2 KHANG TANGTHU NIHNATE 15:2 - Tedim Bible

² Tua ciangin Asa a dawntuah dingin amah pai-in ama kiangah, “Asa, le Judah mite le Benjamin mite aw, ka thu ngai un. Note amah tawh na om laiteng uh note tawh Topa hong om hi. Amah na zon uhleh amah na mu ding uh a, ahih hangin amah na nusiat uhleh amah in note hong nusia ding hi.

Tedim Bible Revision 2017

² Tua ciangin Asa a dawntuah dingin amah pai-in ama kiangah, “Asa, le Judah mite le Benjamin mite aw, ka thu ngai un. Note amah tawh na om lai teng uh note tawh Topa hong om hi. Amah na zon uh leh amah na mu ding uh a, ahih hangin amah na nusiat uh leh amah in note hong nusia ding hi.

2 KHANG TANGTHU NIHNATE 15:2 Referans Kwoze

Jeim 4:8

Pasian kiang nai un. Amah in zong hong nai ding hi. Mawhneite in na khut uh silsiang unla, a kineihkhemte in na lungsim uh siangsak un.

2 KHANG TANGTHU NIHNATE 24:20

Tua ciangin siampi Jehoiada’ tapa Zekhariah’ sungah Pasian’ kha hong lut hi. Tua ciangin amah dingin mite en sukin mite kiangah, “Pasian in hih bangin ci hi: ‘Bang hangin na mavan’ theih loh nadingun Topa’ thupiaknate palsat na hi uh hiam? Note in Topa nusia na hih manun amah in note hong nusia hi,’ ci hi,” a ci hi.

2 KHANG TANGTHU NIHNATE 15:4

Ahih hangin a lungkham uh ciangin Israel Pasian, Topa’ lamah kihei uh a, amah zongin amaute in amah a mu uh hi.

1 KHANG TANGTHU MASATE 28:9

“Tu-in nang, ka tapa Solomon aw, na pa’ Pasian thei inla, na lungsim khempeuh le utna lungsim tawh ama na sem in; bang hang hiam cih leh Topa in lungsim sung zong a, ngimna le ngaihsutna khempeuh thei hi. Nangmah in amah na zon le nangmah in amah na mu ding hi. Ahih hangin amah na nusiat leh amah in nang hong paaikhia paisuak ding hi.

Hebru 10:38

Ahi zongin keima mi a thuman mite in ka thu umin nungta ding uh a, a nungkik a om uhleh tua mite tungah ka lungkim kei ding hi,” na ci hi.

2 KHANG TANGTHU NIHNATE 15:15

Tua ciangin Judah mi khempeuh tua kiciamna-ah lungdam uh hi; bang hang hiam cih leh amaute in a lungsim khempeuh uh tawh kiciamin deihna taktak tawh amah zong uh hi. Tua ciangin amaute in amah mu uh a, Topa in a kiim uhah amaute galdaihna a pia hi.

Hebru 12:25

Tua ahih manin note tungah thu a hong gen pa’ thugen na ngaih loh khak ding uh kidawm un. Hih leitungah thu a gen pa’ thu a ngai lote suakta lo ahih manin vantung panin thu a hong gen pa’ thugen ngai kei lehang i suakta kei zaw kan lai ding hi.

2 KHANG TANGTHU NIHNATE 20:20

Tua ciangin zingsangin amaute tho baihin Tekoa gamlakah a paikhia uh hi. Amaute a paikhiat laitakin Jehoshafat dingin, “Judah gam le Jerusalem-a a tengte aw, ka thugen za un! Topa na Pasian uh um un; tua hileh note na kip ding uh hi. Ama kamsangte um un; tua hileh na maavang ding uh hi,” a ci hi.

2 KHANG TANGTHU NIHNATE 13:12

En un, kote’ lutangin kote tawh Pasian hong omkhawm a, note a do ding sapna peengkul a tum dingin a siampite a galkap peengkulte uh tawh hong om uh hi. Israel mite aw, na pu na pate uh Pasian, Topa do kei un; bang hang hiam na cih uhleh na tangtung kei ding uh hi,” a ci hi.

2 KHANG TANGTHU NIHNATE 20:15

Tua ciangin amah in, “Judah gam khempeuh le Jerusalem-a teng khempeuh, le Kumpi Jehoshafat aw, ngai un. Topa in hih bangin note’ tungah hong gen hi: ‘Kihta kei unla, hih a tam mi honpi hangin lungkia kei un; bang hang hiam cih leh galdona pen note a’ hi loin Pasian-a’ ahi hi.

Thu-hilhkikna 20:1

“Na langte uh a do dingin pai-in a sakolte, a leengte, le a galkapte uh nomau-a’ sangin a tamzaw-in na muh uh hangin amaute na kihta tuan kei ding uh hi. Bang hang hiam cih leh Egypt gam panin note a hong paikhiatpih Topa na Pasian uh note tawh hong om hi.

2 KHANG TANGTHU NIHNATE 32:8

Amah in mihing thahatna nei a, ahih hangin eite hong huhin i gal hong dosak dingin Topa i Pasian in eite hong ompih hi,” a ci hi. Tua ahih ciangin mite in Judah kumpipa Hezekiah’ kammalte a muang uh hi.

2 KUMPI NIHNATE 21:14

Tua ciangin keimah in ka mi a omlaite paaikhia-in amau’ galte tungah ka pia ding a, amaute pen a galte’ mat ding mi le vankiate suak ding uh hi;

Mattiu 13:9

“Zak nading bil a neite in hih thu na za ta un,” ci-in Jesuh in a thugen a khum hi.

2 KHANG TANGTHU NIHNATE 13:4

Tua ciangin Efraim mualtung gamah a om Zemaraim Mual tungah Abijah dingto-in, “Jeroboam le Israel mi khempeuh aw, ka thu ngai un!

Mangmuhna 2:11

Tua ahih manin zak nading bil a neite in Kha Siangtho in pawlpite kiangah a gen thute na za un. A gualzo mite, nihvei sihna in gimsakkha nawn lo ding hi.

Mangmuhna 2:7

Tua ahih manin zak nading bil a neite in Kha Siangtho in pawlpite kiangah a gen thute na za un. A gualzo mite tungah, Pasian’ Huan sunga om nuntakna singgahte a nektheih nadingun thu ka pia ding hi.

Isaiah 7:13

Tua ciangin Isaiah in, “David’ innkuan aw, ngai un! Mite na lunggim sakna uh kicing sa lo a, ka Pasian zong lunggimsak lai na hi uh hiam?

2 KHANG TANGTHU NIHNATE 20:17

Note in hih kidona-ah na do ding uh kisam lo hi. Judah gam mite le Jerusalem khuamite aw, na panmun uh la-in taang loin ding unla, note’ tangin Topa’ gualzawhna mu un,’ ci hi. Kihta kei unla, lungkia kei un. Zing ciangin amaute a do-in pai un. Topa in note hong ompih ding hi,” a ci hi.

Mangmuhna 3:22

Tua ahih manin zak nading bil a neite in Kha Siangtho in pawlpite kiangah a gen thute na za un, ci-in gen in,” a hong ci hi.

Mangmuhna 3:13

Tua ahih manin zak nading bil a neite in Kha Siangtho in pawlpite kiangah a gen thute na za un.

Mangmuhna 3:6

Tua ahih manin zak nading bil a neite in Kha Siangtho in pawlpite kiangah a gen thute na za un.

Mangmuhna 2:29

Tua ahih manin zak nading bil a neite in Kha Siangtho in pawlpite kiangah a gen thute na za un.

Mangmuhna 2:17

Tua ahih manin zak nading bil a neite in Kha Siangtho in pawlpite kiangah a gen thute na za un. A gualzo mi tungah a kiselcip manna an pawlkhat le min thak a kigelhna suangkang khat ka pia ding hi. Tua suangkang pen a ngahte simloh kuamah dang in thei lo ding hi.

Thukhente 9:7

Jotham kiangah tua thu a kigen ciangin amah pai-in Gerizim Mual dawnah ding a, nakpi-in kiko-in amaute kiangah, “No Shekhem mite aw, Pasian in note’ thu hong ngaih theih nadingin ka thu hong ngai un.

2 KHANG TANGTHU NIHNATE 33:12

Amah a lungkham ciangin Topa a Pasian kunh-in a pu a pate’ Pasian’ mai-ah nakpitakin amahmah kiniamkhiat hi.

Thu-hilhkikna 31:17

Tua hun ciangin amaute tungah ka sin so-in, amaute nusia-in ka mai ka seel ding a, amaute beimang ding uh hi. Tua ni ciangin amaute in, ‘Eite’ lakah i Pasian a om loh manin hih siatnate i tungah hong tung hi lo ahi hiam?’ a cih theih nadingun amaute tungah siatna le gimna tampi tung ding hi.

Joshua 22:31

Tua ciangin siampi Eleazar’ tapa Finehas in Reuben mite, Gad mite, le Manasseh mite tungah, “Topa tungah note zuautat nai lo na hih manun eite’ lakah Topa om hi, ci-in tuni-in i thei hi. Tu-in note in Topa’ gimpiak nading panin Israel mite na honkhia uh hi,” a ci hi.

1 KUMPI MASATE 18:18

Amah in dawngin, “Keimah in Israel mite ka lungkhamsak kei hi. Nang in Topa’ thupiaknate nusia-in Baal-te zui na hih manin nang le na pa’ innkuan in na lungkhamsak uh hi.

2 KHANG TANGTHU NIHNATE 12:5

Tua ciangin Shishak’ huhau-in Jerusalem-ah a kikhawm Rehoboam le Judah uliante kiangah kamsang Shemaiah hong pai-in amaute kiangah, “Topa in hih bangin ci hi: ‘Note in kei nong nusia uh hi. Tua ahih ciangin Shishak’ khut sungah note kong pia khin hi,’ ci hi,” a ci hi.

2 KHANG TANGTHU NIHNATE 26:5

Pasian zahtak ding ama tungah a hilh Zekhariah’ hun sungteng amah in Pasian zong hi. Amah in Topa a zon laiteng, Pasian in amah daupaisak hi.

2 KHANG TANGTHU NIHNATE 34:3

Ama uk a kum giatna sung, naupang ahi laipi mahin, amah in a pu David’ Pasian zon ding kipan hi. A kum sawm le nihna ciangin amah in Judah le Jerusalem panin mual dawna biaknate, Asherah milimte, le a kiseek le a kisung milimte beisiangsak ding kipan hi.

Ezra 8:22

Bang hang hiam cih leh kumpipa kiangah, “Ka Pasian un amah a zong mite khempeuh ompihin amau a dingin a hoih na sem a, amah a nusiate khempeuh tungah amah heh hi,” ci-in gen khin ka hih manun lampi-ah kote hong kha dingin galkapte le sakol tung tuangte kumpipa kiangah ka nget ding ka mai a zum hi.

Late 34:4

Keimah in Topa ka zong a, amah in kei hong dawngin, ka launa khempeuh panin kei hong honkhia hi.

Late 53:2

A pil, Pasian a zong mi a om uh hiam, cih a theih nadingin Pasian in vantung panin mihingte hong ensuk hi.

Isaiah 45:19

Keimah in mun simtham, khuamialna gam sungah thu ka gen kei hi. Jakob suanlekhakte tungah, ‘A awngthawl mun sungah kei hong zong un,’ ka ci kei hi. Keimah Topa in thuman ka gen a, a man nate ka pulak hi.

Gamlak-vakna 14:42

Na galte uh mai-ah note hong kisatpuk kha ding ahih manin kuanto kei un. Bang hang hiam cih leh note’ lakah Topa om lo hi.

Gamlak-vakna 14:43

Amalek mite le Kanaan mite na mai uhah om ahih ciangin namsau tawh note na puk ding uh hi. Topa zuihna panin nungkik na hih uh ciangin note tawh Topa hong om lo ding hi,” a ci hi.

Thu-hilhkikna 4:29

Ahih hangin tua lai panin Topa na Pasian uh na zong ding uh a, na lungsim khempeuh uh le na nuntakna khempeuh uh tawh na zon uhleh amah na mu ding uh hi.

Joshua 24:20

Topa nusia-in gamdang pasian-te’ na na sep uhleh, note tungah a hoih hong bawl khit ciangin amah hong kihei-in note’ tungah siatna hong bawlin note hong beisak ding hi,” a ci hi.

Thukhente 10:13

Tua hinapi-in note in kei hong nusia-in pasian dangte na bia uh hi. Tua ahih ciangin note kong honkhia nawn kei ding hi.

1 SAMUEL MASA 12:14

Note in Topa zahtakin ama na sem a, ama aw ngai-in Topa’ thupiakna na langpan’ kei uh a, note a hong uk kumpipa le na Pasian uh na zuih uhleh thu hong nuam ding hi.

1 SAMUEL MASA 12:15

Ahih hangin note in Topa’ aw ngai loin Topa’ thupiakna na langpan’ uhleh Topa in note le na kumpipa uh hong langpan’ ding hi.

1 KUMPI MASATE 11:25

Hadad mah bangin Solomon’ hun sung khempeuh Israel-te a langpangin amah omin siatna a bawl hi. Amah in Israel mite mudah a, Syria gamah a uk hi.

2 KHANG TANGTHU NIHNATE 11:12

Tua ciangin amah in khuapi khempeuhah lum le tei koih a, a muanhuai mahmahin a bawl hi. Tua ahih ciangin Judah gam le Benjamin gam ama a’ a suak hi.

2 KHANG TANGTHU NIHNATE 33:11

Tua ahih ciangin Topa in Assiria kumpipa’ galkap ukte amau’ kiangah paipih a, amaute in sikkawite tawh Manasseh manin sumngo khau tawh khihin Babylon-ah a paipih uh hi.

Isaiah 51:1

Topa in, “Hotkhiat ding a ut, Topa a zongte aw, ngai un. Note hong ki-eu khiatna suangpi, note hong kitawhkhiatna khuk en un.

Jeremiah 2:17

Israel aw, Topa na Pasian in lampi-ah hong makaih laitakin amah na nusiat manin nang tungah hih bang teng hong tung hi lo ahi hiam?

Amos 5:14

Note na nuntak theih nadingun siatna gamta loin, thumanin gamtat ding hanciam un. Tua hileh na gensa uh mah bangin Topa, Vanglian Pasian in note hong ompih ding hi.

Zekhariah 1:3

Ahi zongin tu-in kei kiangah hong ciahkik le-uhcin, kei zong note kiangah kong paikik ding hi.