Amos 9:10 - Tedim Bible

¹⁰ Keima mite’ sung panin, “I tungah siatna hong tung ngei lo ding hi,” a ci mawhneite khempeuh, gal sungah si ding uh hi.

Tedim Bible Revision 2017

¹⁰ Keima miteʼ sung panin, “I tungah siatna hong tung ngei lo ding hi,” a ci mawhneite khempeuh, gal sungah si ding uh hi.

Amos 9:10 Referans Kwoze

Amos 6:3

Note’ tungah siatna hong tun ni ding, a kipelh theih nading na hanciam uh a, ahi zongin tua bang na hihnate un, siatna khangsak semsem zawsop hi.

Isaiah 33:14

Zion-a a om mawhnei mite lau uh a, Pasian’ thu a ngaihsun lo mite lau-in lingcip uh hi. Amaute in, “Pasian’ thukhenna pen a kuang tawntung mei tawh kibang hi. Tua bang meikuang kua in thuakzo ding ahi hiam?” ci uh hi.

Malakhi 4:1

Vanglian Topa in hih bangin ci hi: “En un, mi kiphasak khempeuh le migilo khempeuh, a zung a hiang cih om loin buhtu bangin a kattum ding hun hong tung ding hi. Tua ni ciangin khat zong suakta loin a vekpi-in kangtum khin ding uh hi.

Malakhi 3:15

I muhna bang leh, mi kiphasakteng mah in thupha ngahin nuamsa uh hi. Mi gamtatsiate ahihleh citheibek loin, a gamtatsiatnate uh tawh Pasian ze-et napi-un bangmah tuak se lo uh hi,’ na ci uh hi,” a ci hi.

Amos 6:1

Israel minamte in muanin a hong neih, i minam lakah ulian ahi, Zion-ah nuamtakin a om hithiat, Samaria-ah lungmuang takin a om note a dingin zumhuai mahmah hi.

Jeremiah 18:18

Tua ciangin amaute in, “Hong pai un, Jeremiah sawm ni. Bang hang hiam cih leh eite a hong hilh dingin siampite ahi zongin, i dot ding mipilte ahi zongin, Pasian’ thu a hong gen dingin kamsangte ahi zongin i nei hi. Hong pai un, amah mawhsakin ama thu peuhmah mal khat zong i mang kei ding hi,” hong ci uh hi.

Isaiah 56:12

Amaute in, “Hong pai un, leenggahzu nene ni; khamtheihzu dawndawn ni. Zing ciangin zong tuni sangin nuamzaw lai ding hi,” a ci uh hi.

Thuhilh-sia 8:11

A mawhte gim kipia pahpah lo ahih manin mihingte in khialh ding haksa sa lo uh hi.

Late 10:11

Ama lungsim sungah, “Hih thute pen Pasian in mangngilh hi; a mai seel hi, en lo ding hi,” ci-in a ngaihsun hi.

Ezekiel 20:38

Note lak panin a lehdo thei mite le kei tungah hong mawh mite ka lakhia ding hi. Tu laitakin a ompakna uh gam panin ka lakhia ding a, ahi zongin Israel gamah ka ciahsakkik kei ding hi. Tua ciangin Topa ka hihna thu na thei ding uh hi,” a hong ci hi.

Jeremiah 23:17

Keimah Topa’ thugennna a hong ngai lo mite kiangah, hong hoih na ve, ci-in a gen tawntung uh hi. Amau’ lungsim’ deihna bang ciat bek a zui tentan mi khempeuhte kiangah zong, gimna hong tung zenzen lo ding hi, ci-in a gen uh hi,” a ci hi.

Amos 9:8

Keimah in hih a khial Israel kumpi gam ka encik a, hih leitung panin amaute ka susia ding hi. Ahi zongin a vekpi-un susiamang loin pawlkhat ka sitlai ding hi.

Zekhariah 1:6

Ahi zongin ka nasem ahi kamsangte’ tungtawnin ka hilhkholhna le ka thupiaknate in note dongin hong sukhalo ding sa na hi uh hiam, ka ci hi. Tua ahih ciangin a tawpna-ah amaute kisik uh a, hih dinga ka lungsimah ka geelsa bangin amau’ gamtatna tawh kizui-in gim a pia ka hihna thu a phawk uh hi,’ ci in,” a ci hi.

Jeremiah 29:32

Topa in kong cihin-ah: En un, keimah in Nehelam khuami Shemaiah le a suan a khakte gim ka pia ding hi. Amah in keimah hong langpanna ding thu gen ahih manin ka mite a dingin a hoih ka bawl ding nate, amah le a suan a khakte khat beek in a mu kei ding uh hi, ci-in gen in,” hong ci hi.

Micah 3:11

Khuapi ukte in sumgolh ngahtheihna ding ngaihsutna bek tawh thu khen a, siampite in sum ngahtheihna ding ngaihsutna bek tawh thu gen a, kamsangte in zong sum ngahtheihna ding ngaihsutna bek mah tawh mailam thu genkhol uh hi. Tua bang hinapi-in amaute in Topa, muanin nei uh a, “Topa in eite hong ompih a, eite tungah siatna hong tung lo ding hi,” a ci uh hi.