Amos 5:16 - Tedim Bible

¹⁶ Tua ahih ciangin Topa, Vanglian Pasian in hih bangin ci hi: Mihon omna lamkabom khempeuhah mite in na sa-in thumin tau ding uh a, kongzing khempeuhah kap ding uh hi. Khuaneu a mite a thum dingin kisam ding a, a kah siam mite a kap dingin kicial ding hi.

Tedim Bible Revision 2017

¹⁶ Tua ahih ciangin Topa, Vanglian Pasian in hih bangin ci hi: Mihon omna lamka bom khempeuh ah mite in na sa-in thumin tau ding uh a, kongzing khempeuh ah kap ding uh hi. Khua neu a mite a thum dingin kisam dinga, a kah siam mite a kap dingin kicial ding hi.

Amos 5:16 Referans Kwoze

Joel 1:11

Lokhote aw, dah un; leenggui ciingte aw, kap un; mangbuh le mangbuhham, lo an khempeuh a beita hi.

Jeremiah 9:10

“Mualte a dingin kapin tau unla, gamlak lonona munte a dingin thumin tau un. Bang hang hiam cih leh tuate keu gawp a, kuamah pai nawn lo hi. Bawng ham zong kiza nawn lo a, vana leeng vasate le gamsate a taimangta uh hi.

Mangmuhna 18:19

A kah a thum kawmun a lu tung uhah leivui thehin kap uh a, “Tuipi teembaw a nei khempeuh in a hauhlawh uh hih khuapi bangzah takin lauhuai-in nasia ahi hiam? Nai khat sungin maimangta hi.

Mangmuhna 18:10

Ama thuakna kihta-in a gamlapi-ah om ding uh a, “Hih a vanglian Babylon khuapi in a thuakna, bangzah takin lauhuai-in, bangzah takin nasia! Nai khat sung bekin hih zah gimna thuak!” ci ding uh hi.

Micah 2:4

Tua bang hun hong tun ciangin mite in note’ gim ngahna thugentehna-in zangin, dah la phuakin sa ding uh a, “Eite i sia khin taktak hi. Topa in i gam hong laksak a, ei a hong mante tungah hong piaksak hi,” ci ding uh hi.

Micah 1:8

Tua ahih manin kei kapin ka thum ding a, ka dahna thu ka lah nadingin khe guak le guaktangin ka vak ding hi. Gam-ui bangin ka ham ding a, vasa-kalaoh bangin ka tau ding hi.

Amos 8:10

Na lungdam pawite uh dahna ka suaksak ding a, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun pen a tawp dongin nasia semsem ding hi.

Amos 5:27

Damaskas khengin gamdang khatah sal dingin note kong paisak ding hi, Vanglian Pasian min a nei Topa in ci hi.

Amos 3:13

Tu-in ngai un: Jakob’ suanlekhakte hilhkhol un, Vanglian Pasian ahi, Topa Pasian in ci hi.

Joel 1:14

An tan’ ding thu pia unla, a thupi biak kikhopna bawl un. Note’ Topa Pasian’ biakinn sungah makaite le gammi khempeuh kaikhawm unla, Topa’ tungah kiko-in thum un.

Joel 1:8

Nungak khat, a tenpih ding a lawmpa in a sihsan ciangin a kah bangin note zong kapin thum un.

Jeremiah 4:31

Nau a suak ding numei a kiko bang khat ka za a, tacil a suak numei’ tauna tawh kibang hi. Zion’ tanu husam liangin a kikona aw na hi a, a khut tegel zakin, “Gimna ka thuak ding hi. Kei hong that ding uh hi,” a ci hi.

Isaiah 22:12

Tua ni ciangin Vanglian Topa Pasian in kahna le thumna, sam mettolna le puanhampi silhna a zang dingin thu hong pia hi.

Isaiah 15:8

Bang hang hiam cih leh Moab gam kiim khempeuhah kahna aw a ging hi. Kahna in Eglaim khua ban a, kahna in Beerelim khua zong a ban hi.

2 KHANG TANGTHU NIHNATE 35:25

Jeremiah in zong Josiah’ hangin kah la a phuak hi. Numei lasate le pasal lasate khempeuh in tuni dongin amau’ kahna-ah Josiah tamlawh uh hi. Amaute in Israel sungah hih thu biakna ngeina kipin a bawl uh hi. Kah la sungah tuate kikhum hi.

Jeremiah 30:5

“Topa in kong cihin-ah: Launa le patauhna aw ka za a, lungnopna aw ka za kei hi.

Hosea 4:3

Tua ahih ciangin leitang keugaw-in a tunga teng khempeuh si ding a, leitung a om gamsa khempeuh le huihlaka leeng vasa khempeuh tawh si mang ding uh a, tuipi sunga om ngasate nangawn si mang ding hi.

Joel 1:15

Kalai! A hun hong naita! Topa’ ni hong naita a, Vanglianpa’ suksiatna hun hong naita hi.

Amos 8:3

Tua ni ciangin kumpi inn-ah lungdam lasakna awgingte, kahna awging suak ding hi. Mun khempeuhah misi dim ding a, mun citengah kipaithangin gamdai ding hi,” Topa in ci hi.

Jeremiah 9:16

Amaute le a pute a pate’ theih ngei lohna gam dangah ka kithehthangsak ding a, a sih khit dong uh namsau ka nungdelhsak ding hi,” hong ci hi.