Amos 1:14 - Tedim Bible

¹⁴ Tua ahih ciangin Rabbah khuapikulh ka haltum ding a, a munmuanhuai teng khempeuh kangtum ding hi. Galdo a kikona aw ging ding a, tua kidona awging khuapi huihnung bang ding hi.

Tedim Bible Revision 2017

¹⁴ Tua ahih ciangin Rabbah khuapi kulh ka hal tum dinga, a mun muanhuai teng khempeuh kaang tum ding hi. Galdo a kikona aw ging dinga, tua kidona awging khuapi huihnung bang ding hi.

Amos 1:14 Referans Kwoze

Amos 2:2

Tua ahih ciangin Moab gam sung khempeuh ka kangtumsak ding a, Kerioth khuapi munmuanhuai teng a kangtum ding hi. Galkapte’ otna le peengkul kitumna lak, galkidona gamlum sungah Moab mite si ding uh hi.

Jeremiah 49:2

Tua ahih manin, Topa in kong cihin-ah, Ammon gam Rabbah khua kisimin, galdona aw a kizak hun ka tungsak ding hi. Tua khuapi kisusiamang ding a, a khuaneute a kihaltum ding hi. Tua ciangin Topa in kong cihin-ah, Israel mite in a gam uh a laksakte’ kiang panin a gam uh a ngahkik ding uh hi.

Thu-hilhkikna 3:11

(Bang hang hiam cih leh Bashan kumpipa Og bek Refaim gam sungah a omlai ahi hi. Ama lupna a han pen suang han hi a, Ammon mite’ khuapi Rabbah-ah tua han omlai hi lo ahi hiam? Tua han a sauna pi sawm le li dektak hi a, a zaina pi guk ahi hi.)

Isaiah 30:30

Topa in heh mahmahna le a kangtum thei meikuang sung panin vanging, huihpi, le gialpi tawh, ama liatna minthanna aw kizasakin, ama khut a vik sukna kimusak ding hi.

2 SAMUEL NIHNA 12:26

Tu-in Joab in Ammon khuapi Rabbah simin a khuapi tuikhuk la hi.

Zekhariah 7:14

Tua ahih manin Topa in, “Huihpi’ mutkhiat bangin amaute thehthang gawpin, a theihngei nai lohna uh gam dangah amaute teng ding uh hi. Amau’ nusiat leitang hoih zong gamkhing suak ding a, a tungah kuamah om nawn loin daicip ding hi,” a ci hi.

Daniel 11:40

“Syria kumpipa’ hun a bei dektak ciangin, Egypt kumpipa in amah a sim ding hi. Syria kumpipa in a thaneihteng siit loin tuikhang bangin sakol tawh, sakol galkapte tawh, teembaw tampi tawh Egypt a do ding hi.

Ezekiel 25:5

Rabbah khuapi pen kalaoh khua ka suaksak ding a, Ammon khuapi dangte zong tuukhawk ka suaksak ding hi. Tua ciangin Topa ka hihna thu nong thei ding uh hi.

Isaiah 9:5

Galkap hangte’ khedap khempeuh le si a baang puan khempeuh mei-in kicih ding hi.

Late 83:15

na khuapi huihpi tawh amaute delh inla, na huihpi tawh amaute lausak gawp in.

JOB (Job) 39:25

Peengkul a kitum ciangin ham hathat uh a, gal mai a tun ma-un gal gimnam za uh a, galkapmangte’ thupiakna awging a za uh hi.

2 SAMUEL NIHNA 11:1

Galdo dingin kumpite a kuankhiat hun tua kum phalbi sungin David in Joab, le amah tawh a om a nasemte, le Israel-te khempeuh sawl a, amaute in Ammon mite sugawpin Rabbah khua umcih uh hi. Ahih hangin David Jerusalem-ah om hi.

1 KHANG TANGTHU MASATE 20:1

Khuakhal sungin galsimin kumpite kuankhia zel uh hi. Tua bang hunhoih khuakhal hong tun ciangin Joab in galkapte kuan khiatpihin Ammon mite’ gam sugawp a, hong pai-in Rabbah khua umcih hi. Ahih hangin Jerusalem-ah David om hi. Tua ciangin Joab in Rabbah khua vatin lumlet hi.

Isaiah 29:6

Vanglian Topa in vanging, zinling, a ging lianpi, pingpei le huihpi le, a kangtum thei meikuang tawh nang hong hon ding hi.

Jeremiah 23:19

En un, Topa’ hehna huihpi hong nung hi. A hehna huihpi hong kinuai nainai-in hong paikhia ta a, migilo pa’ lutang hong kidenna ding hi.

Ezekiel 21:20

Tua lamka khat in Ammon mite’ khuapi Rabbah-ah kumpipa a tun theih nadingin lak ding a, a khat pen in Judah gam sunga om Jerusalem khuapi sung teek a tun nadingin lak ding hi.

Ezekiel 21:22

Jerusalem-ah a pai ding ai a phatna a lak a thaltangte a taklam khutah a tawi hi. Tua ai in Jerusalem-ah a pai nading, galnanna ding phung a cianna ding, galsim nadingin a kikona ding, kulhpite satkhapna ding molhtumte a bawlna ding, kidalna ding phung bawlin dumte a tawhna ding a gen hi.

Ezekiel 25:7

Hih bangin gamta se na hih manun note’ nate hong sutgawp ding minamte’ khut sungah kong pia ding hi. Note hong sumaimang ding ka hih manin a minamin ahi a, a gamin ahi zongin na dingzo nawn kei ding uh hi. Tua ciangin Topa ka hihna na hong thei ding uh hi, ci-in gen in,” a hong ci hi.

2 SAMUEL NIHNA 12:31

Amah in a sunga om mite paikhiatpihin singatnate, tuzumte, le heite tawh na a sem dingin koih a, leiseek seekna-ah amaute na semsak hi. Tua bangin Ammon mite’ khuapi khempeuh a hih hi. Tua ciangin David le mi khempeuh Jerusalem-ah a ciah uh hi.

Ezekiel 21:25

“A gilo, a siangtho lo, Israel gam uk migilo pa aw, nang’ hun zong hong tungta a, gim na tuah ding ni hita hi.