2 PETER NIHNA 1:3 - Tedim Bible

³ Ama minthanna le a hoihnate a neikhawm dingin a hong sampa i theihna hangin Pasian’ deih bangin biakna mantak i nuntak theih nadingin ama vangliatna in eite’ kisap na khempeuh a hong pia hi.

Tedim Bible Revision 2017

³ Ama minthanna le a hoihnate a neikhawm dingin a hong sam pa i theihna hangin Pasianʼ deih bangin biakna mantak i nuntak theih nadingin ama vangliatna in eiteʼ kisap na khempeuh a hong pia hi.

2 PETER NIHNA 1:3 Referans Kwoze

1 PETER MASA 5:10

Tawlkhat na thuak khit uh ciangin, Khrih tawh na kipawlna hangun tawntung minthanna a ngah dingin note a hong sam, hehpihna kicingin a nei Pasian in note a cingtaakin hong bawl ding a, kipna, thahatna, bulkip kician hong pia ding hi.

2 TIMOTI NIHNA 1:9

Eite’ sepzawhna hang hi loin ama ngimnasa bang leh a dikna hangin Pasian in eite hong honkhia-in ama mi dingin a hong sam hi. Pasian in leitung a pianma pekin Khrih Jesuh tungtawnin tua dikna a hong piak hi a,

Late 84:11

Bang hang hiam cih leh Topa Pasian pen eite a hong hupa a minthang i kumpi hi a, maipha le pahtawina a hong piapa ahi hi. Thumanin a gamta mite tungah Topa in na hoih bangmah siit lo hi.

ROM (Romans) 8:32

Ama Tapa nangawn siit loin eite khempeuh a dingin hong piakhia ahih manin, na dang khempeuh zong hong piazaw kan ding hi lo ahi hiam?

2 KORIN NIHNA 12:9

Ahi zongin Topa in kei kiangah, “Na tha a nem ciangin keima vangliatna hat mahmah ahih manin nangma kisapna pen keima hehpihna hi bek hi,” ci-in hong dawng hi. Tua ahih manin keima sungah Khrih vangliatna hong omtheih nadingin lungdam takin ka thaneemna ka kisialhpih semsem hi.

1 PETER MASA 2:21

Khrih mahmah in zong note a dingin thuakin, ama khekhap na zuihtheih nadingun etteh ding lim hong nusiat ahih manin hih bangin a thuak ding mahin Pasian in note a hong sam ahi hi.

2 THESALONIKA NIHNA 2:14

Topa Jesuh Khrih tawh minthanna na ngahkhawm theih nadingun note tungah ka hong hilh uh Lungdamna Thu tawh hih nopsakna ah Pasian in note a hong sam ahi hi.

1 PETER MASA 2:9

Ahi zongin note pen Pasian in a hong teelkhiat minam, Kumpi siampi pawl, a siangtho minam, Pasian’ mite na hi uh a, khuamial sung panin a lamdang mahmah ama khuavak sungah a hong samkhia pa’ nasepna a lamdangte a genkhia dingin Pasian in a hong teel mite na hi uh hi.

1 THESALONIKA MASA 2:12

Note hong hehnemin ka hong hanthawn uh a, amah tawh ukna le minthanna a ngahkhawm dingin a hong sam Pasian’ lungkimna bangin na gamtat theih nadingun ka hong gengen uh hi.

1 THESALONIKA MASA 4:7

Eite a thanghuai gamtat dingin Pasian in a hong sam hi lo a, a siangtho-in a nungta dingin a hong sam ahi hi.

1 PETER MASA 1:15

Note a hong sampa a siangtho ahih mah bangin note zong na gamtatna khempeuh uhah na siangtho un.

Efesa 4:1

Tua ahih ciangin Topa’ na ka sepna hangin thong a kia keimah in note’ nuntakzia dingin a hong deihna tawh a kilawm a kituakin na nuntak nadingun ka hong hanthawn hi.

1 KORIN MASA 1:9

Ama Tapa ahi i Topa Jesuh Khrih tawh a kikhawl dingin a hong sam Pasian pen a citak Pasian hi a, a gensa bangin a hong tungsak takpi ding ahi hi.

2 PETER NIHNA 1:2

Pasian le i Topa Jesuh na theihna uh hangin hehpihna le nopsakna thupha note tungah tampi tak hong tung tahen.

2 PETER NIHNA 1:5

Hih thu hangin na upna ban uhah gamtat hoihna na behlap unla, na gamtat hoihna uh thutheihna tawh na behlap un;

1 PETER MASA 3:9

Hong bawlsiate siatna tawh thukkik loin hong samsia mite samsia kik kei unla, Pasian in note a hong sap lai-in thupha a hong piak dingin hong ciamsa ahih manin, hong siat bawlte thupha tawh na thukzaw un.

Kolose 1:16

Vantung le leitungah a om na khempeuh, kha thu tawh kisai vangliatna, tote, mi ukte, aana neihnate a kipan a kimuthei hitaleh a kimu thei lo hitaleh na khempeuh, Pasian in amah zangin a piangsak hi. Leitung a kipanin huih lakah a om khempeuh dongin, Pasian in Khrih a dingin amahmah zangin a piangsak hi.

1 TIMOTI MASA 4:8

Pumpi kisekin kisinna manpha hi. Ahi zongin kha thu-ah kisekin kisinna pen tuhun laitak le a hong tung ding hunah nuntakna hong piathei ahih manin manphazaw lai hi,

Efesa 4:4

A kibang lametna khat bek a ngahkhawm dingin Pasian in note hong sap mah bangin eite khempeuh pumkhat bek hi-in Kha Siangtho zong khat bek mah a neikhawm ihi hi.

Filippi 4:8

Sanggamte aw, a tawpna-ah ka hong gennop thu in, a hoih le a phattaak thute tawh na lungsim uh na kidimsak un. Tuate in: A man, a dik, a tang, a siangtho, a deihhuai, le a pahtakhuai thute ahi hi.

Mattiu 28:18

Tua ciangin amaute mai-ah Jesuh hong pai a, “Leitungah ahi a, vantungah ahi zongin vangliatna khempeuh kei tungah hong kipia khinta hi.

Hebru 1:3

Tua Tapa in Pasian’ minthanna vang hong taangkhiasak a, Pasian’ lim taktak mah hong pua-in, ama kampauna tawh leitung vantung buppi pai-in a kip hi. Mihingte a mawhna panun a siansak khit ciangin Vanglian pipa Pasian’ taklam, vantungah a tu hi.

Late 110:3

Nangma mihonte mual siangtho tungah na makaih ciangin, utna lungsim tawh na mite hong kipia ding uh hi. Daitui bangin zingsangin na khangnona nangma tungah hong tung ding hi.

1 PETER MASA 1:5

Note’ upna hangin nitawp ni ciangin na ngah ding uh hotkhiatna nomau-a’ ahihna a kilatsak nadingin Pasian in ama vangliatna tawh a hong kepsak ahi hi.

ROM (Romans) 9:24

Tua bangin a hong sap eite pen Jew mite sung bek pan hi loin Gentail mite sung panin zong ahi hi.

Paunak 12:4

Zi hoih pen a pasal’ minthanna le lungdamna hi a, a pasal a maizumsak zi pen a pasal a dingin a dam thei lo guhnatna tawh kibang hi.

Ruth 3:11

Tu-in ka tanu aw, lau kei in; na nget khempeuh nang a dingin kong hihsak ding hi. Bang hang hiam cih leh ka khuapih mite khempeuh in numei gina na hihlam hong thei uh hi.

Paunak 31:29

“Zi hoih tampi a om tei hangin nang kan-a hoih kuamah om kei,” ci-in a phat hi.

Paunak 31:10

Zi hoih pen suangmanpha sangin manphazaw pek a, ahi zongin zi hoih ngah ding haksa mahmah hi.

Filippi 3:8

Hih bang nate bek hi loin, ka Topa Jesuh Khrih ka theihna manphazaw lua sa ka hih manin na dang khempeuh ka sum ngamzaw lai hi. Khrih hangin na dang khempeuh ka nusia khin a, Khrih tawh ka kipawl theih nadingin na dang khempeuh ninneng bang lelin ka ngaihsun hi.

2 PETER NIHNA 1:6

na thutheihna uh pumpi ki-ukzawhna tawh na behlap unla, na pumpi ki-ukzawhna uh thuakzawhna tawh na behlap un; na thuakzawhna uh Pasian’ deih bangin gamtatna tawh na behlap unla,

2 PETER NIHNA 1:8

Hih bang hoihnate a kicingin na neih uhleh i Topa Jesuh Khrih na theihna uhah thahatin kimanna na nei ding uh hi.

2 PETER NIHNA 1:10

Tua ahih manin sanggamte aw, Pasian in note hong sapna le hong teelna-ah a kip taktak na hih nadingun hahkat mahmah un. Tua bangin hahkat le-uhcin na puk ngei kei ding uh hi.

2 PETER NIHNA 2:20

I Topa le Honpa Jesuh Khrih theihna hangin leitung siatna sung panin suakta khin napi-un, leitung siatna-ah awk kikin a lelte pen, a masa a pianzia uh sangin a nunung a pianzia uh siahuaizaw hi.

2 PETER NIHNA 3:18

Hehpihna thu le i Topa le Honpa Jesuh Khrih theihna thu-ah na khangto semsem zaw un. Tuhun a kipanin a tawntungin amah in minthanna ngah paisuak tahen. Amen.