Namba 2 leta po Sos blo Korint 5:6 - Torres Strait Creole (Yumplatok)

⁶ So nau yumpla mata pil strong nomata yumpla i stil ya wea dis bodi wea dis wold, ane stap ausaid prom dat ples wea da BosLod Zizas i stap.

Namba 2 leta po Sos blo Korint 5:6 Referans Kwoze

Namba 2 leta po Sos blo Korint 5:1

Yumpla sabe, dis bodi blo yumpla wea yumpla stap i wase tent. Wen yumpla go ded dis bodi i go pinis. Yumpla i go gad wan aus wea God i go gibem po yumpla. Dis aus i no bin mekem prom an blo ol pipol bat God i bin mekem. Dis aus i go mata oltaim stap de wea eben.

Leta po Ibrupipol 11:13

Ol dem pipol uda bin bilib lo God raitap antil dempla i bin ded, dempla no bin gede ebridem samting wea God i bin promis. Bat ol i bin mata lisenbaut dem promis blo God longtaim bipo, dat dem promis i go apen ane dempla bin prapa glad. Ane ol i bin gri dat dempla i bin ol streinza ane bizita ya wea dis ert.

Rebaleisan - end blo ebriting 1:9

Mi, ai Zon, bala blo yupla, bikoz yumpla ebribodi bilib wea Zizas. Yumpla ebribodi i go stanap tugeda strong lo Zizas. Yumpla go sapa olkainting, ane yumpla gobi de insaid wea dat ples wea God i ruloba ebribodi. Bikoz ai bin goed pris ane tokbaut God ane ebridem trutok baut Zizas, ol i bin pute mi lo smol ailan ya blo Patmos wea i wase zeilaus.

Namba 1 leta prom Pita 5:1

Ai raite dis pat ya blo dis leta po dem soselda uda i de wea yupla insaid lo sos. Mi, ai soselda tu, ane ai spik prom at blo mi bikoz ai bin luk dem trabol wea Kraist i bin go tru. Ane ai tu go sere da sainilait, dat truglori blo em, wen em go kambaigen. Bikoz ai pat blo dem soselda tu, ai spik gudwei po yupla.

Leta po Ibrupipol 10:35

Ip samting nugud i apen po yupla, no sakwei dat bilib ane tras wanem yupla i gad lo BosLod Kraist Zizas, bat mata stap strong ane tingbaut dat riwod de antap lo eben.

Namba 2 leta po Sos blo Korint 5:8

Yumpla i gad strong bilib ane prapa wande diswan ya, po no stap wea dis bodi ya, bat yumpla prapa pil api po go ane stap wea dat ples wea da BosLod i stap.

Leta po Ibrupipol 13:14

Ya lo ert yumpla i nogad siti wea i mata stap poeba, bat yumpla i luk go prant po stap wea da siti wea i stil de go kam, ane dat siti i gobi blo yumpla.