2 KHANG TANGTHU NIHNATE 32:7 - Tedim Bible

⁷ “Thakhauh unla hang un. Assiria kumpipa le amah tawh a om mihon khempeuh mai-ah lau kei unla, zong lungkia kei un; bang hang hiam cih leh amah tawh a omte sangin eite tawh a om pa lianzaw hi.

Tedim Bible Revision 2017

⁷ “Thakhauh unla hang un. Assiria kumpipa le amah tawh a om mihon khempeuh mai ah lau kei unla, zong lungkia kei un; bang hang hiam cih leh amah tawh a omte sangin eite tawh a om pa lian zaw hi.

2 KHANG TANGTHU NIHNATE 32:7 Referans Kwoze

2 KUMPI NIHNATE 6:16

Amah in, “Kihta kei in; bang hang hiam cih leh amaute tawh a omte sangin eite tawh a omte tamzaw hi,” a ci hi.

ROM (Romans) 8:31

Hih teng bang ahih khit ciangin bang gen ding om nawn ahi hiam? Pasian in eite hong koppih peuh leh kua in eite hong zozo ding ahi hiam?

Efesa 6:10

Tu a kipanin Topa tawh na kipawlna uh le ama vangliatna hangin na tha uh khauhsak ta un.

1 JOHAN MASA 4:4

Ka it tate aw, note, Pasian’ mite na hi uh a, tua bang kamsang kineihkhemte a zokhin na hi uh hi. Bang hang hiam cih leh leitung mite a panpih dawimangpa sangin note hong ompih Pasian vanglian zaw hi.

2 KHANG TANGTHU NIHNATE 20:15

Tua ciangin amah in, “Judah gam khempeuh le Jerusalem-a teng khempeuh, le Kumpi Jehoshafat aw, ngai un. Topa in hih bangin note’ tungah hong gen hi: ‘Kihta kei unla, hih a tam mi honpi hangin lungkia kei un; bang hang hiam cih leh galdona pen note a’ hi loin Pasian-a’ ahi hi.

2 KUMPI NIHNATE 18:30

Topa in eite hong honkhia taktak ding a, Assiria kumpipa’ khut sungah hih khuapi kipia lo ding hi, ci-a Hezekiah’ hong genna tawh Topa suang kei un,’ ci hi.

Zekhariah 8:9

“Thakhauhin lungsim hang un. Ka biakinn a kilamkikna ding a bul a kiphuh laitakin kamsangte in a gen thute mah a za na hi uh hi.

Isaiah 35:4

Lungsim patau-in, a lauthawng mite kiangah, “Thakhauh un, lau kei un! En un, na galte uh tungah phu hong laksak dingin Pasian hong pai ding a, amah in note hong honkhia ding hi,” ci un.

1 KHANG TANGTHU MASATE 28:20

Tua ciangin David in a tapa Solomon kiangah, “Thakhauhin hang inla sem in. Lau kei in; bang hang hiam cih leh Topa Pasian, keima Pasian nangawn nang tawh hong om hi. Topa’ biakinn sung nasepna khempeuh a kizawh matengin amah in nang hong tamasak lo ding a, hong nusia lo ding hi.

Zekhariah 8:23

Tua hun ciangin minam tuamtuamte sung panin mi sawm, Jew mi khat kiangah hong pai-in, ‘Pasian in nang hong ompihna thu za ka hih manun na nung hong zuisak in,’ ci-in thum ding uh hi,” a ci hi.

Daniel 10:19

Amah in, “Lunghimawh kei inla, lau kei in. Kihangsak in. Pasian in nang hong it hi,” a hong ci hi. Tuateng a hong gen khit ciangin ka tha hong khauhzaw a, “Topa aw, na gen ding peuhpeuh hong gen in; tu-in ka ci a hong damzaw diak hi,” ka ci hi.

Thu-hilhkikna 31:23

Tua ciangin Topa in Nun’ tapa Joshua sawlin, “Thahat inla hang in; bang hang hiam cih leh amaute piak dingin ka kiciam leitang tungah Israel mite na paipih ding a, nang tawh kong om ding hi,” a ci hi.

2 TIMOTI NIHNA 2:1

Ka ta aw, nang na hih leh Khrih Jesuh tawh i kipawl manin i ngah hehpihna hangin thahatin om in.

1 KHANG TANGTHU MASATE 28:10

Biakinn dingin inn khat a lam dingin Topa in nang hong teel khin ahih manin tu-in kingaihsun in; thahat inla sem in,” a ci hi.

1 KHANG TANGTHU MASATE 22:13

Tua ciangin Israel-te a dingin Topa in Moses a piak thukhamte le biakna ngeina kipte zuih ding na kidop nakleh na maavang ding hi. Thakhauh inla hang in. Lau kei inla lungkia kei in.

Thu-hilhkikna 20:1

“Na langte uh a do dingin pai-in a sakolte, a leengte, le a galkapte uh nomau-a’ sangin a tamzaw-in na muh uh hangin amaute na kihta tuan kei ding uh hi. Bang hang hiam cih leh Egypt gam panin note a hong paikhiatpih Topa na Pasian uh note tawh hong om hi.

2 KHANG TANGTHU NIHNATE 16:7

Tua hun laitakin Judah kumpi Asa kiangah thumu pa Hanani hong pai-in ama kiangah, “Nangmah in Syria kumpipa suangin, Topa na Pasian suang lo na hih manin, Syria kumpipa’ galkapte in nang hong suaktasak hi.

Late 118:8

Mi i muan sangin Topa belh ding hoihzaw hi.

Jeremiah 42:11

Na kihtak uh Babylon kumpipa kihta nawn kei un. Topa in kong cihin-ah, lau nawn kei un. Bang hang hiam cih leh ama khutsung pan a hong honkhia ding le a hong lakhia dingin keimah in note kong ompih hi.

Zekhariah 4:6

Tua ciangin vantungmi in kei kiangah, “Topa in Zerubbabel tungah hih bangin thu gen hi: Galkap tam neihna hang hi lo, nangma vangliatna hang zong hi lo, keima tung panin na ngah vangliatna bek tawh na ma na tunzo ding hi.

2 KUMPI NIHNATE 18:5

Amah in Israel Pasian, Topa muang hi. Tua ahih ciangin ama nunga Judah kumpite khempeuh lak hitaleh ama mai-ate lak hitaleh ah amah tawh a kibang kuamah dang om lo hi.

2 KHANG TANGTHU NIHNATE 15:7

Ahih hangin nang, hang in! Na nasepna thaman hong kipia ding ahih manin na khut zawsak kei in,” a ci hi.

2 KHANG TANGTHU NIHNATE 20:17

Note in hih kidona-ah na do ding uh kisam lo hi. Judah gam mite le Jerusalem khuamite aw, na panmun uh la-in taang loin ding unla, note’ tangin Topa’ gualzawhna mu un,’ ci hi. Kihta kei unla, lungkia kei un. Zing ciangin amaute a do-in pai un. Topa in note hong ompih ding hi,” a ci hi.

Nehemiah 4:8

Tua hi a, Jerusalem hong simin buaina a piangsak dingin amaute kipawlin vaihawmna khat nei uh hi.