Daniel 12:1 - Tedim Bible

¹ Tua ciangin saihadial puan a silh vantungmi in, “Na mite a cing, a lian vantungmi Mikhael hong kilang ding hi. Tua ciangin leitungah mihing a pianzawh a kipan a nasia penpen gimna hun hong tung ding hi. Tua hun a hong tun ciangin Pasian’ laibu sungah a min a kigelh na mite khempeuh kihonkhia ding hi.

Tedim Bible Revision 2017

¹ Tua ciangin saihadial puan a silh vantungmi in, “Na mite a cing, a lian vantungmi Mikhael hong kilang ding hi. Tua ciangin leitungah mihing a pian zawh a kipan a nasia penpen gimna hun hong tung ding hi. Tua hun a hong tun ciangin Pasianʼ laibu sungah a min a kigelh na mite khempeuh kihon khia ding hi.

Daniel 12:1 Referans Kwoze

Jeremiah 30:7

Nu e! Tua ni lianpi hong tung ding a, nidang tawh tehtheih ding hi lo hi. Jakob suante’ gimhun hi ding a, ahih hangin amaute suakta veve ding uh hi.

Mattiu 24:21

Bang hang hiam cih leh leitung piancil a kipan tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi.

Marka 13:19

Bang hang hiam cih leh Pasian in leitung a piansak cil a kipanin tuhun dong, cikmahin tua bang haksatna a om ngei lo, nidang ciangin zong a om ngei nawn lo ding, tua hun laitakin hong tung ding hi.

Daniel 10:13

Persia gam a cing vantungmi in ni sawmnih le khat sung kei a hong nial hi. Tua ciangin kei a hong huh dingin vantungmi thupite khat ahi Mikhael a hong pai hi. Bang hang hiam cih leh Persia gam sungah keimah guak bek ka om hi.

Mangmuhna 12:7

Tu-in vantungah galkidona hong om a, Mikhael le a vantung mite in gulpi le a vantung mite a do uh hi.

Mangmuhna 20:15

A nungta mite a kigelhna laibu sungah a min a om lo peuhmah meiphualpi sungah kilawn hi.

Mangmuhna 20:12

A lian a neu misite tua tokhom mai-ah dingin laibute a kilem ka mu hi. Tua ciangin a nungta mite a kigelhna laibu a dang khat zong a kilem ka mu hi. Amaute’ gamtatna tua laibute sungah a kigelhna tawh kizui-in misite tungah thu a kikhen hi.

Mangmuhna 3:5

A gualzo mite in tua bangin puanpak silh ding uh a, a nungta mite a kikhumna laibu sung panin amaute’ min ka phiat kei ding hi. Ka Pa le ama vantung mite kiangah zong keima mite ahihna uh ka pulak ding hi.

Luka 10:20

Ahi zongin dawite in na thu uh hong manna hangin lungdam kei unla, vantungah na min uh a kigelh manin lungdamzaw un,” a ci hi.

Daniel 9:12

Na gensa bangin kote tung le ko hong ukte tungah na hong bawlzo hi. Leitung a om khuapi dang khatpeuh sangin Jerusalem khuapi a nasia zaw-in gim na pia hi.

Mangmuhna 13:8

Tua ahih manin a kigo Tuuno laibu sungah a nungta ding mite’ min, leitung pianma pekin a kikhumna-ah a kihel lo leitung mi khempeuh in tua ganhing bia ding uh hi.

Mangmuhna 1:5

thuman takin teci a pang, sihna panin a kithokiksak Tapa upa, leitung kumpite tungah ukna aana a nei Jesuh Khrih kiang panin note tungah hehpihna le nopsakna thupha hong tung tahen. Tua Jesuh Khrih in eite hong it a, ama sihna tawh i mawhna panin eite hong suaktasak a,

Juda 1:9

Vantung milian pa Mikhael nangawn tua bangin gamta ngam lo hi. Moses’ luanghawm kituhin Dawimangpa tawh a kitot laitakin Mikhael in Dawimangpa zahkona kammal zang ngam loin, “Topa in nang hong taii ta hen,” ci bek hi.

Filippi 4:3

Hih numei nihte in Klement le a nungta mite a kikhumna Pasian’ laibu sungah a kikhum, ka naseppih dangte khempeuh tawh, lungdamna thu a kizelh nadingin nakpitakin kei tawh na hong semkhawm uh ahih manin, citakin kei tawh na a semkhawm note in zong amau tegel na huh nadingun ka hong thum hi.

Efesa 1:21

Vantungah ukna, aana, vangliatna a neite khempeuh tungah Khrih in ukna aana nei lai a, hih leitung bekah hi loin a hong tung ding leitungah zong amah a lianpen ahi hi.

ROM (Romans) 11:26

Tua hi a, Lai Siangtho sungah a kigelh mah bangin Israel mite khempeuh in hotkhiatna ngah ding uh hi. Lai Siangtho in, “Zion panin Honpa hong pai ding a, Jakob’ suanlekhakte sunga om gitlohna khempeuh maisak ding hi.

Ezekiel 13:9

Zuauthu tawh maangmu kineihin, mite a khialh theih nadingin zuauthu a genkhol no kamsangte gim a hong pia ding ka hita hi. Ka mite a kikhop uh ciangin tuate lakah na kihel kei ding uh a, Israel mite’ min a kigelhna lakah note’ min kigelh lo ding hi. Na gam uhah na ciahkik ngei nawn kei ding uh hi. Tua ciangin Topa Pasian ka hihna thu na hong thei ding uh hi.

Isaiah 9:7

Tuhun a kipanin a tawntungin David kumpi tokhom tung le ama gam sungah thutang le thuman phutin, a lian semsem ama ukna le nopsakna in mong nei lo ding hi. Vanglian Topa’ deih luatna in hih thu hong tungsak ding hi.

Isaiah 4:3

Topa in thukhenna le meihalna tawh Zion mite’ mawhna teng siangsakin, Jerusalem khuasung panin mi thahna teng a beisak ciangin Zion-ah a omlai mi, Jerusalem-ah khang tawntungin a om dingin a kiciamtehsa mite khempeuh, a siangtho kici ding hi.

Late 69:28

A nungtate’ laibu sung panin amaute kiphiatsak inla, miphate lakah a min uh kikhumsak kei in.

Late 56:8

Ka sin linnate khempeuh nangmah in na ciamteh khin hi. Ka khituite khempeuh na thawl sungah thun in. Tuate na laibu sungah kiciamteh hi lo ahi hiam?

Mangmuhna 17:14

Amaute in Tuuno a sim ding uh hi. Ahi zongin Tuuno pen kumpite’ Kumpi, topate’ Topa ahih manin, amah le ama sap, a teel, citakin amah a zuite in tua kumpi sawmte a zogawp ding uh hi,” hong ci hi.

ROM (Romans) 11:15

Amaute a kinialna hangin Pasian tawh leitung mi khempeuh kipawl theihna piang ahihleh amaute a kisan’ hun ciangin a sisate nangawn a hinkikna hong hita ding hi.

Daniel 11:45

Amah in a kumpi puanbuk lianpite biakinn dinna mualtung le tuipi kikalah a lam ding hi. Ahih hangin amah a si ding hi. Bang hang hiam cih leh amah a huh ding kuamah a om kei hi,” a hong ci hi.

Ezekiel 34:24

Topa ahi keimah, amaute’ Pasian ka hi ding a, ka nasempa David, amaute a ukpa hi ding hi. Topa ahi keimah in hih thu ka gen khin hi.

Mangmuhna 7:14

“Ka thei kei hi, topa aw. Nangmah in na theizaw ding hi,” ka ci hi. Tua ciangin amah in keima kiangah, “Hih mite pen bawlsiatna lianpi thuakin a hong suakta mite ahi uh hi. Amaute in a puan uh sawpsiangin Tuuno sisan tawh a paaksak uh ahi hi.

Ezekiel 5:9

Ka deih loh hih nate khempeuh na gamtatna hangin cikmahin ka hih ngei nai loh, cikmah ciangin zong ka hih nawn loh ding thu tawh nang Jerusalem gim kong pia ding hi.

Daniel 7:10

tua sung panin meikuang a hong leengkhia niloh hi. Ama nasem ding mihing tul za tampi om a, a mai-ah mihing tul za sawm tampi a ding uh hi. Thukhenna ding hun kipan a, laibute a kiphen hi.

Joel 2:2

Tua ni pen a mial, a lungzinhuai, meii kai-in khuazin’ ni ahi ding hi. Mualtung a meiipi kai bangin simzawh lohin kauphe honpi hong leeng muaimuai hi. Cikmahin hih bang thu omngei nai lo a, cikmah ciangin zong omkik nawn lo ding hi.

Malakhi 3:16

Topa a zahtak mite khatlekhat tua bangin thu kigen uh a, amaute’ thugennate, Topa in ngai-in za hi. Topa in laibu khat nei a, amah zahtakin a thupi ngaihsut mite khempeuh tua sungah kiciamteh hi.

Jeremiah 30:10

“Tua ahih manin Topa in kong cihin-ah: Ka nasempa Jakob’ suante aw, lau kei un. Israel mite aw, patau kei un. Bang hang hiam cih leh gamlapi gam panin no kong honkhia ding a, na suan na khakte uh a saltanna uh panin ka honkhia ding hi. Jakob’ suante hong ciah ding uh a, nuamtakin a tengkik ding uh hi. Kuamah in amaute a lausak nawn kei ding hi.