding hi.

Micah 4:7

Amaute, a cimawhin gamlapi-ah om uh a, ahi zongin keimah in amaute pansa kikin, minam vanglian khatin ka bawlkik ding hi. Tua hun a kipan a tawntungin Zion mual panin amaute ka uk paisuak ding hi.

Mangmuhna 11:15

Tua ciangin a sagihna vantungmi in a peengkul hong tum a, vantungah nakpitakin aw hong ging a, “Leitung uk nading aana neihna pen i Topa Khrih a’ hong suakkhin a, amah in a tawntungin uk paisuak ding hi,” hong ci hi.

Daniel 7:27

“Hih leitung kumpi gam, vangliatna, le liatna khempeuh a Lianpen Pasian’ mite tungah a kipia ding hi. Amau’ kumpi za cikmah hunin bei ngei lo ding a, leitung ukna za a nei khempeuhte in a thu uh mangin amaute’ na a sem ding uh hi,” hong ci hi.

Daniel 4:34

Tua ciangin kumpipa in, “A kisehsa hun a cin ciangin keimah Nebukhadnezzar in vantung lam ka ento a, ka khuatheihna a hong tungkik hi. A nungta tawntung a Lianpen Pasian’ min phatin, zahtakna le minthanna ka pia hi. “Amah in a tawntungin uk ding a, ama gam kip tawntung ding hi.

Isaiah 60:12

Bang hang hiam cih leh nangma na hong sem lo minam le kumpi gam beimang ding a, tua minamte kisia-maimang ding hi.

Daniel 4:3

“Pasian’ hong lah na lamdangte, bangzahin lian ahi hiam? A bawl na lamdangte, bangzahin vanglian ahi hiam? A tawntungin Pasian kumpi hi ding a, amah in a tawntungin a uk paisuak ding hi.

Daniel 2:37

Kumpipa aw, kumpi khempeuh lak pan nang a lianpen na hi hi. Vantung Pasian in kumpi-in nang hong koih a, vangliatna, thahatna, le zahtakna a hong pia hi.

Piancilna 49:10

Judah in kumpi ciangkhut len tawntung ding a, a suan a khakte in zong ukna aana nei tawntung ding hi. Minam dangte in ama tungah siah puak ding a, zahtakna tawh ama mai-ah kun ding uh hi.

Daniel 2:28

Ahih hangin thusim a lak thei vantungah Pasian khat a om hi. Amah in mai lamah bang thu hong piang ding cih nangmah Nebukhadnezzar kumpipa tungah a hong hilhzo hi.

Ezekiel 37:25

A pu a pate uh a tennasa ahi ka nasempa Jakob tungah ka piak leitangah amaute teng ding uh a, amaute bek hi loin a suan a khak dongun tengsuak ding uh hi. Ka nasempa David in amaute uk tawntung ding hi.

Johan 12:34

Tua ciangin mihonte in, “Khrih nungta tawntung ding hi, ci-in Thukham sungah kigen hi. Bang hangin Mihing Tapa kikhaito ding ci na hi hiam? Hih Mihing Tapa kua ahi hiam?” a cih uh ciangin

Daniel 8:25

A lungsim daplan lua ahih manin zuauphuah siamna tawh a hih khempeuh a tangtun ding hi. Amah kiliansak lua-in theihkholh lohin mi tampi susia-in, a lianpen kumpite’ kumpipa nangawn a langpan’ ding hi. Ahih hangin mihing thahatna kizang loin amah a kisusia ding hi.

Daniel 2:34

Tua banga na et laitakin mualtung panin suangtumpi khat kuama khuk lohin hong tuk a, sik le tungman kigawm milim khete dengtanin a kithehthang hi.

Hebru 12:28

Tua ahih manin a kilingsak zo lo Pasian’ gam i ngah manin lungdamin, zahtakna le lamdangsakna tawh Pasian’ lungkimna bangin amah bia ni.

Daniel 2:35

Thakhatin sik, tungman, sumngo, ngun le khamte kitamnen gawp a, khuakhal lai-a ansi zap bangin a leengmang hi. Huih in leenmang khin ahih manin themkha beek a kimu nawn kei hi. Ahih hangin tua suangtum hong khangkhang a, mual cia hong pha-in leitung khempeuh a dim hi.

Daniel 2:43

Sik le tungman kigawm na muh mah bangin tua kumpi gam ukte in kigawm ding hanciamin zileta-in a kimat ding uh hi. Ahih hangin sik le tungman a kimat theih loh mah bangin a kigawm thei kei ding uh hi.

Haggai 2:7

Minam dang khempeuh lokgawp ding ka hih manin a neihsa uh sum le paite, hih munah hong kipuak ding a, biakinn sungah a dimin van hong om ding hi.

2 SAMUEL NIHNA 7:13

Amah in keima min dingin biakinn khat lam ding a, keimah in ama kumpi gam tokhom a tawntungin ka kipsak ding hi.

2 SAMUEL NIHNA 7:16

Na suanlekhakte le na kumpi gam keima mai-ah a kip tawntungin kibawl ding a, na kumpi tokhom kip tawntung ding hi,’ ci-in gen in,” a ci hi.

Daniel 6:27

Amah pen a honkhia pa le a suaktasak pa hi a, vantung le leitungah lim le na lamdangte a bawl hi. Humpinelkaite’ thahatna panin Daniel a suaktasak hi,” a ci hi.

Haggai 2:22

Kumpipa’ gam khempeuh lumletin a vangliatna uh a beisak ding ka hi hi. Leengte le leeng hawlte ka lawnthal ding a, sakol leengte le a tung tuangte puk ding uh a, amaute khatlekhat kithatlum ding uh hi.