Amos 7:2 - Tedim Bible

² Kauphe in gam sung lopate a gaih khit ciangin, keimah in Topa tungah ka thum a, “Topa Pasian aw, na mihingte’ mawhna maisak in. Amaute minam tawm hi a, zawngkhal uh ahih manin bangci-in thuakzo ding ahi uh hiam?” ka ci hi.

Tedim Bible Revision 2017

² Kauphe in gam sung lopate a gaih khit ciangin, keimah in Topa tungah ka thum a, “Topa Pasian aw, na mihingteʼ mawhna maisak in. Amaute minam tawm hi a, zawngkhal uh ahih manin bangci-in thuak zo ding ahi uh hiam?” ka ci hi.

Amos 7:2 Referans Kwoze

Ezekiel 11:13

Tua bangin thu genin ka om laitakin Benaiah’ tapa Pelatiah hong dinsih hi. Kei zong leilakah boksukin ka kiko a, “Topa Pasian aw, Israel gam sungah a omlai mi khempeuh thah khit sawm na hi hiam?” ka ci hi.

Isaiah 37:4

A nungta Pasian a zahko dingin ama topa, Assiria kumpipa in a sawl a ulianpa’ thugente, Topa na Pasian in za hen la, tua bang thu a gente gim pia tahen. Tua ahih ciangin a omlai i mite a dingin thu ngen in,’ ci hi,” ci-in a gen uh hi.

Ezekiel 9:8

Tua bangin mi a kithah laitakin keimah guak ka om hi. Kei zong lei-ah bokin, “Topa Pasian aw, Jerusalem tungah na hehna hangin Israel mi a omlaisun khempeuh that mangkhin ding na hi hiam?” ci-in ka kiko hi.

Jeremiah 42:2

kei kiangah, “Kong thumna uh hong ngai inla, a hong kinusia ko teng a dingin Topa na Pasian kiangah thu hong ngetsak in. Bang hang hiam cih leh khatvei lai-in mi tampi ka hih uh hangin tu-in nong muh bangin mi tawmno khat bek ka hita uh hi.

Jeremiah 14:7

Ka mite in kei tungah, ‘Topa aw, ka mawhna uh kote’ langkhatah hong pang ahi ta zongin nangma min hangin kote hong hehpih in. Kote in tam veipi nang kong nungngat uh a, nangma tungah ka hong khial khinzo uh hi.

Paikhiatna 10:15

Bang hang hiam cih leh tuate in lei maitang khempeuh tuam uh a, leitang mial hi. Tuate in leitang tunga kung khempeuh le gialpi’ den baang singkung gah khempeuh ne uh hi. Egypt leitang tung khempeuhah gamlak singkung hitaleh kungno hitaleh a hing khat beek om nawn lo hi.

Mangmuhna 9:4

Amaute in lopate, singkungte a kipan a hing khat peuhpeuh bangmah cih loin, a taltang uhah Pasian’ ciaptehna a om lo mite bek a gimsak nadingun thu a kipia hi.

Zekhariah 4:10

A maa uh a telh loh manun ka mite lungkia uh a, ahi zongin Zerubbabel in biakinn lam nasep a makaihna a muh uh ciangin a lung uh damkik ding hi,” hong ci hi. Vantung mi in, “Meivak sagihte pen, leitung khempeuh a etna Topa’ mittang sagih ahi hi,” hong ci hi.

Amos 7:5

Tua ciangin Topa Pasian kiangah ka thum a, “Topa aw, khawl dih in. Na mite, minam tawm hi a, zawngkhal mahmah uh ahih manin bangci-in thuakzo ding uh ahi hiam?” ka ci hi.

Daniel 9:19

Topa aw, kong thungetna uh hong za inla, ka mawhna uh hong maisak in. Topa aw, hong ngai inla hong sem in! Mi khempeuh in Pasian na hihlam a hong theih nadingun hong zekai kei in. Hih khuapi le hih mite na neihsa ahi hi,” ka ci hi.

Isaiah 51:19

Nang tungah siatna le maimanna, kialpi le namsau, hih thu nih hong tungzo hi. Kua in nang hong dahpih ding ahi hiam? Kua in nang hong hehnem ding ahi hiam?

Late 12:1

Topa aw, hong huh in; bang hang hiam cih leh mihingte lak panin mi thumante maimang ta a, mipha khat zong om nawn lo hi.

Paikhiatna 34:9

Amah in, “Tu-in na muhna-ah maipha ka muh leh, Topa aw, kong thum hi; lungkhauh mite ka hita uh zongin kote’ kiangah Topa hong pai in. Kote’ mawhna le kote’ khialhna hong maisak inla, nangma mi dingin kote hong sang in,” a ci hi.

Joel 2:17

Topa’ na a sem siampite, biakinn sung innliim le biakna tau kikalah kapin thu ngen uh hen la, “Topa aw, na mite hong hehpih in. Minam dangte in, ‘Na Pasian uh koi-ah om ahi hiam,’ ci-in kote hong simmawhsak kei in. Amaute’ nuihsatin kote hong omsak kei in,” ci uh hen.

Amos 4:9

Na ankungte uh lung nesakin ka vulsak a, na ankungte uh cinasakin a kang dikdekin ka bawl hi. Na huante uh le na leenggui lote uh a hawmguakin ka koih hi. Na theikungte uh le na oliv kungte uh kauphe in gai khin hi. Tua bang hinapi-in kei lamah nong kihei kei uh hi, Topa in ci hi.